Mensahe sa Unang Kapangulohan
Kanunay Mohinumdom Kaniya
Ni Presidente Henry B. Eyring
Unang Magtatambag sa Unang Kapangulohan
Inyo bang mahunahunaan uban nako si propeta Moroni nga misulat sa katapusang mga pulong sa Basahon ni Mormon diha sa mga palid nga bulawan? Nag-inusara siya. Nakita niya ang iyang nasud, ang iyang katawhan, ug ang iyang pamilya nga napukan. Ang yuta “usa ka panghitabo” sa gubat (Mormon 8:8). Apan siya dunay paglaum, kay nakita niya ang atong panahon! Ug sa tanang butang nga iya untang masulat, iya kitang gidapit sa paghinumdom (tan-awa sa Moroni 10:3).
Si Presidente Spencer W. Kimball (1895–1985) ganahang magtudlo nga ang labing importante nga pulong sa diksyonaryo mao ang hinumdumi. Tungod kay mihimo kita og mga pakigsaad ngadto sa Dios, miingon siya, “ang atong labing dako nga panginahanglan mao ang paghinumdom” niini.1
Makita ninyo ang pulong nga hinumdumi sa tibuok kasulatan. Sa dihang gitambagan ni Nephi ang iyang mga igsoon, kasagaran gidapit niya sila sa paghinumdom sa mga pulong sa Ginoo ug sa paghinumdom kon giunsa pagluwas sa Dios ang ilang mga katigulangan (tan-awa sa 1 Nephi 15:11, 25; 17:40).
Sa iyang mahinungdanong pakigpulong sa pagpanamilit, gigamit ni Haring Benjamin ang pulong nga hinumdumi sa pito ka higayon. Naglaum siya nga mahinumduman sa iyang katawhan “ang pagkahalangdon sa Dios … ug ang iyang pagkamaayo ug ang pagkamainantuson” ngadto kanila (Mosiah 4:11; tan-awa usab sa 2:41; 4:28, 30; 5:11–12).
Sa dihang gipasiugdahan sa Manluluwas ang sakrament, gidapit Niya ang Iyang mga disipulo sa pag-ambit sa mga simbolo “sa paghandum” sa Iyang sakripisyo (Lucas 22:19). Sa matag pag-ampo sa sakrament nga madungog ninyo ug nako, ang pulong nga kanunay mag-una sa pulong nga mohinumdom (tan-awa sa D&P 20:77, 79).
Ang akong mensahe usa ka pagdapit, gani usa ka pangamuyo, sa paghinumdom. Ania ang tulo ka sugyot mahitungod kon unsay inyong mahinumduman kada semana kon moambit kamo sa sagradong mga simbolo sa sakrament. Hinaut nga makatabang kini kaninyo, sama nga kini nakatabang kanako.
Hinumdumi si Jesukristo
Una, hinumdumi ang Manluluwas. Hinumdumi kon kinsa Siya samtang dinhi pa sa yuta, kon giunsa Niya sa pagpakigsulti sa uban, ug giunsa Niya sa pagpakita ang kamabination diha sa Iyang mga binuhatan. Hinumdumi kon kinsay Iyang gigahinan sa Iyang panahon ug unsay Iyang gitudlo. Ang Manluluwas “[n]agpangadto-adto sa paghimog mga kaayohan” (Mga Buhat 10:38). Gibisitahan Niya ang mga masakiton. Mapasaligon Siya sa pagbuhat sa kabubut-on sa Iyang Amahan.
Labaw sa tanan, mahinumduman nato ang dakong bugti nga Iyang gibayaran, tungod sa Iyang gugma alang kanato, sa pagtangtang sa mansa sa atong mga sala. Sa paghinumdom nato Kaniya, ang atong tinguha sa pagsunod Kaniya molambo. Gusto kitang mahimong mas mabination, mas mapasayluon, ug mas andam sa pagtinguha sa kabubut-on sa Dios ug sa pagbuhat niini.
Hinumdumi Kon Unsay Angay Ninyong Buhaton nga Mas Maayo
Lisud ang paghunahuna bahin sa Manluluwas—sa Iyang kaputli ug kahingpitan—nga dili usab maghunahuna kon unsa kita ka masalaypon ug ka imperpekto kon itandi. Mihimo kita og mga pakigsaad nga motuman sa Iyang mga sugo, apan kanunay kitang mapakyas sa pagkab-ot niining taas nga sumbanan. Apan ang Manluluwas nasayud nga mahitabo kini, mao nga gihatagan kita Niya sa ordinansa sa sakrament.
Ang sakrament naggikan sa buluhaton sa Daang Tugon nga paghalad og mga sakripisyo, nga naglakip sa pagkumpisal sa sala (tan-awa sa Levitico 5:5). Wala na kita magsakripisyo og mga hayop, apan matugyan gihapon nato ang atong mga sala. Gitawag kini sa kasulatan og sakripisyo sa “usa ka masulub-on nga kasingkasing ug usa ka mahinulsulon nga espiritu” (3 Nephi 9:20). Adto sa sakrament nga dunay mahinulsulon nga kasingkasing (tan-awa sa D&P 59:12; Moroni 6:2). Sa pagbuhat ninyo sa ingon, makabaton kamo og kapasayloan sa mga sala ug dili kamo mahisalaag gikan sa dalan paingon og balik ngadto sa Dios.
Hinumdumi ang Pag-uswag nga Inyong Nahimo
Sa pagsusi ninyo sa inyong kinabuhi atol sa ordinansa sa sakrament, unta ang inyong mga hunahuna makasentro dili lamang sa mga butang nga nasayop ninyo pagbuhat apan sa mga butang usab nga nabuhat ninyo sa sakto—mga gutlo sa dihang gibati ninyo nga ang Langitnong Amahan ug ang Manluluwas nahimuot kaninyo. Mahimo man gani nga mogahin kamo og panahon atol sa sakrament nga mohangyo sa Dios sa pagtabang kaninyo nga makakita niining mga butanga. Kon inyong buhaton, mosaad ko nga kamo dunay bation. Mobati kamo og paglaum.
Sa dihang gibuhat nako kini, ang Espiritu mipasalig nako nga samtang layo pa gihapon ko sa pagkaperpekto, mas maayo ko karon kay sa unsa ko kagahapon. Nakahatag kini kanako og pagsalig nga, tungod sa Manluluwas, mahimo kong mas maayo pa gani ugma.
Ang kanunay usa ka taas nga panahon, ug nagpasabut kini og daghang naka-focus nga paningkamot. Nasayud kamo gikan sa kasinatian kon unsa kalisud ang paghunahuna og maayo sa usa ka butang sa tanang higayon. Apan bisan unsa pa kamo kamaayo sa pagtuman sa inyong saad nga sa kanunay mohinumdom Kaniya, sa kanunay Siya nahinumdom kaninyo.
Ang Manluluwas nasayud sa inyong mga hagit. Nasayud Siya kon unsay bation nga dunay mga kabalaka sa kinabuhi nga mohasul kaninyo. Nasayud Siya kon unsa kadinalian ang inyong panginahanglan sa panalangin nga moabut gikan sa kanunay nga paghinumdom Kaniya ug sa pagsunod Kaniya—“nga [kamo] unta sa kanunay makabaton sa iyang Espiritu uban [kaninyo]” (D&P 20:77; emphasis gidugang).
Mao nga, giabi-abi kamo Niya og balik sa lamesa sa sakrament kada semana, sa makausa pa magtanyag kaninyo sa kahigayunan sa pagsaksi sa Iyang atubangan nga kamo sa kanunay mohinumdom Kaniya.