Mei he Kau Palesitenisī ʻUluakí
Ke Hangē ko Sīsuú
Fai ʻe Palesiteni Henry B. Eyring
Tokoni Ua ʻi he Kau Palesitenisī ʻUluakí
Mei he “Ko Hotau Faʻifaʻitakiʻanga Haohaoá,” Liahona, Nōvema 2009, 70–73.
ʻI ha Sāpate ʻe taha naʻá ku siofi ai hono hivaʻi ʻe ha fānau Palaimeli ʻa e:
Feinga ke u hangē ko Sīsū; Muimui hono halá.
Feinga ke u ʻofa hangē ko iá heʻeku tōʻonga mo e lea.
Faʻa tauveleʻi au ke u fili taʻe totonu,
Ka u fie fanongo ki he kiʻi fanafana,
“Feʻofaʻaki hangē ko Sīsū.
Feinga ke fakahā e ʻofa mo
Angamalū he meʻa kotoa pē,
Akonaki ia ʻa Sīsū.”
Naʻe punou ki muʻa e tokotaha kotoa pē ʻo meimei ki he konga ki muʻa ʻo honau seá Naʻe lava ke u mamata ki he maama mo e loto-vilitaki ʻi honau fofongá. Ko Sīsū Kalaisi honau faʻifaʻitakiʻangá. Ko ʻenau taumuʻá ke hangē pē ko Iá.
Te tau lava kotoa pē ʻo hangē ko e Fakamoʻui ko Sīsū Kalaisí, ʻaki ʻetau moʻui ʻaki ʻEne ongoongoleleí. ʻOku ou fakatauange pē te mou kumi ha ngaahi faingamālie ke mou fai ai e meʻa naʻá Ne faí pea ʻofa ʻo hangē ko ʻEne ʻofá. Ko e ʻofá ko e founga ia ʻoku tataki ai kitautolu ʻe he ʻEikí ʻi he hala ke tau hoko ʻo hangē ko Iá. ʻOku ʻikai ha taha ia ʻiate kitautolu ʻe haohaoa. Ka ʻe lava ke tau ʻiloʻi ʻoku tau muimui ʻi Hono halá. ʻOkú Ne tataki kitautolu pea ʻokú Ne fakaʻamu ke tau muimui ange ʻiate Ia. ●