Lagonaina le Faafouina

Ata

Feeling New

“E i ai sa’u meaalofa taufaaofo!” O le tala lea a Ema (Tina) ina ua ia pikiina Rasmus mai le aoga. Sa la savavali faatasi i lalo o auala vaapiapi o laina o fale felanulanua’i.

“Rosolje mo le meaai o le afiafi?” O le mate lea a Rasmus ma le fiafia. Na latou ‘aina i le vaiaso talu ai mo lona aso fanau lona fitu. Ae e mafai ona ia ‘aia nisi salati pīti-ma-pateta ma eleni tuu fagu i taimi uma!

Na lulu le ulu o Ema ma ata. “Na ou feiloai i ni tamaitai talavou se toalua i luga o le pasi i lenei taeao. Faifeautalai. O le a la o mai e asiasi i le po nei e talanoa e uiga i le la ekalesia.”

Sa autilo atu i luga Rasmus ma le fia iloa. Na te lei feiloai lava i ni faifeautalai muamua.

Sa taalo i lana taavale fuimu i totonu o lona potumoe ina ua taunuu faifeautalai. “Tere! Tere! Talofa!” na la faafeiloaia Ema a’o la savavali atu i totonu o le fale. Na la aveese o la seevae mamafa ae tui seevae tosotoso na teuina e Ema mo tagata asiasi. Na taitai atu e Ema i la’ua i le nofoa lanu moli. Ae sa tutu Rasmus i tua o le faitotoa.

Na iloa atu e le tamaitai umi ma ataata atu. Faimai lana pine lanu uliuli o le igoa o Õde Craig (Sister Craig). “Na ta’u mai e lou tina e le’i leva ona uma lou aso fanau,” o lana tala lea. “Na ma aumaia se mea mo oe.” Sa ia uuina se tamai kata. Sa tilotilo atu ma le totoa Rasmus i ai.

O se ata o se alii. Na ia ofuina se ofu talaloa paepae, ma faaloaloa mai lona lima.

“E te iloa po o ai lea?” Na fesili atu ai Õde Craig.

E leiloa e Rasmus le igoa o le alii. Na te lei vaai muamua lava i lenei ata. Ae o le alii sa foliga agalelei ma mamana. “Ou te manatu o ia o se tupu!” O le tala lea a Rasmus.

Sa ataata faifeautalai. “Ioe, o Ia o le tupu! O Ia o le Tupu o tupu! O lona suafa o Iesu Keriso.” Na aumai i fafo e Sister Craig se tusi faavaa lanumoana. “Ma o le tusi lea o loo aoao mai e uiga ia te Ia, o le Mormoni Raamat. O Le Tusi a Mamona.”

Na amata e ia ma Ema ona faitau le Tusi a Mamona i aso uma ae le’i alu i le aoga. I le taimi o le aoga, na o Rasmus ma lana vasega i savaliga faalenatura ona faia lea o sana tamaʻi moe. A uma le aʻoga, e masani ona feiloai o ia ma Ema ma faifeautalai. Sa la talatalanoa ma faifeautalai e uiga i mea sa la faitauina i le Tusi a Mamona. O nisi taimi na fafaga ai e Ema tagata uma i le kringel, falaoa fili sinameni. I faaiuga o vaiaso la te tietie ai ma Ema i uila pe fai se la tafaoga i luga o le matafaga. O nisi taimi latou te faia ni savaliga umi i le vaomatua po o le la vaitafe e sili ona fiafia i ai.

I se tasi o na savaliga i le vaomatua, na ta’u atu ai e Ema ia te ia ua fia papatiso. Sa ataata Rasmus. Na fesili atu faifeautalai ia Ema e tatalo pe tatau ona papatiso pe leai. Na foliga mai ua maua e ia lana tali!

“Ma ua ou iloa le mea o le a ou papatiso ai,” na ia fai atu ai ia te ia ma ataata. “E mafai ona e matea?”

Sa mafaufau Rasmus i le lesona a faifeautalai i le papatisoga. Sa la uuina i luga se ata o loo faaalia ai Iesu ma Ioane le Papatiso i totonu o se vaitafe. …

“O le vaitafe!” o lana alaga lea. “O le ta vaitafe ta te fiafia ai a.”

I le tasi le vaiaso mulimuli ane, na tutu ai Rasmus i luga o le auvai ma faifeautalai ma isi tagata mai le lotu. Sa saunia Ema e papatiso. Na alu ifo o ia i lalo o le vai, e pei lava o Iesu. Ina ua sau o ia i luga, sa ataata o ia. Sa manao Rasmus e manatua lenei taimi e faavavau—o le vai lanumoana, o fugalaau papaʻe i le mutia lanumeamata, ma le ataata a lona tina.

“E faapei lagona o le papatisoina?” na ia fesili ai mulimuli ane, ina ua aai tagata uma i kuki na aumai e faifeautalai.

“E ofoofogia,” o lana tala lea ia te ia. “Sa ou manao ou te nofo i le vaitafe e faavavau. Ua ou lagona le faafouina!” Na ia fusimauina o ia.

“Mo loʻu aso fanau e sosoo ai, ou te fia papatiso, pei lava o oe ma Iesu,” o lana tala lea ia te ia. “Ou te fia lagonaina foi le faafouina!” ●