Ko e Hā ʻA e ʻInsititiuti?
ʻOua naʻa ke tō ʻi he ngaahi feohi fakakaungāmeʻá, maluʻi fakalaumālié, mo e ʻilo ki he ongoongoleleí.
ʻI hono poupouʻi ʻe ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻa e kakai lalahi kei talavoú ke nau hoko “ko e toʻu tangata maʻongoʻonga taha … ʻi he hisitōlia ʻo e Siasí”, ko e meʻa ʻe taha naʻá ne fokotuʻu mai ke nau faí ko e lesisita ki he ʻinisititiuti fakalotú. Naʻá ne talaʻofa mai ʻi hono fakahoko iá, te nau mateuteu lelei ange ai ki he ngāue fakafaifekaú, mali taʻengatá, mo ʻenau hoko ko ha kakai lalahí pea maʻu ʻa e ngaahi ueʻi mo e fakahinohino mei he Laumālié.1
Kapau ʻoku ʻikai ke ke fakapapauʻi pe ko e hā ʻa e ʻinisititiuti fakalotu ʻa e Siasí pe ʻe tāpuekina fēfē ai hoʻo moʻuí hili e ako maʻolungá, te u feinga ke tali ha niʻihi ʻo hoʻo ngaahi fehuʻí.
Ko Hai ʻe Lava ke Kau Ki Aí?
ʻOku tokolahi ha toʻu tupu ʻoku nau fili ke kau atu ki he seminelí, ka ko e ʻosi ko iá pea hā leva? ʻE hū ha niʻihi ki ha ngaahi ʻunivēsiti ʻa e Siasí pe kolisí, ʻa ia ʻoku kau ʻa e ngaahi kalasi lēsoni fakalotú ʻi heʻenau taimi-tēpile fakakalasí. Ko e hā hono ʻuhingá? Koeʻuhí he ʻoku matuʻaki mahuʻinga ke maʻu fakataha ha aʻusia fakalaumālie mo ha aʻusia fakaako.
Kae fēfē kapau ʻoku ʻikai ke ke ʻalu ki ha ʻapiako ʻa e Siasí? ʻOku ʻikai faʻa fakatokangaʻi ʻe ha kakai lalahi kei talavou tokolahi, ʻoku malava ʻo maʻu ha ako fakaʻatamai mo fakalaumālie ʻi ha feituʻu pē te nau ʻi ai. ʻI hoʻo hū ki he ʻunivesití, ʻoku faʻa ofi atu pē ʻa e polokalama ʻinisititiuti fakalotú pea meimei ke te kolosi pē mei he ʻapiakó ki he kauhala ʻe tahá, pe ʻoku fai ʻi ha falelotu fakalotofonua ʻo e Siasí. ʻOku ʻi ai ha ngaahi kolisi ʻe niʻihi ʻoku nau fakaʻatā e ngaahi kalasi ʻinisititiutí ke akoʻi ia ʻi honau ngaahi ʻapiakó. Kapau kuó ke ʻosi mei he ʻunivēsití, ʻoku kei talitali lelei pē koe.
ʻOku ʻikai fie maʻu ia ke ke hoko ko ha tokotaha ako ʻunivēsiti. Ko e kakai lalahi kei talavou kotoa pē, taʻu 18–30, mali pe teʻeki mali, ʻe lava ke kau ki he ʻinisititiutí.
ʻAʻahi ki he institute.lds.org ke maʻu ha kalasi ʻinisititiuti ʻoku ofi atu kiate koé.
ʻUhinga ke Kau Aí?
Naʻe kamata ʻa e polokalamá mo e kau ako pē ʻe 57 ofi ki ha ʻunivesiti ʻi Mosikou, ʻAitahō, USA, pea kuo aʻu eni ʻa e kau akó ki he toko 250,000 nai fakaemāmāni lahi. ʻOku nau mātā e fuʻu ivi lahi mo e ngaahi tāpuaki kuo mahutafea ai ʻenau moʻuí. ʻI ha savea kimuí ni, naʻe ʻeke ai ki ha fānau ako ʻinisititiuti mei ha ngaahi fonua kehekehe ʻe 10, ʻa e meʻa kuo fakahoko ʻe he ʻinisitiutí maʻanautolú. Ko e hā naʻa nau ʻalu aí? ʻOku tokoniʻi fēfē ai kinautolu? Hili hano tānaki ha lauiafe ʻo e ngaahi talí naʻe hā mahino ai ha tefitoʻi kaveinga ʻe tolu: ʻOku tokoniʻi ʻe he ʻinisititiutí e kau akó ke (1) fakamālohia honau vā mo Sīsū Kalaisí, (2) fakalakalaka fakalaumālie, pea (3) maʻu ha loto falala ke fai ha ngaahi fili mahuʻinga ʻi he moʻuí.
Fakakaukau ki he ngaahi fili ‘oku ke fehangahangai mo iá: ʻoku tau fili ha kolisi; fakakaukauʻi pe te u ʻalu ʻo ngāue fakafaifekau pe ʻikai; pea mo fili ha ngāue maʻuʻanga moʻui, ngaahi kaungāmeʻa, mo ha hoa mali. Ko ha ngaahi fili mahuʻinga ʻeni. Pea hangē ko e lea ʻa Palesiteni Tōmasi S. Monisoní, “Ko e ngaahi filí ʻokú nau fakapapauʻi ho ikuʻangá.”2 Ko e moʻoni ʻoku totonu ke ke fai ʻa e ngaahi fili mahuʻingá ni ʻi he tokoni ʻa e Laumālie Māʻoniʻoní. ʻE maʻu e tokoni fakalangí ʻi hoʻo fakafehokotaki mo e Laumālié, ngaahi folofolá, mo e ngaahi kaungāmeʻa ʻoku nau vahevahe hoʻo ngaahi tuʻunga ʻulungaanga mahuʻingá ʻo fakafou ʻi ha kalasi lēsoni fakalotu ʻi he ʻinisititiutí pe ha ako ʻa e Siasí.
Ko ha tokotaha ako ʻa Lola ʻoku tokoniʻi ʻe he ʻinisititiutí. ʻI heʻene kamata ʻalu ki ha ʻunivēsiti ʻi ʻOniteliō, Kānatá, naʻá ne ongoʻi hē mo ongoʻi ʻoku ʻikai mālohi ʻene fakamoʻoní ʻo hangē ko ia kimuʻá. Naʻe kamata ke ne ʻalu ki he ʻinisititiutí mo toe “ongoʻi tatau” mo “iloʻi ko hai ia.” (Vakaiʻi ʻene talanoá mo e ngaahi talanoa ʻo e kakai lalahi kei talavou kehé ʻi he InstituteIsForMe.lds.org.)
ʻI hoʻo ʻiloʻi moʻoni ko hai koé—ko ha foha pe ʻofefine ʻo ha Tamai Hēvani ʻofa ʻoku finangalo ke ke hoko ko ha taha lavameʻá—ʻe lava ke ke fai ai ha fili mahuʻinga ʻoku fakatau ki he fiefiá mo e lavameʻá.
ʻI hoʻo tānaki atu ki he ngaahi meʻa naʻá ke ako ʻi he seminelí mo e ngaahi aʻusia ʻi he Siasí, ʻe tokoni hoʻo ʻalu ki he ʻinisititiutí ke fakamālohia ho vā mo Sīsū Kalaisí ʻi ha vahaʻa taimi mahuʻinga ʻaupito ʻo e moʻuí mo tokoniʻi koe ke ke hokohoko atu ʻi hoʻo fakalakalaka fakalaumālié.
ʻOku ʻofa hoʻo Tamai Hēvaní ʻiate koe. Te ne ʻomi ha ngaahi founga ke ke muimui ai ke hoko ʻo hangē ko Iá. Ko e ʻinisititiutí ko ha taha ia ʻo e ngaahi founga ʻoku hoko ai ha faikehekehe ʻi he moʻui ʻa e lau kilu ʻi he taʻu kotoa pē.