ʻEletā Brook P. Hales

ʻI he kei taʻu valu pe hiva ʻa ʻEletā Brook P. Hales, naʻá ne kau atu ki ha houalotu fakamoʻoni naʻe tokangaʻi ʻe heʻene tamaí he ko ia naʻe pīsopé. Naʻe fakaafeʻi ʻe heʻene tamaí e haʻofangá ke fai ʻenau fakamoʻoní, pea naʻe fai ʻe he meimei taha kotoa ai ʻenau fakamoʻoní. Naʻe manatu ʻa ʻEletā Heili ʻo pehē, “Mahalo ko e fuofua taimi ia ne u ongoʻi ai hono fakamoʻoniʻi kiate au ʻe he Laumālié ʻa hono moʻoni ʻo e ongoongoleleí.”

Talu mei ai mo e tā tuʻo lahi ʻene ongoʻi e fakamoʻoni ko iá, tautautefito ki he taimi naʻá ne kei hoko ai ko e sēkelitali ki he Kau Palesitenisī ʻUluakí, talu mei he 2008. ʻI he taimi naʻe hikinimaʻi ai ʻa Palesiteni Thomas S. Monson ko ha palōfita mo e Palesiteni ʻo e Siasí, pea pehē ki he taimi naʻe hikinimaʻi ai mo Palesiteni Russell M. Nelson, naʻá ne mātā tonu ai e “hilifaki hifo e pulupulu fakaepālofitá ʻi he ongo tangatá ni, pea ne u ʻiloʻi taʻe toe veiveiua kuo fili kinaua mo uiuiʻi ke hoko ko e Palesiteni ʻo e Siasí ʻi hona takitaha taimi.”

Naʻe uiuiʻi ʻa ʻEletā Heili ko ha Fitungofulu Taki Māʻolunga ʻi he ʻaho 17 ʻo Mē 2018, pea hikinimaʻi ia ʻi he ʻaho 6 ʻo ʻOkatopá. Te ne kei hokohoko atu pē ko e sēkelitali ki he Kau Palesitenisī ʻUluakí.

Naʻe fāʻeleʻi ʻa ʻEletā Heili ʻi Ogden, Utah, USA, ʻi he ʻaho 7 ʻo ʻEpeleli 1956, kia Klea mo Glenn Phillip Hales, pea naʻá ne maʻu hono mataʻitohi he ngāue fakapangikeé mo e meʻa fakapaʻangá he 1980 mei he Weber State College (ui he taimí ni ko e Weber State University). Hili ʻene ʻosi mei he akó, naʻá ne ngāue ʻi he ngāue fakakomēsiale ʻa e pangikeé pea mo e Tafaʻaki Paʻanga mo e Ngaahi Lekooti ʻa e Siasí. Naʻá ne mali mo Denise Imlay Hales ʻi he 1981, pea ʻoku ʻi ai haʻana fānau ʻe toko fā. Kuo ngāue fakafaifekau taimi kakato ʻa ʻEletā Heili ʻi he Misiona France Paris, peá ne hoko ko ha tokoni ʻi he kau pīsopelikí, kulupulita taulaʻeiki lahi, pīsope, palesiteni fakasiteiki, tā ʻōkani ʻa e lakanga fakataulaʻeikí, faiako Lautohi Faka-Sāpate mo ha faisila he temipalé.

Naʻe ʻikai fai ʻe ʻEletā Heili ʻene fakamoʻoní he ʻaho ko iá heʻene kei siʻí. Kae talu mei ai mo e tupulaki ʻo mālohi ange ʻene fakamoʻoní. Naʻá ne pehē, “Kuo toe fakafoki mai e ongoongolelei ʻo Sīsū Kalaisí ʻi he Palōfita ko Siosefa Sāmitá, ʻoku moʻoni e Tohi ʻa Molomoná, ʻoku haohaoa e ʻofa ʻa e ʻOtuá kiate kitautolu pea ʻokú Ne vēkeveke mai ke tāpuekina kitautolu, ko hotau Fakamoʻuí ʻa Sīsū pea ʻoku tau monūʻia ke maʻu e takaua maʻu pē ʻo e Laumālie Māʻoniʻoní ʻi heʻetau moʻui taau ke maʻu iá.”