Ko e Ngaahi Mana Lahi ʻa Kilisitiná

Kuo mamata homau fāmilí ki ha ngaahi mana lahi koeʻuhi ko hoku taʻokete ko Kilisitiná. Naʻe fāʻeleʻi ia mo ha palopalema lahi ʻi hono mafú. ʻI he taimi naʻe sivi ai ia ʻe he kau toketaá, naʻa nau talaange ki heʻeku ongomātuʻá mahalo he ʻikai ke moʻui ia. Ka neongo ia, naʻe fua ʻe heʻeku ongomātuʻá ʻena pēpē pelepelengesí peá na falala ki he ʻEikí. Ko e moʻui ʻa Kilisitiná ko ha mana ia.

Ne fakalau atu e taʻú, pea na‘e hoko ʻa Kilisitina ko ha taʻahine mālohi, poto, fakakata, mo fakaʻofoʻofa. ʻI hono taʻu 12, naʻe fie maʻu ke tafa ia ke fokotuʻu ha kālava faʻu pē ki hono mafú. Naʻa mau hohaʻa pe ʻe kei moʻui hili ʻa e tafá, ka naʻá ne loto-toʻa pea maʻu ha ivi lahi ʻi heʻene lea fakamāvae mai kiate kimautolu peá ne hū ki he loki tafá.

Naʻe moʻui ʻa Kilisitina hili e tafá pea naʻá ne toe foki ange ki ʻapi kiate kimautolu. Naʻá ne hā fiefia maʻu pē pea mo houngaʻia ki he Tamai Hēvaní ʻi heʻene moʻuí mo e toe maʻu ha faingamālie ke ako mo tupulaki aí. Naʻe ʻikai teitei ʻiloʻi ʻe hono ngaahi kaungāmeʻá ʻokú ne mahaki mafu, koeʻuhí he naʻá ne longomoʻui ʻaupito.

Hili ha fakaakeake mei haʻane pā-kalava ʻi hono taʻu 16, naʻe kole ange kia Kilisitina ke tokoni ʻi he faiako seminelí. Naʻá ne poupouʻi e kau ako tokolahi ʻi heʻenau ako maʻuloto e folofolá mo ako mei he Tohi ʻa Molomoná. Naʻe tā piano foki ʻa Kilisitina pea naʻá ne manako ke hiva. Ne tuai e kemo ʻene kau atu ʻi hono fakaafeʻi ia ke tataki ha kuaea ʻo e toko 60 ʻi ha konifelenisi fakauooti.

ʻI hono taʻu 22, naʻe mali ai ʻa Kilisitina mo ha talavou ʻi he temipalé ki he taʻengatá. Naʻe ʻikai fuoloa mei heʻene malí, kuo uiuiʻi ia ke hoko ko e Palesiteni ‘o e Kau Finemui ʻi hono uōtí.

ʻI hono taʻu 26, naʻe vave ʻaupito ʻa e holo e tuʻunga moʻui lelei ʻa Kilisitiná. Naʻá ne ʻalu ki Sao Paulo ki ha ngaahi sivi. Naʻá ne ʻilo ai naʻe fie maʻu ke toe tafa ia. Lolotonga e tafá, naʻe hoko ha palopalema ki hono mafú ʻo ne fakatupu ai ha maumau ki hono ʻatamaí. Hili ha ngaahi māhina, naʻe ʻikai ke ne sai. Naʻe fakataha homau fāmilí ke lotu mo ʻaukai ki heʻene fakaakeaké, ka naʻe ʻikai pē ke toe fakalakalaka ki muʻa. Naʻa mau fakakaukau ke mau toe ʻaukai ʻo kole e tokoni ʻa e Tamai Hēvaní ke mau tali Hono finangaló. Naʻe mālōlō ʻa Kilisitina ʻi he ʻaho hono hokó.

Naʻe ʻikai ko e meʻa ia naʻa mau ʻamanaki ki aí, ka naʻa mau fakatokangaʻi ko ha mana foki ʻeni. Ne ʻikai toe mamahi ʻa Kilisitina. Naʻe ʻomi ʻe he ongoongoleleí ʻa e fiefia mo e melino, ʻo aʻu ki he taimi ‘o e mamahi lahí. Koeʻuhí kuo ʻosi silaʻi kimautolu, ʻoku mau ʻiloʻi te mau lava ʻo toe fakataha mo Kilisitina.