“Sioʻata Fakatātā,” Liahona, Fēpueli 2019
Fakakomipiuta Pē
Ko e Sioʻata Fakatātā ʻi he Senitā Takimamata ʻi Rome
Ko e sioʻata fakatātā ʻi he Senitā Takimamata ʻi he Temipale Rome ʻoku ʻikai ngata pē ʻi heʻene fakaʻofoʻofá ka ʻoku ʻi ai foki mo ha fakamoʻoni mālohi.
Ko e fetapaki fakaʻofoʻofa ʻi he sioʻata fakatātaá ʻokú ne fakamaama ʻa e ngaahi temipale kotoa ʻi he funga ʻo e māmaní. ʻOku ʻi ai ha meʻa mahuʻinga makehe fekauʻaki mo e sīpinga mo e ngaahi fakatātā ʻoku ʻi he sioʻata ko ʻení te ne lava ʻo ueʻi ʻa e kakaí ke fakatupulaki ʻenau fakamoʻoní ʻi ha founga makehe.
ʻIkai ngata pē ʻi he fakaʻofoʻofa ʻa e ngaahi luvá ka ʻoku kau ai foki mo e lahi ʻo e taimi, ngāue, mo e kātaki lahi ne fakahoko ʻaki ʻa hono faʻu ʻo aʻu ai pē ki he sīpinga faingofua tahá. Koeʻuhí ʻoku ʻikai faitatau ha ongo konga soʻata, kuopau leva ke filifili fakalelei ʻe he kau tufungá ʻa e ngaahi sioʻata ke nau ngāue aí. ʻOku tuʻutuʻu fakalelei ʻa e sioʻatá kātoa pea fakapipiki ki ha fōtunga pau. ʻOku valivali leva ki he sioʻatá ha ngaahi fakatātā pea silaʻi ʻaki leva ʻa e afí. Pea ʻoku fokotuʻutuʻu fakalelei leva e ngaahi kongokongá ni ki honau feituʻu totonú pea ʻai leva e ʻū lauʻiukamea pulu manifi ʻi honau vahaʻá. Pea ʻoku sotaʻi fakapipiki kātoa kinautolu ʻaki ʻa e meʻasotá (ko ha ukamea ʻoku vaia ngofua pea fefeka vave) Pea ko e ngāué leva ʻi he taimi lahi ʻoku silaʻi ʻufiʻufi ke fakamaʻu ʻa e sioʻataʻ he ukameapulú pea mo ʻai e matapā sioʻatá ke ʻoua ʻe lava e vaí ʻo hū ai.
Fakakaukau angé ki he founga faingataʻa ko iá, fakakaukau ki he ngāue lahi ʻoku fai ke faʻu ha sioʻata fakatātā lahi pehē ʻo ʻasi ai ʻa e ngāue ʻa Kalaisi ʻi he matelié, he ko e meʻa pē ia ne lava ke fakakakato ʻe Tom mo Gayle Holdman ʻo Polovo, ʻIutā, USA, mo ha kulupu ʻaati, kau fokotuʻutuʻu, mo e kau fakaʻaliʻali ʻa ia ne nau lava ʻo fakakakato ia ʻo siʻi hifo ʻi ha taʻu ʻe taha. ʻOku fakaʻaliʻali ʻa e ngāue ko ʻeni kuo kakató ʻi he Senitā Takimamata ʻi he Temipale Rome pea ʻoku fakaʻofoʻofa ʻaupito.
Kamata ʻo e Polōsekí
ʻI he kamataʻangá, ne palani ai ke fakakau ha holisi vitiō ʻi he Senitā Takimamata ʻi he Temipale Lomá, ka naʻe kaniseli e fakakaukaú ni, ʻo makatuʻunga ai e maʻu ʻo e fakakaukau ko ia ke fokotuʻu ai ha sioʻata fakatātā. Ne palaniʻi leva ha fakatātā ki he matapā sioʻatá; pea ne ʻomi mo ha niʻihi ʻo tui ha teunga pea nau tuʻu ʻi he holisí, ʻo fakafaingamālieʻi e kau ʻaatí ke nau fokafuofuaʻi ʻa e fakatātā ki he matapā sioʻatá.
Ne pehē ʻe Brother Holdman, “Ne mau toutou maʻu ha ongo lahi ange ke fokotuʻutuʻu ha tefito pau Ne mau iku ʻo taaʻi ʻa e kotoa ʻo e laʻi taá koeʻuhí ke mau ʻiloʻi ʻa e ongo ʻo e niʻihi ne nau fakatātaaʻí.” Hili pē hono faʻu ʻa e fakatātā fakamuimuí, Ne kamata leva ʻa e ngāue ʻa Tomu ki he sioʻatá.
Ne ʻasi ʻi he luvá ʻa e Fakamoʻuí mo ʻEne Kau ʻAposetolo ʻe Toko Hongofulu Mā Uá lolotonga ʻEne ngāue fakamatelié. ʻOku fokotuʻu ia ʻi he lotomālie ʻo e senitā takimamatá koeʻuhí ko e meʻa pē ke ʻuluaki sio ki ai ʻa e kau ʻaʻahí ʻi he taimi te nau hū atu ai ki he falé. Pe ko e lue holo pē ʻa e kau ʻaʻahí ʻi he tafaʻaki ʻe taha ʻo e sioʻatá, te nau sio leva ki he ʻīmisi māpele ʻa Kalaisi pea mo e Kau ʻAposetolo ʻe Toko Hongofulu Mā Uá.
Talanoa Fakatātā ʻi he funga ʻo e Talanoa Fakatātā
Ko e taha ʻo e ngaahi meʻa lahi ʻoku fakaʻofoʻofa ai ʻa e sioʻata fakatātā ko ʻení he ʻoku ʻikai ke fakaʻasi ʻa e konga pē ʻe taha mei he moʻui fakamatelie ʻa e ʻEikí. ʻOku hangē pē ʻoku ʻasí ko ha fakatātā pē ʻe taha, ko Sīsū Kalaisi mo e Kau ʻAposetolo ʻe Toko Hongofulu Mā Uá ʻoku ʻi loto-mālie ʻi he ngaahi fakatātā mo e fakaʻilonga ʻoku nau fakatātaaʻi mai ʻa e ngāue fakafaifekau ʻa e ʻEikí ʻi he matelié pea pehē foki ki heʻene ngaahi talanoa fakatātaá. ʻOku fiefia ʻaupito ʻa e ongomātuʻa Holdmans ke vakai ʻa e kau ʻaʻahí ki he fakatātaá pea nau lava ke fili ʻa e talanoa kau kia Kalaisi ʻoku nau manako aí.
ʻOku ʻasi makehe foki ʻa e fakatātā ki he fefine ʻi he veʻe vaitupú. ʻOkú ne fakafofongaʻi ha ngaahi talanoa kehekehe ʻo ʻikai ngata pē ʻi he fefine he veʻe vaitupú; ʻokú ne ala atu foki ki he Fakamoʻuí ʻo hangē ko e fefine ne ʻau totó, pea ko e ngaahi foʻi maka ʻi hono tafaʻakí ʻokú ne fakatātaaʻi ʻa e fefine ne tukuakiʻi ʻokú ne feʻauakí pea ne ʻomi ke tolo ʻaki ia ʻa e maká.
Ne pehē ʻe Sisitā Holdman, “Ko e fefine ʻi he veʻe vaitupú ko e taha ia ʻo e konga ʻoku ou saiʻia taha aí koeʻuhí ʻokú ne fakafofongaʻi ʻa e kakai fefine kehekehe pea mei he Fuakava Foʻoú. Ko e fefine takitaha ne ʻi ai ʻenau ngaahi fie maʻu fakatuʻasino, ka naʻa nau fie maʻu kotoa ke fakamoʻui ʻa kinautolu. Kuo fakamoʻoniʻi mai kiate au ʻe heʻenau ngaahi talanoá mo e tuí, pea ʻoku ou fakaʻamu ʻoku pehē foki ki he kau ʻaʻahi kotoa pē, ʻa e mālohi faifakamoʻui ʻa e Fakamoʻuí.”
Ko ha Meʻangāue Ngāue Fakafaifekau Ngingila
Ko e taha ʻo e fakaʻānaua lahi taha ʻa e fāmili Holdmans ke hoko ʻena sioʻata fakatātaá ko ha meʻangāue ngāue fakafaifekau ʻaonga ʻi he senitā taki mamatá. Ne fakamatala ʻa Sisitā Holdman, “Ne fokotuʻu ʻa e kotoa e ʻīmisi ko ʻení ke hoko ko ha fakamoʻoni kia Kalaisi.” Ne kau ʻi he ʻaatí ha ngaahi fakaʻilonga mo e konga kehekehe ʻi he ʻaloʻi, Kalusefai, Fakalelei, Toetuʻu ʻo e Fakamoʻuí pea mo e ngaahi fakaʻilonga kehekehe ʻo kau kiate Ia.
Naʻe pehē ʻe Brother Holdman, “Ne mau fakakau mo ha ngaahi ʻīmisi ne ʻi he ngaahi tui Kalisitiane kehé hangē ko e kolosí mo e kalauni talatalá koeʻuhí ke ʻi ai ha meʻa ʻoku nau feangai mo ia pea ke fakaʻatā ʻa e kau fiefanongó mo e kau faifekaú ke nau langaki ai ha meʻa ʻoku nau tui tatau ki ai. ʻOku ʻi he sioʻata kakato ko ʻení ʻa e meʻa ʻoku mahuʻinga kia kinautolu pea mo kitautolu foki. ʻOkú ne fakahaaʻi mai leva ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko ha siasi Fakakalisitiane. ʻOku ou ʻamanaki pē ʻe tokoni ʻeni ke mahino lelei ange ki he kakaí.”
Haʻu Fakataha
Hili ʻena ngāue tōtōivi ke fakakakato ʻa e polōseki ko ʻení ʻi loto ʻi ha taʻu ʻe taha, ne fiefia ʻa Brother mo Sister Holdman ʻi heʻena vakai ki he ngāue fakaʻofoʻofa ko ʻení kuo kakato. Ne pehē ʻe Sisitā Hardman, “Ne hanga ʻe he fakatātā ko ʻení ʻo fakangofua kita ke te vakai ki he kotoa e talanoa ki he ngāue fakafaifekau ʻa Kalaisí pea fakahoa mai kia kitautolu ʻi he ʻahó ni.” Ne fakamatala ʻa Brother Holdman ʻo pehē, “ʻOku ʻikai ke tau fuʻu kehekehe mei he niʻihi ne moʻui he kuonga ʻo Kalaisí koeʻuhí ʻoku tau fie maʻu Ia fakataha mo ʻEne ngaahi akonakí ʻo hangē pē ko kinautolú.
Ne mau faʻu mo fokotuʻutuʻu ʻa e konga ko ʻení koeʻuhí ke hanga kotoa hake ʻa e ngaahi lainé ki he Fakamoʻuí ʻi he kongaloto ʻo e fakatātaá. Mei he falé ki he lalahi ʻo e kakaí, ʻoku tuhu ʻa e meʻa kotoa kiate Ia.”