Ngaahi Fehuʻí & Talí
“Te u tokoni fēfē ki hoku ngaahi kaungāmeʻá ke ikunaʻi ʻa e ngaahi palopalema hangē ko e kapekapé mo e tōtuʻa ʻo e keimi vitioó?”
ʻI hono tokoniʻi ho ngaahi kaungāmeʻá ke ikunaʻi ʻa e ngaahi palopalemá ʻe lava ke hoko ia ko ha kaveinga ngali faingataʻa, koeʻuhí ʻoku ʻikai ke ke loto ke pehē ʻokú ke malanga pe loto fakamaau. Neongo ʻe kehekehe e tūkunga takitaha, ko ha meʻa mahuʻinga ke manatuʻi ʻa e mahuʻinga hoʻo tā sīpingá. ʻI hono pukepuke hoʻo tuʻunga moʻuí, ʻe fakatokangaʻi ʻe he niʻihi kehé—pea ʻe lava ke ke hoko ko ha tākiekina lelei. Hangē ko ʻení, kapau ʻoku kapekape ho kaungāmeʻá, fakapapauʻi ʻokú ke fakaʻaongaʻi maʻu pē e lea ʻoku maʻá—kau ai ʻa e ngaahi hua mo e fakamatala maʻá. ʻI he founga ko iá, te ne maʻu ai ha sīpinga lelei ʻo e malava ko ia ʻo fakaoli mo manakoa taʻekapekapé.
ʻE faʻa fakatokangaʻi ʻe ho ngaahi kaungāmeʻá hoʻo ngaahi filí pea te nau fakaʻapaʻapaʻi ia. ʻE fakaʻapaʻapaʻi ʻe he ngaahi kaungāmeʻa leleí hoʻo ngaahi filí, neongo kapau ʻoku ʻikai ke nau fili pehē.
Kae fēfē kapau ʻoku ʻikai ke taʻofi hono fai ʻe hao kaungāmeʻa ʻa e meʻa ko ia ʻokú ne fakahohaʻasi koé, neongo ʻokú ke hoko ko ha faʻifaʻitakiʻanga lelei? Sai, ʻoku mahuʻinga foki ke tau manatuʻi he ʻikai lava ke ʻiloʻi ʻe ho ngaahi kaungāmeʻá ʻa hoʻo fakakaukaú. Ko e taimi ʻe niʻihi, he ʻikai ke nau fakatokangaʻi ʻoku ʻi ai honau ʻulungaanga ʻokú ne hohaʻasi koe. Hili ha kiʻi taimi siʻi, kapau ʻoku ʻikai ke ne taʻofi ia, ʻoku sai pē ia ke ke kole ange ʻi he angaʻofa mo fakaʻapaʻapa ke tuku ia.
ʻE lava ke ke hoko ko ha tākiekina lelei ki ho ngaahi kaungāmeʻá ʻi hoʻo fili ki he totonú, neongo pe ko e hā e ngaahi palopalema ʻoku feʻao mo ho ngaahi kaungāmeʻá. Te ke lava ʻo fakaafeʻi kinautolu ke fakahoko ha ngaahi ʻekitivitī fakafiefia, mo langaki moʻui. Kapau ʻokú ke fiefia ke fili ʻa e moʻoní, ʻe fakatokangaʻi ia ʻe he kakaí.
Fakamālohia ho Ngaahi Kaungāmeʻá
Naʻá ku fai ha lēsoni fekauʻaki mo e lea maʻá ʻi he Mutualé. ʻOku ou tui ʻoku ngāue, tautefito ki ha taha ʻo hoku ngaahi kaungāmeʻa leleí. Kuopau ke tau fuofua hoko ko e faʻifaʻitakiʻanga. Te tau lava ʻo lotu maʻa hotau ngaahi kaungāmeʻá mo maʻu e loto-toʻa ke talaange kiate kinautolu ʻi he taimi totonu, “Kātaki ʻoua ʻe lea ʻaki ha ngaahi lea kovi. ʻOku ou fakatukupaaʻi kimoutolu ke ʻoua te mou fai ha ngaahi lea taʻefakaʻapaʻapa he ʻahó ni.”
Tānite C., taʻu 19, Puepilā, Mekisikou
Lotu kimuʻa peá ke Talanoa mo Kinautolú
ʻUluakí, te u lotu kimuʻa pea u talanoa mo e tokotaha ko iá. Uá, te u lea kiate kinautolu ʻi he angaʻofa mo lelei, pea ʻoange ha ngaahi faleʻi hangē ko e fakaʻehiʻehi mei hono fakahoko ha meʻa ʻi he taimi ʻoku ʻita aí. ʻE tokoni foki ʻeku tā sīpinga kiate kinautolú, ke nau lea lelei ange.
Nitanisia B., taʻu 18, Kimipaniseke, Lepāpulika Fakatemokalati ʻo Kongokoó
ʻOku Maʻu ʻa e Haohaoá ʻi He Toutou Fai Maʻu Peé
Te u talaange ke nau lotua ha ivi mo ʻahiʻahi ke talanoa taʻekapekape pe fakaʻaongaʻi ha ngaahi lea taʻefeʻunga. Te u toe talaange foki ko hono fakamoleki ha fuʻu taimi lahi ʻi he keimi vitioó, ʻokú ne fakangatangata ʻenau ngaahi fetuʻutaki mo e fāmilí mo e ngaahi kaungāmeʻá, pea ʻe lava ke nau taʻofi ia ʻaki e fakahoko ha ngaahi ʻekitivitī lelei mo ʻaongá. Kapau te nau ʻilo ʻoku nau fakahoko ha fehalaaki, ʻe lava ke nau lotua ha ivi mo hokohoko atu hono toutou fakahokó he ʻoku hoko e haohaoá ʻi hono toutou fakahokó.
ʻIsioma O., taʻu 17, ʻApaia, Naisīlia
Fakahā Ange ʻa e Ngaahi Meʻa Lelei Ange Te Nau Lava ʻo Faí
Tokoniʻi kinautolu ke nau fakatokangaʻi ʻoku ʻi ai ha ngaahi meʻa lelei ange te nau lava ʻo fai kae ʻikai ko hono valokiʻi kinautolu. Fakaafeʻi kinautolu ke fakahoko ha ngaahi ʻekitivitī fakatupulaki mo fiefia fakataha mo koe, pea poupouʻi kinautolu ke nau fai ha ngaahi tōʻonga moʻui ʻoku ʻaonga angé ʻo hangē ko e ako ke tā ha meʻalea, vaʻinga mo e ngaahi tokouá, pe tokoniʻi kinautolu ʻi ʻapi.
ʻEletā Kopape, taʻu 19, mo ʻEletā ʻOloleti, taʻu 19, Misiona Siaina Hongo Kongo
Tākiekina Kinautolu ki he Leleí
He ʻikai ke tau lava ʻo mapuleʻi e tōʻonga ʻa e kakai kehé, ka te tau lava ʻo tokoni ʻaki hono tākiekina kinautolu ki he leleí. Te tau lava ʻo moʻui ko ha faʻifaʻitakiʻanga lelei, anga faka-Kalaisi pea tokoniʻi ʻa kinautolu ʻoku tau feohí ke nau haʻu kia Kalaisi. Kapau ʻoku fai ‘e hotau ngaahi kaungāmeʻá ha ngaahi fili hala, te tau lava ʻo fokotuʻu ange ha ngaahi fili lelei ange mo fakahaaʻi ʻa e meʻa ʻoku tau ʻiloʻi ʻoku totonu mo moʻoní, ʻo fakafou ʻi heʻetau ngaahi leá mo ʻetau ngaahi ngāué.
Mōsaia M., taʻu 17, ʻIutā, USA
Maʻu ha “Hina Fakapapau”
Ko e founga pau ʻe taha te u lava ʻo tokoni ai ki hoku ngaahi kaungāmeʻá ke taʻofi e kapekapé ko hono ʻai ha “hina fakapapau”, pea ko e taimi kotoa pē ʻoku kapekape ai ha taha, kuo pau ke nau fakahū ha sēniti ki he foʻi hiná. Te u lava ʻo tokoni ke poupouʻi hono taʻofi ʻo e keimi vitiō tōtuʻá ʻo kapau te u fakaafeʻi hoku ngaahi kaungāmeʻá ki he kemi ʻa e toʻu tupú, ngaahi polokalama ʻa e Siasí, mo e ngaahi ʻekitivitī fakafiefia kehé. Te u lava foki ʻo fakafeʻiloaki kinautolu ki ha kakai foʻou ʻa ia te nau tokoniʻi kinautolu ke nau fakasōsiale mo longomoʻui fakatouʻosi.
ʻOueni P., taʻu 13, Hauaiʻi, USA
Ko Hono Tokangaʻi ʻo e Niʻihi Kehé
Ko ʻeku hoko ko ia ko ha faʻifaʻitakiʻanga leleí, ko e meʻa mahuʻinga taha ia te u lava ʻo fai koeʻuhí, ko hono tokoniʻi ko ia ha taha ke taʻofi ha ʻulungaanga kovi lolotonga ʻeku fai ʻa e meʻa tatau peé, ʻoku ʻikai ko ha ʻuhinga lelei ia. He ʻikai ke nau tali ʻeku faleʻí pe toʻo fakamātoato ʻeku ngaahi fakakaukaú. ʻOku ou lava foki ʻo tokoniʻi hoku ngaahi kaungāmeʻá ʻaki hono fakamatalaʻi ange e ʻuhinga ʻoku ʻikai ke u ongoʻi fiemālie ai ʻi honau ʻulungāngá. Kapau ʻoku ʻikai taau ʻenau leá, ʻe lava ke u tokoni ke nau ʻilo ʻa e ongo ʻoku maʻu ʻe he kakaí ʻi heʻenau fakaʻaongaʻi e faʻahinga lea kovi ko iá.
ʻAlehanitulā., taʻu 17, Sihuahua, Mekisikou
Lotú
Te ke lava ʻo lotu maʻanautolu ke taʻofi e kapekapé pe taʻofi e keimi ʻo tōtuʻá. He ʻikai teitei fakamamahi ʻa e lotú.
Sosiua L., taʻu 14, ʻOlikoni, USA