Vaaia Tama o Pese
Maria Oka
Kalefonia, ISA
Ata na tusia e Allen Garns
Sa ou i ai i laʻu misiona i Honolulu, Hawaii, ISA, mo le na o le fa ma le afa masina ae oso lo’u ma’i lea na mulimuli ane faamaonia mai o le ma’imaliu. O masina na sosoo ai na oʻo mai ai ni asiasiga i le falemaʻi, suʻesuʻega e le mafaitaulia, ma se fualaau fou e i ai ni aafiaga le lelei.
Seia oo i lena taimi, sa ou taulaʻi atu i le galuega faafaifeautalai ou te le i lagonaina ai le ma’i manatu, ae mai le taimi na oso ai lo’u ma’i, na tiga lo’u fatu. Na ou misia oʻu matua ma na ou lagonaina le tuuatoatasi e ui lava ina siomia aʻu e ni tagata lelei ma alolofa. Ou te le’i fia alu i le fale, ae sa ou manao ia lagonaina le filemu.
Faatasi ai ma le faatagaga a loʻu peresitene o le misiona, sa ou talanoa ai ma oʻu matua i luga o le telefoni e uiga i aʻu fualaau. O loʻu tama, o le na faatoa faataunuuina lana miti i le olaga atoa e auai i le Aufaipese a le Tapeneko i le Lotoa o le Malumalu, na faamautinoa mai ia te au o le a ia pese ma lona loto mo aʻu i le konafesi aoao, lea na amata i le aso na sosoo ai.
O le taeao na sosoo ai, sa ou tatalo faatauanau mo le filemu lea sa matuai ou manaomia lava. Na ou mauaina tali i fesili patino i le taimi o konafesi aoao muamua, ma sa ou talitonuina e mafai ona ou toe maua le taitaiga. A’o amataina le konafesi, na usuina e le aufaipese le “Fanau, ua Leoleo mai le Atua” (Viiga, nu. 180). I totonu o le minute muamua, na ou vaai i loʻu tama i luga o le televise. Na tumau i luga o ona foliga le meapueata mo sina taimi.
Na maligi ou loimata ao ou lagonaina se lagona maoae o le filemu o siomiaina a’u. Na ou iloa e alofa le Atua ia te a’u. Sa ia silafia lelei le mea sa ou manaomia i lena aso–o se faamautinoaga faigofie e lata mai o Ia ma e silafia aʻu. Sa ou lagonaina le alofa o le Atua, ma faaopoopo atu i ai, le alofa o loʻu aiga, aʻu soa, ma laʻu peresitene o le misiona. Nai lo le lagonaina o le mafatia, ua ou vaai nei i se avanoa e latalata atili atu ai i le Alii.
O oʻu faafitauli i le soifua maloloina e lei mou ese. Sa tatau ona vave uma laʻu misiona, ae sa ou iloaina sa i ai iina le Atua ma e alofa o Ia ia te au. O lena faamautinoaga ua mulimuli mai ia te au i le tele o isi lototiga ma ua aumaia ai ia te au le faamoemoe i taimi sili ona pogisa. O isi atonu e taua o se mea faafuasei, ae ou te iloa o le vaaia o lou tama o pese e uiga i le alofa o le Atua o se vavega itiiti i loʻu taimi o o’u manaoga.