Ko e Ngāue ʻi he Siasí
Ko e Tokanga Mai e ʻEikí Kiate Kitautolú
ʻOku nofo ʻa e tokotaha naʻá ne faʻú ʻi ʻIutā, USA.
ʻI heʻeku fakakaukau ki he taimi naʻe tukutaha ai e tokanga ʻa e ngaahi fakataha alēlea fakauōtí ʻi hoku fāmilí, naʻá ku toki fakatokangaʻi naʻe ʻikai ko e uōtí pē naʻe tokanga maí—ka naʻe tokanga mai ʻa e ʻEikí kiate kimautolu.
ʻI he taimi naʻe ʻeke mai ai ʻe heʻeku pīsopé pe te u tali ha uiuiʻi ke hoko ko e Palesiteni ‘o e kau Finemuí, naʻá ku fie tali ʻikai. Naʻá ku ongoʻi taʻefeʻunga ke tokangaʻi ʻa e kau finemuí. Kae hili ha māhina ʻe tolu heʻeku tali iá, naʻá ku loto mamahi ʻi heʻeku ʻilo kuo liliu e ngaahi ngataʻanga ʻo e uōtí pea kuo pau ke tukuange au.
Naʻá ku lotu ke ʻiloʻi ko e hā e ʻuhinga naʻe tuku ai au ʻe he ʻEikí ke u ʻofa ʻi he kau finemuí pea toe vave pē ʻemau māvaé. Ne taʻeʻamanekina hono tali ʻeku lotú lolotonga ha fakataha alēlea fakauooti.
Naʻe kole ki ha niʻihi ʻo e kau mēmipa ʻo e fakataha alēleá ke vahevahe ʻa e ngaahi talanoa ʻi he konifelenisi fakasiteikí fekauʻaki mo hono tokoniʻi ʻo e kau mēmipa ʻo homau uōtí, ka naʻá ku hohaʻa naʻa ongoʻi ‘e ha niʻihi ko kinautolú ko ha ngāue fakauooti. Hili ʻeku fakahā ʻeku hohaʻá, naʻá ku ongoʻi hono fanafana mai ʻe he Laumālié ʻoku tokanga ʻa e Tamai Hēvaní ki Heʻene fānau kotoa pē.
ʻI he ngaahi taʻu kuo hilí ne tukutaha e tokanga ʻa e fakataha alēlea fakauōtí ʻiate au mo hoku husepānití, pea naʻá ma ʻilo ia. Ne u foki mai ʻo toe mālohi hili hono fanauʻi ʻema fuofua pēpeé ka naʻe ʻikai foki mai hoku husepānití. ʻI ha ngaahi taʻu lahi, naʻe feinga e kau palesiteni fakasiteikí, kau pīsopé, mo e kau faiako fakaʻapí ke tokoniʻi kimautolu.
Naʻa mau hiki leva ki ha uooti foʻou. Naʻe ʻi ai ha pīsope ʻofa mo faʻa kātaki pea mo ha faiako fakaʻapi naʻá na hoko ko ha ongo kaungāmeʻa hoku husepānití. ʻI he taimi ko ʻení, naʻe ongongofua hoku husepānití ki he Laumālié. Naʻe ueʻi ia ke ne lau e Tohi ʻa Molomoná, pea naʻe kamata ke ne ʻalu ki he lotú. Naʻe kamata māmālie ke ne toe maʻu ha fakamoʻoni. He ʻikai teitei ngalo ʻa e ʻaho fakaʻofoʻofa ko ia naʻe silaʻi ai homau fāmilí ʻi he temipalé.
Naʻe toki mahino kiate au ʻa e ʻuhinga ʻo e tukutaha e tokanga ʻo ha fakataha alēlea fakauōtí, ʻi heʻeku maʻu e faingamālie ke hoko ai ko e Palesiteni ‘o e Kau Finemuí. Naʻá ku ʻilo ai ʻoku tukutaha e tokanga ʻa e fakataha alēlea fakauōtí ʻi ha kakai pau ʻo ʻikai koeʻuhí ko ʻenau tokanga ki he tokolahí, ka koeʻuhí ʻoku nau tokanga mai mo e ʻEikí ki he niʻihi fakafoʻituituí. ʻI he taimi ʻoku tau tokoni ai ʻi hotau ngaahi uiuiʻí, ʻe fakafonu ʻe he ʻEikí kitautolu ʻaki ʻEne ʻofa kiate kinautolu ʻoku tau tokoniʻí.
ʻI heʻeku fakakaukau ki he taimi naʻe tukutaha ai e tokanga e ngaahi fakataha alēlea fakauōtí ʻi hoku fāmilí, naʻá ku toki fakatokangaʻi ʻoku ʻikai ko e uōtí pē naʻe tokanga maí—ka naʻe tokanga mai mo e ʻEikí kiate kimautolu. Naʻa nau tokanga mai kiate kimautolu koeʻuhí ʻokú Ne tokanga mai kiate kimautolu.
Ko hono moʻoní, ʻoku tokanga mai ʻa e ʻEikí kiate kitautolu kotoa. Tuʻunga ʻi he ʻofá, kuó Ne ʻosi faʻu ha palani ke fakamālohia kitautolu, pea fakafoki mai kitautolu ʻo ka fie maʻu—ko ha palani ʻoku faʻa fakahoko ʻe he kakai ʻo hangē ko e pīsope mo e faiako fakaʻapi naʻá na tokoniʻi hoku husepānití.