Mga Pangutana ug mga Tubag
Unsaon nako sa paghangyo ang akong mga higala sa dili pagsulti og butang nga dili mabination o dili tukma bahin sa uban?
Ang pagpanglibak, ang dili mabinationg mga pulong, kalaw-ay—tingali nadungog na ninyo kining tanan samtang naglakaw sa mga hallway sa inyong eskwelahan. Usahay ang inyong mga higala mao ang naapil, ug posible nga dili mo komportable ug dili sigurado kon unsay buhaton, pero makahimo mo og kalainan pinaagi sa pagkahimong maayo nga ehemplo.
Bisan kon dili makalingaw nga manalipod batok sa uban, hinumdumi nga ang “pasipala, malaw-ay, o bastos nga sinultihan o linihokan, ingon man usab sa imoral nga mga komedya, makapasilo ngadto sa Ginoo ug sa uban.”1 Bisan kon gisulti nga kinomedya, ang dili mabination nga mga pulong makapasakit gihapon.
Kon ang inyong mga higala mosulti og dili angay o dili mabination nga mga pulong bahin sa uban, “sa mabination nga paagi awhaga sila sa pagpili og ubang mga pulong. Kon magpadayon sila, sa binuotan nga paagi palayo o ilisi ang hilisgutan.”2 Ipasabut nga mituo kamo nga ang matag tawo anak sa Dios ug kinahanglan nga respetuhon sa tukmang paagi. Pilia nga mahimong supportive nga higala sa tanan imbis nga mahimong kaaway kinsa nagtamay ug nagdaut sa uban. Ang inyong lig-on nga ehemplo makatabang nga modelo alang sa inyong mga higala.
Ang Alang sa Kalig-on sa mga Kabatan-onan nagtudlo nga ang “limpyo ug intelehente nga pinulongan maoy ebidensya sa usa ka maalamon ug maayo nga hunahuna.”3 Himoa nga ang inyong mga pulong magpakita sa inyong mga gituohan, ug ang Espiritu magpabilin kaninyo aron mohatag og giya atol niining lisud nga mga kahimtang.
Ug barug nga masaligon—ang tinuod nga mga higala morespeto ninyo tungod sa inyong desisyon nga mogamit og limpyo, makapadasig nga pinulongan nga naghatag og gibug-aton sa positibong mga kinaiya sa uban.
Tabangi ang Usag Usa nga Magpabiling Positibo
Ang akong mga higala ug ako dunay mga pulseras, ug matag higayon nga usa kanamo mosulti og dili maayo bahin sa laing tawo, among bitaron ang pulseras sa nagsulti. Usa kini ka maayo nga kanunayng pahinumdom sa pagpabiling positibo sa among mga hunahuna ug mga pulong.
Caroline J., nag-edad og 18, Utah, USA
Pangayo og Tabang sa Dios
Ang pag-ampo makatabang kaninyo nga makakuha og kalig-on gikan sa Dios aron masayud kon unsaon sa pagpakig-istorya sa uban. Una, hangyoa ang Ginoo aron masayud kon unsay isulti ngadto sa inyong mga higala. Hangyoa usab Siya nga tabangan ang inyong mga higala nga makasabut sa kaimportante sa pagtan-aw sa tanan isip pinalangga nga mga anak sa Langitnong Amahan. Hatagi og gibug-aton ang kaimportante sa pagtan-aw sa pinakamaayo diha sa mga tawo ug sa dili pagsulti og dautan nga mga butang bahin kanila.
Victória Kércia M., nag-edad og 19, Piauí, Brazil
Hangupa ang mga Kalainan uban sa Gugma
Ang akong mga higala kinahanglang masayud gayud nga tungod kay matag usa kanato dunay lain-laing mga kalig-on, makabenepisyo kita sa usag usa. Bisan pa man sa pagkadili hingpit sa mga tawo, kinahanglan gayud kitang dunay dugang gugma alang kanila, ug kinahanglan gayud usab kitang motuo sa gahum sa kausaban nga makita diha sa maulaong sakripisyo sa Manluluwas.
Esther M., nag-edad og 19, Mbujimayi, Democratic Republic of the Congo
Magmahimong Direkta
Mahimo ra ninyong sultihan ang inyong mga higala sa nindot nga paagi, “Uy, undanga kana. Wala ko makauyon niini,” o “Palihug ayaw og sulti og sama niana. Bastos kana.” Labaw sa tanan, ang usa sa duha ka dagkong mga sugo mao ang “higugmaa ang imong silingan sama sa imong kaugalingon” (Mateo 22:39).
Clayton P., nag-edad og 14, Arizona, USA
Usba ang Ilang Panglantaw
Mahimo ra ninyo silang sultihan nga dili husto ang ilang gihimo ug nga kinahanglan silang mosulay sa paglipay og tawo imbis mopaguol. Mahimo gani nimo silang pangutan-on unsay ilang bation kon sila pa ang nakadawat sa dili maayong mga istorya gikan sa laing mga tawo. Tabangi sila nga makita ang sitwasyon gikan sa laing panglantaw. Pinaagi sa pagtabang sa ubang tawo nga mahimong mas maayo, makahimo kamo sa pagbati sa Espiritu nga mas kanunay, ug ang Ginoo mopanalangin kaninyo tungod sa inyong matarung nga mga aksyon.
Darren O., nag-edad og 15, Utah, USA
Pagbaton og Kaisug
Sama nila ni Esther, Joseph Smith, Jose sa Ehipto, ug sa daghan pang tawo sa kasulatan, makabaton kamo og kaisug nga mapahunong ang inyong mga higala sa pagsulti og dili tukma bahin sa uban. Nakasinati kog sama nga sitwasyon, ug duna koy kaisug nga makig-istorya sa akong mga higala sa mahigugmaon ug masinabtunong paagi. Sa katapusan, gidawat nila ug nakasabut kon unsa kaimportante ang paggamit og putli ug angay nga pinulongan! Gawas sa pagbasa sa mga kasulatan ug pag-ampo, ang pagpuasa makatabang og dako niadto nga mga sitwasyon. Pag-ampo ug pangayo uban sa pagtuo nga ang atong Langitnong Amahan mohatag kaninyo og kaisug sa pagsulti ug pagtandog sa kasingkasing sa inyong mga higala.
Paola H., nag-edad og 17, San Salvador, El Salvador
Pagkahimong usa ka Ehemplo
Ang pinakamaayong paagi sa pagbuhat niini mao ang pagpakita og ehemplo. Paningkamuti ang pagsulti og maayo ug positibong mga butang bahin ni bisan kinsa nga giistoryahan. Matingala na lang mo kon unsa kapaspas mausab ang panag-istoryahanay.
Elder Eads, nag-edad og 24, Korea Seoul South Mission
Ipasabut ang Negatibong mga Aspeto
Sultihi ang inyong mga higala kon unsa kadaghan sa positibong mga kasinatian ug mga inter-aksyon sa ubang tawo ang wala nila masinati. Ipasabut nga ang pagpamalikas dili maayo tungod kay makapalayo kini kaninyo sa ubang tawo ug makadaut sa hunahuna. Dugang pa, likayan kamo sa buotang mga tawo kon mogamit mo og bati nga pinulongan.
Elisa Ferreira S., nag-edad og 16, Minas Gerais, Brazil