O Le Le Lava o le Sapalai o le Okesene [Hypoxia] Faaleagaga ma le Taua o Uo Lelei

I le taimi atoa o lo’u talavou, sa ou auai ai i le tele o faeasaite. Ou te tautino atu, ou te le manatua mea uma, ae e i ai se lauga e tasi ou te manatua pea. O se tasi o ou taitai, o le sa avea muamua ma se pailate o le Ea Fosi, na faasoa mai lona aafiaga i le hypoxia—o le le lava o se okesene i le tino o se tagata, lea e aafia ai o latou faiai.

Na faamalamalama mai e le taitai e faapea o pailate o le Ea Fosi e i ai i le tulaga lamatia o le le lava o le okesene [hypoxic], lea e faia ai se latou aoaoga e faaali atu ai ia i latou. I se tasi o vasega faaleaoaoga, sa faatonuina ai o ia e aveese lana ufimata okesene ma toe faamaulu ina ua ia lagonaina ua amata ona maua i le tulaga o le le lava o le sapalai o le okesene [hypoxic]. Ae na te lei toe faamaulua lana ufimata [i ona fofoga]—lea na faia e ana uo mo ia.

Ina ua maea le aoaoga, sa faamalamalama mai e ana uo na latou vaai ia te ia o mafatia i faailoga o le le lava o le okesene—faia o faaiuga le lelei, le manino upu, ma le le mautonu. Fai mai o ia, na te lei lagonaina se tasi o na āuga ma sa manatu o ia sa lelei mea uma, e ui sa iloa atu e ana uo ua i ai o ia i se tulaga lamatia.

O nisi taimi i le olaga, atonu tatou te mauaina ai i tatou lava ua faia mea e le tatau ona tatou faia e aunoa ma le le iloaina i taimi uma e le sao mea o loo tatou faia. E mafai ona tatou faia ni faaiuga leaga, ese le amio, ma lē mautonu atoatoa i le olaga—e pei o le le lava o le sapalai o le okesene. O le ala e agai atu i le ola e faavavau o se ala e mafai ona faigofie ona e se ese mai ai pe afai e le tuuto atu foi tagata uma o siomiaina oe (tagai i le 1 Nifae 8:23, 28; 3 Nifae 14:13–14). O le taimi lea e lamatia ai le i ai o ni uo leaga i lou tulaga ua i ai o le le lava o le sapalai o le okesene. E moni, o uo leaga e le o ni tagata leaga—ae o loo ou talanoa atu e uiga i uo o ē e lē toe faia lau ufimata o le okesene ma e ono mafai foi avea ma tagata e taitai atua oe i se tulaga o le lamatia faaleagaga.

I le tuputupu ae ai i Ausetalia, sa ou aafia ai i ni uo eseese, i totonu ma fafo o le Ekalesia—o nisi sa le o ni faatosinaga lelei. Sa ou oo i ni tulaga na ou lagona ai ua ou mautinoa e mafai ona ou tumau i le ala sao ma le vaapiapi, ae ona o le faatosinaga a ni nai uo leaga, o a latou amioga na avea ma tulaga masani mo au ma sa amata ona ou mulimuli ia i latou.

O le mea na fesoasoani ia sa’o ai lo’u mafaufau o le faalogo lea i o’u matua ma taitai o le Ekalesia. Sa ou iloa sa latou mananao i le mea sili mo lou olaga ma e sili atu ona lelei la latou vaai nai lo le mea na ou iloa sa ou pa’ū atu i se tulaga o le hypoxia faaleagaga. Sa ou taumafai e tu i taimi uma i nofoaga paia. Sa ou auai i gaoioiga a le autalavou matutua ma le lotu. E ui lava ina sa ou faaaluina le tele o lou taimi i le iunivesite ma galuega, sa ou maua ni uo lelei. Sa ou maua le tele o uo e le o ni tagata o le Ekalesia, ae o e filifilia le mea sao ma o ni faataitaiga maoae. Mo se faataitaiga, sa ou feiloai i se tasi o au uo sili ona maoae i le aoga maualuga. Sa ia taumafai i taimi uma e avea ma se tagata sili atu ona lelei, ma e ui lava e le o ia o se tagata o le Ekalesia, ae sa fesoasoani mai o ia ia te au e iloa pe a ou le filifilia le ala sao mo au lava. O le mea lena e faia e se uo lelei.

I le Faataoto 13:20 e faitauina faapea, “O le savali faatasi ma le au makoi o le a popoto; ae o le a faaumatia se soa o tagata valea.” Ou te ioeina atoatoa—o uo e tele ina e siomia ai oe lava o tagata ia o le a iu lava ina mulimuli atu. E pei lava ona ou le iloaina, atonu e te le iloaina le taimi e le lava ai le faagasologa o lau okesene faaleagaga ma mulimuli atu i le auala sese po o tagata sese. E taua le faalogo atu ia i latou o e alolofa ia te oe ma tuu oe lava i nofoaga o le a valaaulia ai tagata lelei uma ma le Agaga. Ina ua ou faia nei mea, sa ou maua au lava o siomia e ni uo e sili atu i aso uma—o uo o e lagolagoina a’u i a’u faaiuga amiotonu.

Po o fea lava o e i ai i le lalolagi, e mafai ona e maua ni uo o e o le a toe tuuina i taimi uma lau ufimata o le okesene [i ou fofoga] i le taimi e te tauivi ai e fai e oe lava ia. E mafai ona e maua ni uo e mafai ona fesoasoani ia te oe i le tulaga o le hypoxic faaleagaga e te ono oo i ai. E tele atu le aafiaga o au uo i lou olaga nai lo le mea e te manatu ai, o lea ia saili ni fegalegaleaiga ma i latou o e filifili le mea sa’o. Sa ou faia, ma na suia ai au ma lou lumanai e faavavau.