O Lea Mataupu ma Lea Mataupu
2 Nifae 31:20
O le autu o le Mutuale i le tausaga nei e fesoasoani tatou te iloa ai pe mafai faapefea ona tatou agai atu i luma a o tutu mausali ai.
20 O le mea lea, e tatau ai ona outou fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma. O le mea lea, afai tou te fetaomi atu i luma, ma taumamafa fiafia i le afioga a Keriso, ma tumau e oo i le iuga, faauta, ua faapea ona fetalai mai o le Tamā: O le a outou maua le ola e faavavau.
Tumau e oo i le iuga
“O le suega ua faatulagaina e se Atua alofa i o tatou luma e le faapea ia vaai pe mafai ona tatou onosaia faigata. Ae ia iloa ai pe mafai ona tatou onosaia lelei. Tatou te pasia le suega e ala i le faaali atu tatou te manatuaina o Ia ma poloaiga na Ia tuuina mai ia i tatou.”
Peresitene Henry B. Eyring, Fesoasoani Muamua i le Au Peresitene Sili, “I Le Malosi o le Alii,” Liahona, Me 2004, 17.
O le a outou maua le ola e faavavau
E ala i le Togiola a Iesu Keriso, ua folafola mai e le Tama ia te i tatou le ola e faavavau—e avea faapei o Ia—pe afai tatou te faia ni mea faapitoa. O ni nai mau ia o loo ta’ua ai nisi o na mea:
Fiafia i le afioga a Keriso
“O le fiafia o lona uiga e sili atu nai lo le na ona tofo. O le fiafia o lona uiga o le taumafa. Tatou te fiafia i tusitusiga paia e ala i le suesue i ai i se agaga o le matagofie ua maua ma le faamaoni o le usiusitai. Pe a tatou taumamafa i afioga a Keriso … e avea ma se vaega taua o lo tatou natura.”
Peresitene Russell M. Nelson, Peresitene o le Korama a Aposetolo e Toasefululua, “Ola e ala i le Taitaiga Faaleagaga,” Ensign, Nov. 2000, 17.
O le alofa o le Atua ma tagata uma
“O le alofa o le Atua ma tagata uma” o loo aofia ai poloaiga sili uma e lua (tagai i le Mataio 22:37–40). O se isi upu mo lenei ituaiga o alofa o le alofa moni, po o le alofa mama o Keriso (tagai i le Moronae 7:47).
Faamoemoe atoatoa lelei
“E ui o le faamoemoe o le vaivai e tuua ai tatou i le alofa mutimutivale o lo tatou lagona ma le mea na tupu, ‘faamoemoe atoatoa lelei’ e fua mai ai a tagata taitoatasi ua faasusuluina. E vaaia lo latou susulu, e vaaia foi mea ona o lena susulu! … O nisi taimi i le loloto o le pogisa, e leai se malamalama mai fafo—na o se malamalama i totonu e taialaina ai ma ia mautinoa ai.”
Elder Neal A. Maxwell (1926–2004) o le Korama a Aposetolo e Toasefululua, “Susulu o le Faamoemoe,” Liahona, Nov. 1994, 35.
Fetaomi atu i luma
O a mea e manaomia ona outou fai a o outou fetaomi atu i luma i le ala i le ola e faavavau? Faitau le mea na faia e tagata i le miti a Liae i le laau o le ola (tagai i le 1 Nifae 8:30). E mafai ona e mafaufau i nisi faataitaiga mai tusitusiga paia?
Tumau ia Keriso
Tumau o lona uiga o le tutu mausali, e le migoi. Faamaoni ia Keriso o lona uiga o le faatuatua e le maluelue ia te Ia ma le usiusitai i Ana poloaiga, e aofia ai le mauaina o sauniga ma osia ma tausia o feagaiga.