O se Tafaoga Faamasani ma se Tamaitai o le Au Paia o Aso e Gata Ai
Saunia e Elder Joaquin E. Costa
O Le Fitugafulu
O le tautinoga a Renée e ola i le talalelei na suia ai lo’u olaga.
Ata na tusia e Alex Nabaum
Ou te lei ola ae o se tagata o Le Ekalesia a Iesu Keriso o le Au Paia o Aso e Gata Ai, ae e ala mai i nisi o tagata o le Ekalesia sa ou feiloai i ai, sa ou aoaoina ai afai e soifua se tagata i le olaga mama, atoatoa, e susulu mai le malamalama o Keriso i totonu ia i latou. E avea i latou ma faataitaiga mamana.
O lau fesootaiga muamua ma le Ekalesia sa auala mai i se uo sa ou faia i le kolisi. O ia o se tagata lelei o le Ekalesia o le sa auauna atu i se misiona. Sa ou ola ae i se aiga Katoliko, o lea sa masani ona ia taumafai e amata se talanoaga ma au e uiga i mataupu faalelotu. Ae sa ou le fiafia tele i ai. Sa poto lava lau uo, ma ia toe taumafai foi e faailoa atu au i le Ekalesia—e ala i le faatulagaina o au i se tafaoga faamasani ma se tamaitai e le masani ai o le Au Paia o Aso e Gata Ai.
O le Ma Tafaoga Faamasani Muamua
O le taimi lava na ma o ai ma Renee i le ma tafaoga faamasani muamua, sa ou alofa ma le atoatoa ai ia te ia. Sa matuai aulelei lava o ia ia te au, sa ou iloa sa i ai se mea faapitoa e uiga ia te ia. E lei umi lena, sa ou saunia e faamaoni ia te ia, ma fausia se aiga—ae ina ua mavae ni nai tafaoga, sa ia fai mai e le tatau ona ma toe tafafao faamasani ona e “fiafia tele” o ia ia te au ma e manao e faaipoipo i le malumalu. Na atili ona leaga mea mo au, ona e lei umi ae alu o ia i se misiona. Ina ua mavae lena, sa ou filifili ai sa ou le fiafia i le Au Paia o Aso e Gata Ai.
Ina ua ia foi mai lana misiona, sa valaaulia au e la ma uo masani i se pati ina ia ou vaai ai ia Renee, ma e sa toe amata ona ma faaaluina faatasi le taimi ma ia. Sa ou faauu mai le kolisi ma maua ai se galuega lelei tele, ma sa ou toe lagonaina ua sauni e faaipoipo. Sa ou manatu sa ou aulelei, o lea sa ou fesiligia ai loa pe mafai ona ma faaipoipo. Sa ia fai mai e leai.
Feiloaiga ma le Musua ma Faifeautalai
Ina ia tausia pea le mafutaga, sa ou taliaina ai le valaaulia e faalogologo i faifeautalai. I se tasi taimi na sau ai o ia ia te au ma, loimata i ona mata, tuuina mai lana molimau i le Tusi a Mamona, ma aioi mai ia te au e faitau i ai. Sa manao o ia ina ia maua sau molimau o le talalelei ina ia mafai ai ona ia faataunuuina lona manao e faaipoipo i le malumalu. Ou te alofa ia te ia, ma sa ou le manao e faaita ia te ia, o lea sa ou fai atu ai o le a ou faia. Ae e ui lava ina sa ou ioe e feiloai i faifeautalai, sa ou feiloai muamua ia i latou ina ia mafai ai ona maua se taimi e faatalitonu ai Renee e faaipoipo ia te au. Sa leai sou faamoemoe e auai i se lotu fou.
Ina ua mavae ni nai taimi faatulagaina ma faifeautalai, sa ou le fiafia pea. Ou te nofo a o fai a latou lesona, ae sa ou lei gauai atu lava po o le taumafai ia lagonaina le Agaga. Sa tapunia lou loto, ona sa ou le faalogologo i faifeautalai mo aʼu; sa ou faalogo atu ia i laua mo Renee. Sa leai se mea na lelei, ma sa le mafai lava ona ou faatalitonuina Renee, o le a avea au ma se toalua lelei ia te ia e aunoa ma le papatisoina. Sa tumau malosi o ia i ona talitonuga.
O le Faapatinoina o le Tusi a Mamona
Ona i ai lea o se suiga i faifeautalai. Na sau se faifeautalai fou e aoao au, ma sa i ai sona manatu. Sa ia fai mai ia te au e sue i tusitusiga paia i le Alema 42, ma sa ia fesili mai pe mafai ona ou faitauina le mataupu leotele ia te i laua, o le fuaiupu i le fuaiupu. Ae nai lo le na o le faitauina o le upu i le upu, sa manao o ia ina ia ou faaaoga lou igoa i totonu o le faitauga. Ou te lei matuai manao i ai, ae sa faatauanau mai lava o ia.
O lea sa ou amata i le fuaiupu muamua. “Ma o lenei, Joaquin …” Ina ua ou faitauina na upu, sa amata ona talanoa mai le tusi ia te au. A o tuu loʼu igoa i le faitauga, sa ou lagonaina le mana o se molimau patino.
O le isi vaega o le Alema e 42 ua aoao mai e uiga i le pau o Atamu ma Eva, ma mulimuli ane o le fuafuaga o le togiola. Ina ua oo lau faitau i le fuaiupu e 29 ma faitau, “Ma o lenei, Joaquin, ou te manao ia e tuu nei mea ia le toe faalavelave ia te oe,” sa amata ona ou tagi e pei o se pepe. Ou te lei tagi lava faapenei muamua. Sa ou iloa e moni le Tusi a Mamona—ae sa le mafai ona ou faamaeaina le faitauina o le mataupu. Ina ua ou maua le toa mulimuli ane, sa ou fai atu i faifeautalai sa ou manao e papatiso. Sa matuai fiafia lava Renee. Sa ou papatiso, ma e sa iu ina malie o ia e faaipoipo ia te au. O se tausaga mulimuli ane, na faamauina ai i maua i le Malumalu o Buenos Aires Atenitina.
Ou te matua faafetai lava mo le tautinoga a Renee e ola i le talalelei, ma faaipoipo i le malumalu. O lona faamaoni i lana tautinoga i tafaoga faamasani e le gata ina faamalosia ai lana sootaga i le Atua ma le talalelei, ae sa valaaulia ai foi au e aoao e uiga i le talalelei. Ou te iloa le mafuaaga sa matuai matagofie ai o ia ia te au: aua sa mama, alofa, ma atoatoa o ia. Ona o lona faamaoni, sa mafai ai ona ou atiina ae se molimau patino o le Tusi a Mamona ma lenei Ekalesia.