Ang Katuyoan Nga Makapausab sa Atong Pagpangalagad

Samtang adunay daghan nga mga katuyoan sa pagpangalagad, ang atong mga paningkamot kinahanglang giyahan sa usa ka tinguha sa pagtabang sa uban nga makakab-ot og mas lawom nga indibidwal nga pagkakabig ug mahimong mas sama sa Manluluwas.

Imahe

ministering like the Savior

Buhing Tubig, ni Simon Dewey

Kon higugmaon nato ang uban sama sa paghigugma sa Manluluwas, kita gusto nga motabang kanila sama nga Siya gusto. Ingon nga ang Maayong Magbalantay, Siya ang katapusan nga ehemplo sa makahuluganong pangalagad.

Sa paghimo sa atong pangalagad sunod sa Iyang ehemplo, importante nga hinumduman nga ang Iyang mga paningkamot sa paghigugma, pagbayaw, pag-alagad, ug sa pagpanalangin adunay mas taas nga tumong kay sa pagtubag sa diha-diha nga panginahanglan. Sigurado nga Siya nakahibalo sa ilang inadlaw-adlaw nga mga panginahanglan ug adunay kalooy sa ilang pag-antus karon. Mao nga Siya miayo, mipakaon, mipasaylo, ug mitudlo. Apan Siya gusto nga mohimo pa og dugang kay sa pag-atiman sa karon nga kauhaw (tan-awa sa Juan 4:13–14). Gusto Siya nga kadtong anaa sa Iyang palibut mosunod Kaniya (tan-awa sa Lucas 18:22; Juan 21:22), makaila Kaniya (tan-awa sa Juan 10:14; Doktrina ug mga Pakigsaad 132:22–24), ug makakab-ot sa ilang balaang potensyal (tan-awa sa Mateo 5:48). Mao usab kana karon (tan-awa sa Doktrina ug mga Pakigsaad 67:13).

Adunay dili maihap nga mga paagi nga kita makatabang sa pagpanalangin sa uban, apan kon ang katapusang tumong sa atong pagpangalagad mao ang pagtabang sa uban nga makaila sa Manluluwas ug mahimong mas sama Kaniya, nagtrabaho kita padulong sa adlaw nga dili na kinahanglan nga motudlo kita sa atong silingan nga makaila sa Ginoo tungod kay kitang tanan makaila Kaniya (tan-awa sa Jeremias 31:34).

Ang Pagtutok sa Manluluwas Milapas sa Diha-diha nga Panginahanglan

Pipila ka indibidwal mihimo og dakong sakripisyo aron sa pagdala sa ilang higala ngadto ni Jesus aron maayo sa paralisis. Sa katapusan ang Manluluwas miayo sa tawo, apan Siya mas interesado sa pagpasaylo kaniya sa iyang mga sala (tan-awa sa Lucas 5:18–26).
Sa dihang ang mga tawo midala ngadto sa Manluluwas sa babaye nga nadakpan sa panapaw, ang Iyang pagpugong sa pagpanghimaraut nakaluwas sa kinabuhi sa babaye sa pisikal nga paagi. Apan Siya gusto nga moluwas usab kaniya sa espirituhanong paagi, nagsulti kaniya sa “lumakaw ka, ug ayaw na pagpakasala” (tan-awa sa Juan 8:2–11).
Si Maria ug Marta mipadala og mensahe ni Jesus naghangyo Kaniya sa pag-ayo sa Iyang higala, nga si Lazaro. Si Jesus, kinsa miayo sa uban sa dili maihap nga mga okasyon, milangan sa iyang pag-abut hangtud nga si Lazaro namatay. Nasayud si Jesus unsay gusto sa pamilya, apan sa pagpabuhi ni Lazaro gikan sa patay, Iyang nalig-on ang ilang mga pagpamatuod sa Iyang pagkabalaan (tan-awa sa Juan 11:21–27).

Unsa ang ubang mga ehemplo ang inyong ikadugang niini nga lista?

Unsa ang Atong Mabuhat?

Kon ang atong katuyoan mao ang pagtabang sa uban nga mahimong mas sama sa Manluluwas, makapausab kini sa paagi sa atong pagpangalagad. Ania ang pipila ka paagi nga kini nga pagsabut makagiya sa atong mga paningkamot sa pagpangalagad.

Ideya 1: Pagkonektar sa Pag-alagad ngadto sa Manluluwas

Ang atong tanang paningkamot sa pagbuhat og maayo bililhon, apan kita makapangita og oportunidad sa pagpalambo sa atong pag-alagad pinaagi sa pagkonektar niini ngadto sa Manluluwas. Pananglitan, kon ang pamilya nga inyong gialagaran masakiton, ang pagkaon makatabang, apan ang inyong yanong pagsulti sa gugma mahimong mapilo-pilo pinaagi sa inyong pagpamatuod sa gugma sa Manluluwas alang kanila. Ang inyong tabang sa trabaho sa nataran mapasalamatan, apan tingali mas mahimong makahuluganon uban sa tanyag sa paghatag og panalangin sa priesthood.

Si Elder Neil L. Andersen sa Korum sa Napulog Duha ka mga Apostoles mitudlo: “Ang usa ka tawo nga adunay malumo nga kasingkasing makatabang sa usa ka tawo pag-ayo sa ligid, pagdala sa kauban sa kwarto ngadto sa doktor, maniudto sa usa ka tawo nga naguol, o mopahiyom ug moingon og hello aron maanindot ang adlaw.

“Apan ang usa ka sumusunod sa unang sugo natural nga modugang niining importante nga mga buhat sa pag-alagad.”¹

Ideya 2: Tutok sa Dalan sa Pakigsaad

Sa pagpakigsulti ngadto sa mga miyembro sa unang higayon isip Presidente sa Simbahan, si Presidente Russell M. Nelson miingon, “Pabilin diha sa dalan sa pakigsaad.” Ang paghimo ug pagtuman sa mga pakigsaad “moabli sa pultahan ngadto sa tanang espirituhanong mga panalangin ug pribilehiyo nga anaa.”²

Isip mga Santos sa Ulahing mga Adlaw, kita gibunyagan, gikumpirmahan, ug nakadawat sa gasa sa Espiritu Santo. Takus nga mga lalaki nga miyembro makadawat sa priesthood. Moadto kita sa templo alang sa atong tuga ug mabugkos isip pamilya sa kahangturan. Kining makaluwas nga mga ordinansa ug sa may kalabutan nga mga pakigsaad importante alang nato nga mahimong sama Kaniya aron nga kita magauban Kaniya.

Kita adunay importante nga bahin sa pagtabang sa uban subay niana nga dalan samtang kita motabang kanila nga motuman sa ilang mga pakigsaad ug moandam sa paghimo sa umaabut nga mga pakigsaad.³ Unsaon ninyo sa pagtabang ang mga indibidwal o mga pamilya nga inyong gialagaran aron makadawat sa sunod nga ordinansa nga ilang gikinahanglan? Kini nagpasabut sa pagtabang sa usa ka amahan sa pagbunyag sa iyang anak nga babaye, magpasabut sa mga panalangin sa sunod nga pakigsaad nga mahimo, o pagpakigbahin og mga paagi aron makabaton og mas makahuluganon nga kasinatian sa pagbag-o pag-usab sa atong mga pakigsaad samtang nag-ambit sa sakramento.

Imahe

invite and encourage

Si Kristo ug ang Dato nga Batan-ong Punoan, ni Heinrich Hofmann

Ideya 3: Pagdapit ug Pag-awhag

Kon kini angay, tambagi kadtong inyong giatiman mahitungod sa ilang pagkakabig ug mga paningkamot nga mas mahimong sama ni Kristo. Pahibaloa sila nga sa kalig-on nga inyong nakita ug gidayeg diha kanila. Susiha kon unsa ang ilang gibati kon asa sila molambo ug makig-istorya unsaon ninyo sa pagtabang. (Alang sa dugang bahin sa pagtambag niadtong kinsa inyong gipangalagaran, tan-awa sa “Makigtambag mahitungod sa Ilang mga Panginahanglan,” Liahona, Sept. 2018, 6–9.)

Ayaw kahadlok sa pagdapit kanila sa pagsunod sa Manluluwas ug sa pagtugot Kaniya sa pagtabang kanila sa pagkab-ot sa ilang balaan nga potensyal. Kini nga imbitasyon mahimong makapausab sa kinabuhi, kon inubanan sa pagpadayag sa inyong pagsalig kanila ug sa inyong hugot nga pagtuo Kaniya.

Unom ka Paagi nga Kita Makatabang sa Uban nga Mouswag ngadto ni Kristo

Ang mosunod mao ang mga sugyot sa pagsuporta sa uban sa paghimo og mga kalamboan sa kinabuhi ug sa pag-uswag subay sa dalan sa pakigsaad. (Tan-awa ang Isangyaw ang Akong Ebanghelyo, kapitulo 11, alang sa dugang mga ideya.)

Pakigbahin. Pagmatinud-anon ug pagmaisugon kon mopakigbahin giunsa sa Manluluwas pagtabang ninyo samtang naningkamot kamo nga mopaduol ngadto Kaniya pinaagi sa pagsunod sa mga baruganan sa ebanghelyo bisan pa sa mga problema.
Saad og mga panalangin. Ang mga tawo magkinahanglan og rason nga mag-usab nga mas maaghaton kay sa mga rason nga dili mag-usab. Ang pagpasabut sa mga panalangin nga may kalabutan sa usa ka aksyon makahatag og gamhanan nga pag-awhag (tan-awa sa Doktrina ug mga Pakigsaad 130:20–21).
Pagdapit. Ang pagsunod sa usa ka baruganan sa ebanghelyo makahatag og pagpamatuod nga kini tinuod (tan-awa sa Juan 7:17) ug mosangpot sa mas lawom nga pangalagad.⁴ Hapit ang matag pakigsultihanay maglakip sa usa ka yanong pagdapit sa pagbuhat og butang nga makatabang nila nga molambo.
Pagtinabangay sa pagplano. Unsay kinahanglan nga mahitabo aron sila malampusong motuman sa ilang pasalig nga mag-usab? Unsaon ninyo sa pagtabang? Aduna bay tagal sa panahon nga nahilakip?
Suporta. Kon makatabang, paghimo og suporta sa ubang mga tawo kinsa makatabang sa indibidwal nga magpabilin nga maaghat ug magmalampuson. Kitang tanan magkinahanglan og usa ka magdadasig [cheerleader].
Pag-follow up. Pagpakigbahin og kauswagan kanunay. Pagpabilin nga nakatutok sa plano apan hashasi kini kon gikinahanglan. Pagmapailubon, pagmakanunayon, ug pagmaawhagon. Ang kausaban magkinahanglan og panahon.

Pagdapit sa Paglihok

Ikonsiderar ang mga paagi nga ang inyong mga paningkamot sa pagpangalagad—sa dagko ug gagmay—makatabang sa uban nga molig-on ang ilang pagkakabig ug mahimong mas sama sa Manluluwas.

Ipakigbahin ang Inyong mga Kasinatian

Ipadala namo ang inyong mga kasinatian samtang kamo nangalagad sa uban o gipangalagaran. Adto sa liahona.lds.org ug i-klik ang “Submit an Article or Feedback.”