Ang Plano sa Kalipay
Kolori kining mga hulagway aron makakat-on mahitungod sa plano sa Langitnong Amahan sa kalipay alang kaninyo! Mahimo usab ninyo kining guntingon, ipapilit ang mga likod sa mga hulagway, ug i-staple ang mga kilid aron makahimo og usa ka booklet.
Sa wala pa ko matawo, nagpuyo ko isip espiritu uban sa akong Langitnong Amahan. Gisultihan ko sa Langitnong Amahan nga Siya adunay plano nga makatabang kanako nga makakat-on ug molambo. Nalipay kaayo ko!
Miboluntaryo si Jesukristo nga mahimo nakong Manluluwas. Mianhi Siya sa yuta ug nagpakita og perpektong ehemplo alang kanako. Gibayaran Niya ang akong mga sala. Nasayud Siya kon unsay akong mga kalisdanan ug makatabang kanako. Gimahal nako si Jesus!
Natawo ko niining matahum nga yuta. Nakaangkon ko og lawas! Ang akong espiritu ug lawas magtinabangay samtang nagkat-on ko. Kada adlaw, naningkamot ko nga mosunod kang Jesus pinaagi sa pagkahimong mabination.
Gisunod nako si Jesus pinaagi sa pagpabunyag. Mosaad ko nga motuman sa mga sugo. Misaad ang Langitnong Amahan nga tabangan ko sa Espiritu Santo. Kon makahimo ko og sayop, maghinulsol ko ug maningkamot nga mahimong mas maayo sa sunod nga higayon. Sa ingon niini ako makakat-on ug molambo!
Bisan pa kon layo ko sa akong Langitnong mga Ginikanan ug ni Jesukristo, mahimo gihapon kong mobati nga duol Kanila. Makaampo ko sa Langitnong Amahan bisan unsang orasa. Makabasa ko sa mga kasulatan. Usa ka adlaw, makaadto ko sa templo, diin makakat-on ko og dugang mahitungod sa plano sa Dios alang kanako. Usa kini ka malinawon, malipayon nga dapit.
Ang kamatayon usa lamang ka laing parte sa kinabuhi. Kon mamatay ko, ang akong lawas magpabilin sa yuta ug ang akong espiritu moadto sa kalibutan sa mga espiritu. Makauban nako ang akong pamilya ug mga higala.
Sa umaabut ang akong lawas ug espiritu magkahiusa pag-usab. Akong makita si Jesus pag-usab! Makapuyo ko uban sa akong pamilya ug sa Langitnong mga Ginikanan sa kahangturan. Mapasalamaton kaayo ko niini nga plano sa kalipay!