Gikan sa Kahadlok ngadto sa Pagbusog

Imahe

study desk

Paghulagway pinaagi ni Greg Newbold

Aktibo ko sa Simbahan sa akong tibuok kinabuhi. Nagserbisyo ko og full-time nga misyon, naminyo sa templo, ug mitabang sa pagpadako og upat ka talagsaon nga mga anak nga babaye. Hinoon, sa pagpanglabay sa katuigan, nakamatikod ko nga ang pipila sa akong higala miundang sa ilang pagkamiyembro sa Simbahan. Ang pipila ka miyembro sa pamilya naggamit og sosyal media sa pagkwestyon ug pagsaway sa mga lider sa Simbahan. Ug ako nagsugod sa pagduha-duha mahitungod sa Simbahan sa unang higayon sa akong kinabuhi. Ang akong mga pagduha-duha nakahatag nako og kahadlok sa umaabut. Usahay, gibati nako nga nawad-an og paglaum.

Atol niining malisud nga panahon, gipugos nako ang akong kaugalingon sa pagtambong sa komperensya sa stake. Samtang ang akong presidente sa stake namulong, miingon siya, “Aron kita makalahutay sa malisud nga panahon sa unahan, kinahanglan kita nga mag-usab gikan sa kaswal nga pagbusog ngadto sa dinalian nga pagbusog sa pulong sa Dios. Kinahanglan kita nga mohimo og kanunay ug nakatutok nga pagtuon sa kasulatan nga prayoridad sa atong kinabuhi. Kon atong buhaton, ako mosaad nga kita dili mahadlok.”

Ang pulong nga “kahadlok” nakadapit sa akong pagtagad. Nakaamgo ko nga akong gitugutan ang akong pagtuon sa ebanghelyo nga mahimong kaswal. Isip resulta, ang kahadlok mikontrolar sa akong kinabuhi. Nakahukom ko nga sulayan ang tambag sa akong presidente sa stake.

Mipauli ko ug mihimo og lugar alang sa pagtuon sa ebanghelyo. Sa daplin sa usa ka kwarto, nagbutang ko og gamay nga lamesa nga dunay komportable nga lingkuranan. Nagbutang ko og pipila ka litrato sa Manluluwas diha sa bong-bong. Akong gipundok ang akong mga kasulatan, pipila ka lapis, ug sulatanan nga papel. Gisugdan nako ang akong pagtuon uban sa usa ka pag-ampo.

Human sa usa ka semana o duha, nakapalambo ko kada adlaw nga buluhaton. Maminaw ko pag-una sa kinatibuk-ang komperensya ug dayon magtuon sa piho nga hilisgutan sa ebanghelyo. Dayon mobasa ko og pipila ka kapitulo sa Basahon ni Mormon ug tapuson ang akong pagtuon sa kinasingkasing nga pag-ampo ngadto sa akong Langitnong Amahan.

Bisan pa sa mga makabalda, panagsa ra ko makalaktaw og adlaw sa pagtuon sa ebanghelyo sulod sa unom ka bulan. Nakaangkon ko og mas dako nga pagsabut sa daghang mga hilisgutan sa ebanghelyo ug nakalig-on sa akong relasyon uban sa akong Langitnong Amahan pinaagi sa kanunay ug sinsero nga pag-ampo.

Ang akong pagpamatuod nahimo na usab nga butang nga akong kasaligan. Ang akong mga pagduha-duha nawala tungod sa bag-ong mga pagsaksi nga akong nadawat sa gipahiuli nga ebanghelyo. Akong nakaplagan ang akong kaugalingon nga dili na kaayo mabalaka tungod kay ako mas misalig na sa Dios. Gibati nako nga ang kahadlok ug walay paglaum nga mibiya kanako. Wala na usab ako ganahi sa mga kalihokan nga nag-usik sa panahon ug nakamatikod nga ako mas manggihatagon na ug mas malumo ngadto sa uban.

Sa akong pagpatalinghug sa tambag sa akong presidente sa stake, ang Dios nakahimo sa pag-usab kanako. Ako giayo ug gipahiuli sa akong Ginoo Mismo samtang ako nagbusog sa Iyang pulong.