O Alii o Le Au Paia o Aso e Gata Ai ma le Tatalaina o Faaipoipoga
E alala le tusitala i Iuta, ISA.
E ui lava o se faaipoipoga malosi o le tulaga taua, o nisi o faaipoipoga e faanoanoa ai e faaiu i le tatalaina. Afai ua tatala lau faaipoipoga, o nisi nei o auala e tumau ai lou latalata i lau fanau ma malosi i le talalelei.
Ata na tusia e J. Beth Jepson
“O le faamoemoega autu o mea uma matou te aoaoina atu o le tuufaatasia lea o matua ma fanau i le faatuatua i le Alii o Iesu Keriso, ma ia latou fiafia i o latou aiga, ma faamauina i se faaipoipoga e faavavau.”1 E ui lava i lenei aoaoga musuia mai ia Peresitene Boyd K. Packer, Peresitene o le Korama a Aposetolo e Toasefululua, o le tatalaga o faaipoipoga o loo tupu pea. O faaipoipoga tatala e matautia: o i latou e aafia ai e mafai ona maua lagona o le faateia, faafiti, le le mautonu, atuatuvale, ma le ita, faapea foi ma faaletonu faaletino e pei o le le moe, ma le le fia ai.
I lo‘u aafiaga i le avea ai ma se fautua, sa ou iloa ai, e ui lava o le tele o mea e oo i ai alii ma tamaitai i le tatalaina o faaipoipoga e tutusa lava, e i ai ni eseesega:
-
A o faaipoipo pea, e sili atu ona tuuitiitia le ogaoga o faafitauli faale-faaipoipoga e alii. E mafai ona taitai atu ai lo latou ofo i le tatalaina o faaipoipoga i se lagona o le le mautonu.
-
O alii e itiiti lo latou manao e faasoa mai o latou lagona, o lea e faigata ai ona latou aoao mai o latou aafiaga.
-
O alii e manaomia le uunaiga i le faatinoga, o le mea lea latou te tau le mananao ai e saili se fautuaga ma nai lo lena e tanu o latou lagona e ala i le galue i itula uumi po o le faatofuina i latou lava i se mea faapasi taimi.
-
Ona o popolega i mea tautupe ma le faateia o i latou lava, o nisi o alii e maua ni luitau e pei o le pau o le tamaoaiga, faaopoopo le mamafa o le tino, tofotofoina o le ava malosi, ma faasolo ina le toaaga mai i le Ekalesia.
E pau lava le ala saogalemu i se faaipoipoga o le tumau faamaoni i le talalelei. O fetuunaiga lelei e manaomia ai se mafaia ona agalelei pe a e le fia faia, ina ia faatumauina ai le lagolelei ma le taua faaletagata lava ia, ina ia mafai ona onosaia lagona tiga a o faaauau pea ona galue, ia onosai i isi o loo aafia, ina ia le faaituau ma ia le faa-saua, ma ia taofi mau i se faavae faaleagaga mausali, lea e mafai ona faalatalata atili atu ai oe i le Alii, o le na “alu ifo i lalo” i mea uma ma lana Togiola ua lava lea e faamalolo ai ma siitia ai oe (MF&F 122:8).
E tusa lava po o ai na sili atu ona sese i le tatalaina o lau faaipoipoga, e le oo mai le faamalologa sei vagana ua i ai le salamo ma le faamagaloga. E pei ona aoao mai Peresitene Dieter F. Uchtdorf, Fesoasoani Lua i le Au Peresitene Sili: “E tatau ona tatou lafoai a tatou faitioaga. … Ia manatua, ua faatumulia le lagi ia i latou o loo i ai le tulaga tutusa lenei: Ua faamagaloina i latou. Ma latou te faamagalo atu.”2
O le faatumauina o se Mafutaga ma Lau Fanau
Atonu e leai se isi faafitauli e sili ona faaosoina ai le tauiviga malosi nai lo le tausia o le tamaitiiti. Pe a faaaluina e tamaiti le tele o o latou taimi faatasi ma lo latou tina, e faigofie i le tama ona lagona ua avea o ia ma se tagata asiasi i lana lava fanau. Atonu o lenei mea e lagona ai e ia ua leai se malosiaga ma ua pulea e le aiaiga. Ae peitai, sei vagana ua i ai se tulaga o le faatautala po o isi fegalegaleaiga leaga, o tamaiti e sili atu ona lelei pe a latou faatumauina sootaga ma matua uma e lua. O le mea e lelei ai, o le tele o toalua muamua e aoao e galulue faatasi mo le manuia o a latou fanau.
O le faatumauina o le fesootaiga masani ma lau fanau e tatau ona maualuga le faamuamua, e tusa lava pe mamao pe ua toe faaipoipo. E tusa lava pe o le taimi faatulagaina e le o mea uma ia e te manao ai, ia faia asiasiga ia lelei ma aua lava nei faia ni tala le lelei i le fanau e uiga i lo latou tina. O fanau e mautinoa lava e faamasani ma le manuia i le tatalaina o faaipoipoga pe a naunau lo latou tina ma le tama e faamuamua le fiafia ma le tulaga mautu o le fanau nai lo o latou lava lagona tiga.
Tumau le Toaga i le Ekalesia
Ua fai mai nisi o alii e leai se mea e luluina ai a latou molimau e pei o le tatalaina o faaipoipoga. E faapitoa lava le moni o lenei mea pe afai sa latou faamaoni i gaoioiga a le Ekalesia ma sa tatalo faatauanau mo se tali i faafitauli faale-faaipoipoga. O lenei lagona gatete e mafai ona tuua se tagata ua tatala le faaipoipoga ma se lagona le lelei i le auai i le Lotu, aemaise lava pe afai e talitonu isi sa le faamaoni o ia i lona toalua.
Ae o le faaauauina o gaoioiga a le Ekalesia e faailoa ai ia i tatou mataupu faavae sa‘o ma siomia ai i tatou e tagata agaalofa. Afai e foliga mai o tagata o le Ekalesia e le aapa atu ia te oe, aua le inoino. Atonu latou te le iloa le mea e fai pe tautala ai. Ia onosai ma ia aapa atu oe lava ia. Sue se upegafesootai lagolago. Fefautuaai ma le au peresitene o le korama, epikopo, po o le peresitene o le siteki ma mafaufau i fautuaga faapolofesa, e pei o le Tautua a le AAG mo Aiga, pe afai o maua. O le a fesoasoani e te suesue ai lau lava amio ma sili atu ai ona sao le vaai i mea.
O alii ua tatala faaipoipoga e taliaina i le Ekalesia e pei lava o alii ua faaipoipo. Na saunoa mai Elder Dallin H. Oaks o le Korama a Aposetolo e Toasefululua, “E tele tagata lelei o le Ekalesia ua tatalaina faaipoipoga” ma ia toe ta‘ua “Sei vagana ua solia e le tagata ua tetea ni solitulafono matuia, ona mafai lea ona agavaa o ia mo se pepa faataga o le malumalu i lalo o tulaga agavaa lea e faatatau foi i isi tagata o le ekalesia.”3
O le Tuputupu ae e ala i Faigata
O nisi o alii e faapea mai e ui lava ina latou te le mananao e toe oo i se aafiaga faapena, ua latou aoao mai ai. Ua latou toe maua mai le malosi ma agai i luma i o latou olaga. O lenei ituaiga vaaiga na faaalia mai e lenei alii sa ou fautuaina: “O loo faigata pea ia te au ona taliaina le manatu faapea o a‘u o se tagata ua tatala le faaipoipoga, ae ua ou i ai. Ou te le’i mafaufauina, ae na tupu, ma ua ou taliaina. O la‘u sini nei o le faia o mea uma ou te mafaia e tumau ai i le faatuatua ia Keriso, fausia se faaipoipoga malosi fou, ma avea o se faataitaiga lelei i la’u fanau ma fanau foi a lou toalua.”