Leʻo ʻo e Kau Māʻoniʻoni ʻi he Ngaahi ʻAho Kimui Ní
ʻAukai ki ha Tokoni ʻi he Ngāueʻangá
Laʻitā mei he Getty Images
Naʻá ku foki ki ʻapi hili ʻeku ngāue faivelenga ʻi he misiona Mozambique, pea hangē ko e kau ʻosi ngāue fakafaifekau tokolahi, naʻá ku tokanga ki he akó mo e ngāué.
Naʻá ku nofo ʻi Palāsila ʻi ha kolo ʻokú ne ʻākoloʻi ʻa Palakueí peá u ngāue ʻi ha kautaha hū koloa ki ha falekoloa lahi ʻi Palakuei. Naʻe tokoni ʻeku poto ʻi he lea faka-Pilitānia ʻi he ngāue fakafaifekaú ke u maʻu ai ʻa e ngāue ko ʻení. Lolotonga ʻení naʻá ku ʻosi mali pea maʻu mo ha ʻofefine.
ʻI he taimi naʻe fakaʻauʻau ai e tōlalo fakapaʻanga ʻa Palāsilá ki he hōloa e mahuʻinga ʻo e paʻanga Palāsilá, naʻe uesia ai ʻeku ngāué. Naʻá ne fakatupunga ha holo ʻi he fefakatauʻaki ʻo e koloa ne u faʻa hū maí. ʻI he fakaʻosinga ʻo Fēpueli ʻo e taʻu hono hokó, naʻe mātuʻaki hala pē ha ngāue ke u fai. Naʻe mei pau ke mole ʻeku ngāué, ʻo hangē ko ia kuo hoko ki he niʻihi ʻo hoku kau kaungāngāué. Ne kamata ke hohaʻa ʻeku fakakaukaú ki hono tauhi hoku uaifí mo hoku kiʻi ʻofefiné. Ne aʻu pē ʻou kamata kumi ha ngāue ʻe taha.
Naʻá ku talanoa mo hoku uaifí kau ki he meʻa naʻe hokó. Naʻá ne fokotuʻu mai ke ma ʻaukai. Lolotonga ʻema ʻaukaí, ne ma ongoʻi ha loto-nonga moʻoni pea naʻá ma ongoʻi ʻe lelei ʻa e meʻa kotoa pē, neongo naʻe ʻikai ke u ʻiloʻi pe ʻe hoko fēfē ia.
ʻI he ʻaho pē hono hokó, naʻe ui au heʻeku pule ngāué. Ne u fakakaukau kuo hokosia mai e taimi fakamanavaheé—ʻe tuli au mei he ngāué. Ka naʻá ku ʻohovale ʻi he pehē mai heʻeku pule ngāué ʻoku ʻi ai haʻane fakakaukau. Koeʻuhí ko ʻeku poto ʻi he lea faka-Pilitāniá, naʻá ne fokotuʻu mai ke u liliu ʻa e ngaahi pepa fakalao ko ia ʻoku faʻa ʻave ki he kau loeá ke fai hano liliú. Naʻá ne talamai kapau ʻe ola lelei ʻeku liliu leá, ʻe tuku mai leva ke u fakahoko e ngāue ko iá pea ʻe fakahaofi ai e fakamole ʻa e kautahá. Naʻá ku kamata ngāue leva ke liliu ʻa e ʻū pepá he taimi pē ko iá. ʻI he taimi naʻá ku fakahā ai ʻeku ngāué ki he pulé, naʻá ne fiefia lahi! Naʻá ku fiefia lahi pē mo au koeʻuhí ko e lava ke kei maʻu pē haʻaku ngāué.
ʻI he taimi ne u ʻalu ai ke maʻu ʻeku vahé, ʻa ia ne mei hoko ko ʻeku vahe fakaʻosí, naʻá ku ʻohovale he ʻilo kuo hiki ʻeku tuʻunga vāhengá. Naʻe ongo moʻoni ia ki hoku lotó, pea naʻá ku fakamālō ki heʻetau Tamai Hēvaní. Naʻá ku ʻiloʻi ʻi he aʻusia ko ʻení ʻoku hanga ʻe he ʻaukaí ʻo fakaava e ngaahi matapā ʻo e langí.