សារលិខិតបង្រៀនសួរសុខទុក្ខ ខែ កុម្ភៈ ឆ្នាំ ២០១៧
ដង្វាយធួនរបស់ព្រះគ្រីស្ទគឺជាភស្ដុតាងនៃសេចក្ដីស្រឡាញ់របស់ព្រះ
សូមសិក្សាអត្ថបទនេះប្រកបដោយការអធិស្ឋាន និងស្វែងរកការបំផុសគំនិត ដើម្បីដឹងពីអ្វីដែលត្រូវចែកចាយ ។
សេចក្ដីជំនឿ ក្រុមគ្រួសារ ការសង្គ្រោះ
ការយល់ដឹងថា ព្រះវរបិតាសួគ៌បានប្រទានព្រះរាជបុត្រាបង្កើតតែមួយរបស់ទ្រង់ ដើម្បីឲ្យយើងអាចមានអមតភាព ហើយសក្ដានុភាពដើម្បីមានជីវិតដ៏នៅអស់កល្បជានិច្ច ជួយយើងឲ្យទទួលអារម្មណ៍នូវសេចក្ដីស្រឡាញ់របស់ព្រះដ៏ធំធេង ហើយគ្មានទីបញ្ចប់ចំពោះយើង ។ ព្រះអង្គសង្គ្រោះរបស់យើងក៏ស្រឡាញ់យើងដែរ ។
« តើអ្នកណានឹងពង្រាត់យើងចេញពីសេចក្តីស្រឡាញ់របស់ផងព្រះគ្រីស្ទបាន ? …
« ដ្បិតខ្ញុំជឿជាក់ថា ទោះស្លាប់ ឬ រស់ ពួកទេវតា ឬ អំណាចអ្វី ការអ្វីនៅជាន់នេះ ឬ ទៅមុខ ឬ ឥទ្ធិឫទ្ធិអ្វី
« ទីមានកម្ពស់ ទីជម្រៅ ឬរបស់អ្វីដែលកើតមកឯទៀតក្តី នោះពុំអាចនឹងពង្រាត់យើង ចេញពីសេចក្តីស្រឡាញ់របស់ព្រះ ដែលនៅក្នុងព្រះគ្រីស្ទយេស៊ូវ ជាព្រះអម្ចាស់នៃយើងរាល់គ្នាទៅបានឡើយ » ( រ៉ូម ៨:៣៥, ៣៨–៣៩ ) ។
អែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់បានថ្លែងពីដង្វាយធួនរបស់ព្រះយេស៊ូវគ្រីស្ទថា « ការរងទុក្ខរបស់ព្រះអង្គសង្គ្រោះនៅក្នុងសួនច្បារគែតសេម៉ានី និងការឈឺចាប់យ៉ាងខ្លាំងរបស់ទ្រង់នៅលើឈើឆ្កាង ប្រោសលោះយើងឲ្យរួចពីសេចក្ដីស្លាប់តាមរយៈការបំពេញដល់តម្រូវការនានាដែលសេចក្ដីយុត្តិធម៌មានចំពោះយើង ។ ទ្រង់បានប្រទានសេចក្ដីករុណា និងអភ័យទោសដល់អ្នកទាំងឡាយដែលប្រែចិត្ត ។ ដង្វាយធួនរបស់ព្រះយេស៊ូវគ្រីស្ទ ក៏បានធ្វើឲ្យស្កប់ស្កល់ដល់បំណុលនៃសេចក្ដីយុត្តិធម៌ ដើម្បីលោះយើងដោយការព្យាបាល និងការបង់ថ្លៃសងដល់យើងនូវរាល់ការរងទុក្ខ ដែលយើងស៊ូទ្រាំដោយស្លូតត្រង់ ។ ‹ ដ្បិតមើលចុះ ទ្រង់រងទុក្ខការឈឺចាប់នៃមនុស្សលោកទាំងអស់ មែនហើយគឺការឈឺចាប់របស់សត្វលោកសព្វសារពើ ដែលរស់នៅទាំងប្រុស ទាំងស្រី និងក្មេងៗ ដែលជាគ្រួសារនៃលោកអ័ដាម › ( នីហ្វៃទី ២ ៩:២១ សូមមើលផងដែរ អាលម៉ា ៧:១១–១២ ) » ។១
ព្រះគ្រីស្ទ « បានចារិក [ យើង ] ទុកនៅផ្ទៃបាតដៃរបស់ [ ទ្រង់ ] ហើយ » ( អេសាយ ៤៩:១៦ ) ។ លីនដា ខេ ប៊ើតុន ប្រធានសមាគមសង្គ្រោះទូទៅ បានថ្លែងថា « ទង្វើនៃសេចក្ដីស្រឡាញ់ដ៏ឧត្តុង្គឧត្តមនោះ គួរតែធ្វើឲ្យយើងម្នាក់ៗលុតជង្គង់ចុះអធិស្ឋានដោយរាបសារ ដើម្បីថ្លែងអំណរគុណព្រះវរបិតាសួគ៌ដែលបានស្រឡាញ់យើង រហូតដល់ទ្រង់បានបញ្ជូនព្រះរាជបុត្រាបង្កើតតែមួយ និងបុត្រាដ៏ល្អឥតខ្ចោះរបស់ទ្រង់ឲ្យមករងទុក្ខសម្រាប់អំពើបាបរបស់យើង ការឈឺចាប់ក្នុងចិត្តរបស់យើង និងអ្វីៗទាំងអស់ដែលទំនងជាមានភាពអយុត្តិធម៌នៅក្នុងជីវិតរបស់យើងម្នាក់ៗ » ។២
ខគម្ពីរ និង ព័ត៌មានបន្ថែម
© 2017 by Intellectual Reserve, Inc. All rights reserved. ។ បោះពុម្ពនៅ ស.រ.អា. ។ អនុមតិជាភាសាអង់គ្លេស ៖ ៦/១៦ ។ អនុមតិបកប្រែ ៖ ៦/១៦ ។ ការបកប្រែនៃ Visiting Teaching Message, February 2017 ។Cambodian ។ 97922 258
សូមពិចារណាអំពីសំណួរនេះ
តើយើងអាចបង្ហាញការដឹងគុណ និងសេចក្ដីស្រឡាញ់របស់យើងចំពោះព្រះ និងចំពោះព្រះយេស៊ូវគ្រីស្ទសម្រាប់អំណោយទាននៃដង្វាយធួនរបស់ព្រះអង្គសង្គ្រោះយើងតាមរបៀបណា ?