Padayon sa Pagpaningkamot!

Imahe

keep trying

Ang akong mga ginikanan mipasakop sa Simbahan sa bata pa ko. Anaa mi sa gamayng branch sa Australia. Ang akong inahan maoy nagtugtog sa piano sa simbahan. Apan makatugtog siya og pipila lang ka himno. Nagkat-on sab ko og piano. Dihang siyete anyos na ko, ang branch president mihangyo kanako sa pagtugtog diha sa simbahan.

Dihang mitugtog ko sa piano, nagkasayop-sayop ko. Ug dihang nasayop ko, mihilak ko. Naulaw kaayo ko ug nakuyawan. Apan nagpadayon ko pagpraktis. Gusto kong motugtog sa mga himno sa maayong paagi. Karon ganahan na kong motugtog og piano! Makatugtog na ko sa tanang himno. Sa akong misyon sa New Zealand, nagserbisyo ko sa laing gamay nga branch. Wala silay bisan usa nga makatugtog sa piano. Mao nga ako ang mitugtog sa organ ug sa piano sulod sa usa ka tuig. Ang pagpaningkamot nga mabuntog ang akong kahadlok usa ka panalangin alang kanako. Nakatugot kini nga makapanalangin ko sa uban.

Naglisud pud ko sa pag-istorya sa gamay pa ko. Nagkanga-kanga ko. Lisud ang pagpakigbahin sa akong pagpamatuod sa atubangan sa tanan. Usahay kon sulayan nako sa pag-istorya, igo lang hinoon kong mohilak. Gihatagan ko og mga panalangin sa priesthood aron makatabang nako. Ang akong mama ug papa midasig nako og maayo. Sa katapusan napanalanginan ko nga makaistorya sa mas klaro ug masaligong paagi.

Makulbaan lang gihapon ko. Ang paglakaw paingon sa atubangan aron mamulong atol sa kinatibuk-ang komperensya kulba kaayo! Apan dunay ingon ka gamhanang espiritu didto. Mibati ko nga nadasig ug nakalma. Nindot kaayo kadto.

Kon manggiulawon kamo o nagkalisud sa pag-istorya, padayon sa pagpaningkamot. Bisan kon nagpadayon kamong nanglimbasug, kinahanglan namong madungog kon unsay inyong ikasulti. Makapanalangin kamo og daghang tawo pinaagi sa mga butang nga kamo lamang ang makasulti!