Ko ho Lotó Ke ke Moʻui?

Hili ha ngaahi māhina siʻi ʻo e ngāue fakafaifekau homa foha siʻisiʻi tahá, ʻi heʻene fakaʻosiʻosi mo hono hoa fakafaifekaú haʻana ako, naʻe ongoʻi ʻe homa fohá ha langa hono ʻulú. Naʻá ne ongoʻi mātuʻaki faikehe ʻaupito; ʻuluakí, naʻe ʻikai ke ne toe mapuleʻi hono nima toʻohemá; pea ʻikai toe ngaue mo hono ʻeleló. Naʻe kamata ke tāupe e tafaʻaki toʻohema ʻo hono matá. Naʻe faingataʻa ke toe lea. Naʻá ne ʻilo naʻe ʻi ai ha meʻa naʻe fehalaaki. Ko e meʻa naʻe ʻikai ke ne ʻiloʻí naʻá ne lolotonga pā-kālava lahi ʻi ha feituʻu ʻe tolu ʻi hono ʻutó. Naʻe kamata ke tō mai ʻa e ilifiá ʻi he kamata ke mamatea fakafahaʻi tahá. Ko e vave ange hono fai ha tokanga ki ha taha pā-kālavá ʻe lava ke ʻaonga lahi ia ki heʻene fakaakeaké. Naʻe ngāue vave leva hono hoa faifekau faivelengá. Hili ʻene telefoni ki he 911, naʻe faingāue leva ki ai. Ko e fakaofó, he naʻe miniti pē nima ʻa e meʻalele falemahakí mei hona ʻapí.

Hili hono leleakiʻi homa fohá ki he falemahakí, ne vakaiʻi vave leva ʻe he kau ngāue fakafaitoʻó e tuʻunga naʻá ne ʻi aí pea nau pehē ʻoku totonu ke nau ʻoange ha faitoʻo ki homa fohá te ne ala liliu e ngaahi nunuʻa mamatea ʻo e pā-kālavá, hili ha vahaʻa taimi.¹ Ka neongo ia, kapau naʻe ʻikai pā-kālava homa fohá, ʻe ʻi ai ha ngaahi nunuʻa kovi ʻo e faitoʻó, hangē ko e fā-noa e totó he ʻutó. Naʻe pau ke fili homa fohá. Naʻá ne fili ke ne tali e faitoʻó. Neongo ʻe fie maʻu ha ngaahi tafa lahi pea lau māhina ke moʻui kakato, ka naʻe iku toe foki homa fohá ʻo fakakakato ʻene ngāue fakafaifekaú, hili e mole atu ha ngaahi nunuʻa lahi ʻo e pā-kālavá.

Ko ʻetau Tamai Hēvaní ʻoku aoniu mo tokaimaʻananga. ʻOkú Ne ʻafioʻi ʻetau ngaahi fefaʻuhi fakaesinó. ʻOkú Ne ʻafioʻi ʻetau ngaahi mamahi fakaesino koeʻuhí ko e puké, mahakí, hoholó, fakatuʻutāmakí, pe uesia fakaesino ʻi hotau fāʻeleʻí. ʻOkú Ne ʻafioʻi ʻetau ngaahi fefaʻuhi fakaeloto ʻoku felāveʻi mo e loto hohaʻá, taʻelatá/ongoʻi tuenoa, loto mamahí, pe puke fakaʻatamaí. ʻOkú Ne ʻafioʻi e taha kotoa ne uesia ʻe he fakamaau taʻe-totonú pe kuo ngaohikovia. ʻOkú Ne ʻafioʻi hotau ngaahi vaivaí mo e fakahehemá mo e ngaahi ʻahiʻahi ʻoku tau fekuki mo iá.

ʻOku siviʻi kitautolu lolotonga e moʻui fakamatelié ke ʻiloʻi pe te tau fili ʻa e leleí kae ʻikai ko e koví. Ko kinautolu ʻoku nau tauhi ʻEne ngaahi fekaú, te nau nofo mo Ia “ʻi ha tuʻunga fiefia ʻoku ʻikai hano ngataʻanga.”² Kuo ʻosi foaki mai ʻe he Tamai Hēvaní ʻa e mālohi mo e ʻilo kotoa ki Hono ʻAlo ko Sīsū Kalaisí, ke tokoni ʻi heʻetau fakalakalaka ke hoko ʻo tatau mo Iá. ʻOku ʻikai ha puke fakaesino, fakaeloto, pe fakalaumālie ʻe taʻe-malava ke fakamoʻui ʻe Kalaisi.³

ʻOku fakamatala ʻe he folofolá ha ngaahi meʻa mana lahi mei he ngāue ʻa e Fakamoʻuí ʻi māmaní, naʻe ngāue ʻaki ai ʻe Sīsū Kalaisi hono mālohi fakalangí ke fakamoʻui kinautolu naʻe faingataʻaʻia fakaesinó.

ʻOku fakamatalaʻi ʻe he Kosipeli ʻa Sioné ʻa e talanoa ʻo ha tangata naʻe fekuki mo ha palopalema fakaesino ʻi ha taʻu ʻe 38.

“Ka kuo mamata ʻa Sīsū ki heʻene tokotó, ʻo ne ʻilo kuo fuoloa ʻene moʻuá, naʻe fehuʻi ia ki ai, Ko ho lotó ke ke moʻui?”

Pea tali ʻe he tangata vaivaí naʻe ʻikai ha taha ai ke tokoni, ʻi he taimi naʻá ne fie maʻu lahi taha aí.

“Pea tala ʻe Sīsū kiate ia, Tuʻu hake pea toʻo ho mohengá ʻo ʻalu.

Pea fakafokifā pē kuo moʻui ʻa e tangatá, ʻo ne toʻo hono mohengá, pea ʻalu.”⁴

Kātaki ʻo fakatokangaʻi e fekauʻaki ʻo e lōloa e faingataʻaʻia ʻa e tangatá—taʻu e 38—mo e vave hono fakamoʻui iá ʻi he kau pē ai ʻa e Fakamoʻuí. Ko e hoko e faifakamoʻuí “ʻi he taimi pē ko iá.”

ʻI ha taimi ʻe taha, naʻe ʻi ai ha fefine naʻe ʻau-toto ʻi ha taʻu ʻe 12, ʻa ia naʻe “fakaʻosi ʻe ia ʻene meʻa kotoa pē ki he kau faitoʻó, … naʻe haʻu ia ki hono tuʻá, ʻo ala ki he kapa ʻo hono kofú: pea [matuʻu] leva ʻene ʻau-totó. …

“Pea pehēange ʻe Sīsū, … Kuo ala ha taha kiate au: he ʻoku ou ʻilo kuo ʻalu ʻa e mālohí ʻiate au.

“Pea kuo ʻilo ʻe he fefiné kuo ʻikai lilo ia, [naʻá ne] … fakahā kiate ia ʻi he ʻao ʻo e kakaí kotoa pē … mo ʻene moʻui ai levá.”⁵

Naʻe akoʻi ʻe Kalaisi ʻi Heʻene ngāue fakafaifekaú, ʻokú Ne maʻu e mālohi ki he sino fakamatelié. ʻE ʻikai ke tau lava ʻo mapuleʻi e taimi ʻe fakamoʻui ai ʻe Kalaisi hotau ngaahi fokoutua fakamatelié. ʻOku hoko ʻa e fakamoʻuí ʻo fakatatau mo Hono finangaló mo e potó. Naʻe puke ha niʻihi ʻi he folofolá ʻo laulau taʻu; kae puke ha niʻihi ʻi heʻenau moʻuí kotoa. ʻE lava ʻe he ngaahi meʻa fakamamahi fakamatelié ʻo sivisiviʻi kitautolu mo fakaloloto ʻetau falala ki he ʻOtuá. Ka ko e taimi ʻoku tau tuku ai ʻa Kalaisi ke kau maí, te Ne fakaivia fakalaumālie maʻu pē kitautolu ke tau maʻu ha ivi lahi ange ke mafeia e ngaahi kavenga mafasiá.

Ko hono moʻoní, ʻoku tau ʻilo ko e ngaahi fokoutua, puke, pe tōnounou fakamatelie kotoa pē, ʻe fakamoʻui ia ʻi he Toetuʻú. Ko ha meʻaʻofa ʻeni ki he faʻahinga kotoa ʻo e tangatá tuʻunga ʻi he Fakalelei ʻa Sīsū Kalaisí.⁶

ʻE lava ke mahulu ange e fakamoʻui ʻa Sīsū Kalaisí ʻi hotau sino fakamatelié. Te Ne lava foki ʻo fakamoʻui hotau laumālié. ʻOku tau ako ʻi he folofolá kotoa ʻa e anga hono tokoniʻi ʻe Kalaisi ʻa kinautolu naʻe vaivai honau laumālié pea fakamoʻui kinautolú.⁷ ʻI heʻetau fakakaukau ki he ngaahi aʻusia ko ʻení, ʻoku tupulaki leva ʻetau ʻamanaki leleí mo ʻetau tui ki he mālohi ʻo e Fakamoʻuí ke tāpuekina ʻetau moʻuí. ʻE lava ke liliu ʻe Sīsū Kalaisi hotau lotó, fakamoʻui kitautolu mei he ngaahi nunuʻa ʻo e fakamaau taʻetotonú pe ngaohikovia te tau ala fouá, pea fakamālohia ʻetau lava ke makātakiʻi ʻa e molé mo e loto mamahí, pea ʻomi ha nonga ke tokoni ke tau kātakiʻi ʻa e ngaahi faingataʻa ʻi heʻetau moʻuí, ʻo faitoʻo fakaeloto kitautolu.

ʻE toe lava foki ʻe Kalaisi ke fakamoʻui kitautolu ʻi he taimi ʻoku tau faiangahala aí. ʻOku tau faiangahala ʻi he taimi ʻoku tau maumauʻi ʻiloʻilopau ha taha ʻo e ngaahi fono ʻa e ʻOtuá.⁸ ʻI he taimi ʻoku tau faiangahala aí, ʻoku taʻemaʻa leva hotau laumālié. He ʻikai ke hū ha meʻa taʻemaʻa ki he ʻao ʻo e ʻOtuá.⁹ “Ko e maʻa mei he angahalá [ko e] fakamoʻui fakalaumālié ia.”¹⁰

ʻOku ʻafioʻi ʻe he ʻOtua ko e Tamaí te tau faiangahala, ka kuó Ne teuteu ha founga ke huhuʻi ai kitautolu. Naʻe akoʻi mai ʻe ʻEletā Lini G. Lōpini: “Ko e fakatomalá, ʻoku ʻikai ko ha palani talifaki ia [ʻa e ʻOtuá] telia tokua naʻa tau tōnounou. Ko ʻEne palaní ʻa e fakatomalá, he naʻá Ne ʻafioʻi te tau tōnounou.”¹¹ ʻI he taimi ʻoku tau faiangahala aí, ʻoku tau maʻu ha faingamālie ke fili ʻa e leleí pe koví. ʻOku tau fili ʻa e leleí ʻi heʻetau fakatomala hili ʻetau faiangahalá. Tuʻunga ʻia Sīsū Kalaisi mo ʻEne feilaulau fakaleleí, ʻe lava ke huhuʻi kitautolu mei heʻetau ngaahi angahalá pea fakafoki ki he ʻao ʻo e ʻOtua ko e Tamaí, kapau te tau fakatomala. ʻOku ʻikai fakapalataha pē ʻa e fakamoʻui fakalaumālié—ka ʻoku fie maʻu ki ai e mālohi huhuʻi ʻo e Fakamoʻuí mo e fakatomala fakamātoato ʻa e taha faiangahalá. Ko kinautolu ʻoku nau fili ke ʻoua ʻe fakatomalá, ʻoku nau fakasītuʻaʻi e fakamoʻui ʻoku fai ʻe Kalaisí. ʻOku hangē ki he niʻihi ko ʻení ia naʻe ʻikai fai ha huhuʻí.¹²

ʻI heʻeku talatalaifale mo ha niʻihi ʻoku feinga ke fakatomalá, kuó u fakatumutumu ʻi he faingataʻa ke fai ʻa e ngaahi fili totonú ʻe he kakai naʻe moʻui angahalá. ʻOku mavahe ʻa e Laumālie Māʻoniʻoní meiate kinautolu, pea ʻoku nau faʻa faingataʻaʻia ke fai e ngaahi fili te ne ʻomi ke nau ofi ange ai ki he ʻOtuá. Te nau fāinga ʻo laumāhina pea naʻa mo ha ngaahi taʻu, ongoʻi mā pe manavasiʻi ki he ngaahi nunuʻa ʻo ʻenau ngaahi angahalá. ʻOku nau faʻa ongoʻi he ʻikai ke nau teitei liliu pe maʻu ha fakamolemole. Kuó u faʻa ongona haʻanau pehē ʻoku nau ilifia naʻa ʻilo ʻe kinautolu ʻoku nau ʻofa aí e meʻa kuo nau faí, he ʻikai ke nau toe ʻofa ange pe liʻaki kinautolu. ʻI he taimi ʻoku nau muimui ai ʻi he faʻahinga fakakaukau ko ʻení, ʻoku nau pehē leva ke nau fakalongolongo pē pea fakatoloi ʻenau fakatomalá. ʻOku nau maʻu hala tokua ʻe lelei ange ke ʻoua ʻe fakatomala he taimí ni ke ʻoua te nau toe uesia e niʻihi ʻoku nau ʻofa aí. Ko ʻenau fakakaukaú tokua ʻoku lelei ange ke mamahi hili e moʻui ko ʻení, ʻi haʻanau foua e hala ʻo e fakatomalá he taimí ni. Kāinga, ʻoku ʻikai teitei hoko ko ha fakakaukau lelei ke fakatoloi hoʻomou fakatomalá. ʻOku faʻa fakaʻaongaʻi e he filí ʻa e ilifiá pe manavasiʻí ke taʻofi kitautolu mei he ngāue taimi tonu ki heʻetau tui kia Sīsū Kalaisí.

ʻI he taimi ʻoku fehangahangai ai e niʻihi ʻoku tau ʻofa aí pea mo e moʻoni ʻo e tōʻonga angahalá, neongo te nau ongoʻi loto mamahi fau, ka ʻoku nau faʻa fie tokoniʻi e tokotaha fakatomala moʻoní ke liliu mo fakalelei mo e ʻOtuá. ʻIo, ʻoku vave ange ʻa e fakamoʻui fakalaumālié ʻi he taimi ʻoku vetehia ai e taha faiangahalá mo feohi mo kinautolu ʻoku nau ʻofa ai mo tokoni ke siʻaki ʻenau angahalá. Kātaki ʻo manatuʻi ʻoku māfimafi ʻa Sīsū Kalaisi ʻi he founga ʻokú Ne fakamoʻui foki ai mo e taha tonuhia ka ʻoku uesia ʻi he angahalá, ʻoku tafoki kiate Iá.¹³

Naʻe pehē ʻe Palesiteni Poiti K. Peeka: “ʻOku maumau hotau laumālié ʻi he taimi ʻoku tau fai ai ha ngaahi fehalaaki pe faiangahalá. Ka ʻoku ʻikai tatau ia mo hotau sino fakamatelié, he ko e taimi ʻoku kakato ai e fakatomalá, ʻoku ʻikai ha toe [piki] ia ʻe ʻasi, tuʻunga ʻi he Fakalelei ʻa Sīsū Kalaisí. Ko e talaʻofá ʻeni: ‘Vakai, ko ia ia kuó ne fakatomala mei heʻene ngaahi angahalá, ʻoku fakamolemoleʻi ia, pea ko au ko e ʻEikí, ʻoku ʻikai te u toe manatu ki ai’ [Tokāteline mo e Ngaahi Fuakava 58:42].”¹⁴

ʻI he taimi ʻoku tau fakatomala aí “ʻi he loto-fakamātoató,”¹⁵ “ʻe fakaʻaongaʻi leva ʻa e palani lahi ʻo e huhuʻí” ʻi heʻetau moʻuí.¹⁶ ʻE fakamoʻui kitautolu ʻe he Fakamoʻuí.

Naʻe ngāue fakavavevave ʻa e hoa faifekau mo e kau ngāue fakafaitoʻo naʻa nau tokoniʻi homa foha naʻe pā-kālava ʻi he malaʻe ʻo e ngāue fakafaifekaú. Naʻe fili homa fohá ke ne tali e faitoʻo ke taʻofi e pā-kālavá. Naʻe taʻofi e ngaahi nunuʻa ʻo e mamatea naʻe mei hoko heʻene pā-kālavá, ʻa ia ne mei feʻao mo ia he toenga ʻo ʻene moʻuí. Ko e meʻa tatau pē, ʻi he vave ange ʻetau fakatomala mo ʻomi e Fakalelei ʻa Sīsū Kalaisí ki heʻetau moʻuí, ko e vave ange ia ha lava ke fakamoʻui kitautolu mei he ngaahi nunuʻa ʻo e angahalá.

Naʻe fai ʻe Palesiteni Lāsolo M. Nalesoni e fakaafe ko ʻení: “Kapau kuó ke hē mei he halá, … ʻoku ou fakaafeʻi atu koe … ke ke foki mai muʻa. Neongo pe ko e hā hoʻo ngaahi hohaʻá, neongo pe ko e hā ho ngaahi faingataʻá, ʻoku ʻi ai ha feituʻu heni moʻou ʻi he Siasi ʻo e ʻEikí. ʻE hanga ʻe hoʻomou ngāue he taimí ni ke mou foki ki he hala ʻo e fuakavá, ʻo tāpuekina kimoutolu mo e ngaahi toʻu tangata ʻoku teʻeki fāʻeleʻi maí.”¹⁷

ʻOku fie maʻu kitautolu ʻi hotau fakamoʻui fakalaumālié ke tau moʻulaloa ki he ngaahi tūkunga kuo ʻomi ʻe he Fakamoʻuí. Kuo pau ke ʻoua naʻa tau fakatoloi! Kuo pau ke tau ngāue ʻi he ʻahó ni! Ngāue he taimí ni ke ʻoua naʻa taʻofi ʻe he mamatea fakalaumālié hoʻo fakalakalaka taʻengatá. Lolotonga ʻeku leá, kapau ne ke ongoʻi e fie maʻu ke kole fakamolemole ki ha taha ne ke faihala ki ai, ʻoku ou fakaafeʻi koe ke ke fai ia. Fakahā ange e meʻa kuó ke faí. Kole fakamolemole. Kapau kuó ke fai ha angahala ʻo uesia ai hoʻo taau mo e temipalé, ʻoku ou fakaafeʻi koe ke ke talanoa mo hoʻo pīsopé—he ʻahó ni. ʻOua naʻa fakatoloi.

Siʻoku kāinga, ko e ʻOtuá ʻa ʻetau Tamai Hēvani ʻofá. Kuó Ne foaki ʻa e mālohi mo e ʻilo kotoa ki Hono ʻAlo ʻOfaʻanga ko Sīsū Kalaisí. Koeʻuhí ko Ia, ʻe fakamoʻui ai ʻa e faʻahinga kotoa ʻo e tangatá ʻi ha ʻaho, mei he fokoutua fakamatelie kotoa pē ʻo lauikuonga. Tuʻunga ʻi he Fakalelei ʻa Sīsū Kalaisí, kapau te tau fili ke fakatomala mo liliu kakato hotau lotó ki he Fakamoʻuí, te Ne fakamoʻui fakalaumālie kitautolu. ʻE lava ke kamata leva ʻa e fakamoʻui ko iá. ʻOku ʻatautolu ʻa e fili ko iá. Ko hotau lotó ke fakamoʻui kitautolu?

ʻOku ou fakamoʻoni naʻe fai ʻe Sīsū Kalaisi e totongi huhuʻí kae lava ʻo fakamoʻui kakato kitautolu. Ka kuo pau ke tau fili ke tali e faitoʻo faifakamoʻui ʻokú Ne ʻomí. Tali ia he ʻahó ni. ʻOua naʻa fakatoloi. ʻI he huafa ʻo Sīsū Kalaisí, ʻēmeni.