E toatele tagata i Mekisiko e potopoto mai faatasi o ni aiga ma uo e tatala le piniata o se vaega o le latou faamanatuina o le Kerisimasi.
O a nisi o tu masani o le Kerisimasi e sili ona e fiafia i ai? Pulupulu mo ni pesepesega o le Kerisimasi a le aiga i fafo? O faaseega sosoo ai ma le koko vevela? Malaga atu mo se papakiu i le matafaga?
E ui lava i mea o faaalia mai e nisi o kata faamanuia a kamupani, e faamanatuina lava le Kerisimasi i soo se tau, aganuu, ma nofoaga uma—e masani e aunoa ma se faaataataga vaaia o le kiona po o le manogi vaivai o le laau o le paina.
O se vaaiga lenei i nisi o auala e faamanatu ai le soifua mai o le Faaola e le autalavou i le salafa o le lalolagi.
Ata
family with Santa Claus
Ata na tusia e Nina Hunter
“O le masina o Tesema i lou aiga ua faatusaina i le lotogatasi. Matou te naunau e ola e ala i le mulimuli i le faataitaiga a Keriso, ma e matou te taumafai pea e faamanatu ia i matou lava le galuega sa Ia faia mo i matou, ma faamanuiaga e tele ua matou maua. I lo matou potu malolo o loo i ai se ata o le Faaola, o siomia pe tusa ma le 20 fatu lanumumu.
“Ina ua matou sauni e tatala a matou meaalofa i le vaeluaga o le po, ou te vaai muamua i lou aiga sosoo ai ma le ata o Keriso. Ou te mitamita i le i ai o Lona ata i totonu o lena potu, ma o lou mitamitaga o le mafai ona ou faapea ifo ia te au lava o le mea sa Ia finagalo ai mo lo matou aiga ua tupu.
“O loo ou fuafuaina e auauna atu i se misiona. O nei taimi na fefaasoaai i le Kerisimasi e aumai ai ia te au le naunautaiga sili e faasoa atu le talalelei ma isi tagata. Faatasi ai ma le talalelei, o le Kerisimasi e ese foi ona lagona. Faatasi ai ma le talalelei, o mea uma e uiga i le Kerisimasi e totonugalemu ia Keriso ma le aiga, ma e aumaia ai ia te au se faamafanafanaga e sili atu.”
Myrium G., Paris, Farani
Ata
girl from India
“I Bangalore, e faamanatuina faalauaitele ai le Kerisimasi. E faamanatu e tagata uma, po o latou o Hindu, Mosalemi, po o Kerisiano. E toatele tagata e teuteu se laau Kerisimasi ma tautau le fetu i lo latou fale.
“O se tasi o tu masani matou te mulimuli ai i lo matou aiga o le auai lea i le Malamalama o le Lalolagi o le kalena e saunia e le Ekalesia. E le gata i lea, e amata e lou tina ona saunia ni keke mo ou tuaoi, tagata latou te faigaluega faatasi, uo, ma aiga. I le po a o lumanai le Kerisimasi, matou te valaaulia tagata uma o lo matou aiga i lo matou fale. Matou te amata la matou faigalotu o le Kerisimasi i le fale i le 10:30 i le afiafi, ma e matou te pepese i viiga, faitau tusitusiga paia, matamata i ni vitio o le Kerisimasi, ma talanoa.
“Matou te valaaulia tamaiti laiti e tuu le pepe o Iesu i le moega i le vaeluaga o le po i le aso 25 o Tesema. Matou te ofoina atu ‘Manuia le Kerisimasi’ i tagata taitasi o o matou aiga, vaevae le keke, talanoa i le po atoa, ma momoe ua leva le po i lena aso.
“Matou te faafetai ona o le avea ai o Iesu Keriso ma se vaega o o matou olaga. E ala mai ia te Ia tatou te maua ai le olioli tumau-faavavau.”
Ankita K., Bangalore, Initia
Ata
volunteers
“Kerisimasi 2018 o la’u Kerisimasi aupito sili ona matagofie. Sa i ai se lagona o le tuufaatasia ma le fefaauoai, ma sa ou auai i se gaoioiga mo tagata sulufai.
“Sa ou faia seevae pepa lanu mumu ma aoao atu i latou o e sa valaaulia i le taumafataga o le afiafi ina ia latou faia, ma tuu le tasi i luga o ipu taitasi. O i latou na valaaulia i le afiafi sa aumai ato faafafa ua tumu i aitema patino o le tumama ina ia mafai ona latou tuuina atu i le Aso Sa.
“Sa matou matamata i se ata tifaga e uiga ia Keriso ma le au sulufai o se vaega o le afiafi. O se Kerisimasi lelei sa manatua pea.”
Alexis L., Paris, Farani
Ata
kids in front of lemonade stand
“Sa matou fausia lenei tulaga vaitipolo e faaaoga i le taumafanafana, ae o le taimi o le Kerisimasi o se avanoa sili e faaaoga e tufa atu ai i tagata ni kuki ma le koko vevela! Ou te lagonaina lou latalata i lou Faaola pe a ou maua ni auala fou e auauna atu ai i isi.”
Brooklyn H., Alberta, Kanata
Ata
kids with a dog
“Ou te fiafia e faaaluina le taimi faatasi ma ou tuafafine, ae maise lava pe a matou taaalo faatasi i taaloga. I le vaitau o le Kerisimasi e fai ai a matou taumafataga e faamalamalama e moligao i afiafi uma. E lagona le toafilemu. O le malamalama o moligao e faamanatu mai ai ia te au lo tatou Faaola, o le Malamalama o le Lalolagi.”
Dane H., Alberta, Kanata
Ata
young man surfing
“E toatele tagata e mafaufau i atumauga o se nofoaga o le filemu lea latou te mafuta ai ma le natura ma iloa ai le matagofie o foafoaga a le Atua. A o iinei i Hawaii, matou te lagonaina ma talisapaia le mana o le Atua i le sami, ma mea ofoofogia uma o loo i ai.
“O soo se taimi e te faaaluina e siomia i le natura ma le aiga, o se aafiaga o fesootaiga lea. Ua e motu ese mai toatuga o le olaga ma taulai atu i le matagofie o loo siomia ai oe, i mea e te vaai i ai ma tagata e faasoa faatasi ia aafiaga.
“O le a se taimi sili atu nai lo le Kerisimasi e lagona atili ai ma fesootai ai i lenei lalolagi ma i o tatou aiga, a o tatou malamalama ia latou matafaioi taua i le fuafuaga ua uma ona faataatia e lo tatou Tama i le Lagi ma lo tatou Faaola o Iesu Keriso.”
Diane A., faatasi ai ma ata o Zyrus A., Hawaii, ISA
Ata
family in front of temple replica
“O lou aiga e masani ona auai i nisi o ituaiga o gaoioiga o le auauna atu i le Kerisimasi. O se tasi o mea matou te faia o le saunia o meaai ma meaalofa mo i latou e manaomia le fesoasoani. E ala i le auauna atu i isi, e mafai ai ona matou faaali atu le alofa o le Atua. Sa aoaoina au e ou matua i le uiga o le Kerisimasi e ala i le faia o se faataitaiga lelei ma le auauna atu i isi. O lenei aafiaga sa fesoasoani ia te au e malamalama ai i lau matafaioi i le lalolagi ma le uiga moni o le Kerisimasi.”
Aaron S., Bangalore, Initia
Ata
young man
“O nisi taimi, talu ai ona o le toatele o lo matou aiga, matou te faatasitasi ai i lenei fale ma le fale tuaoi. Ua i ai se musika. Matou te sisiva. E masani ona matou faatasi o se aiga i le tele o taimi i le taimi o Tesema, aua ua matou malolo ma le aoga.
“Matou te taaalo. Matou te talanoa. Matou te talie. Matou te aai. O le tu masani lena. Pe a ou i ai i le aoga, e leai sou taimi e faia ai na mea uma faatasi ma lou aiga. O lea matou te taumafai ai e tausia pea nei tu ma aga masani. O le Aiga o le mea aupito sili ona taua. O nei tu masani e fesoasoani ia i tatou e nonofo faatasi ai o se aiga.”
Juan C., Barranquilla, Kolomupia
“Ina ua mavae le afi sa ou iloa ai, o le mea aupito sili ona taua e maua o lou aiga ma uo. O lea e ui ina matou te lei maua le tele o meaalofa, sa matua manaia tele lava le na o le siomia e aiga. O se taimi fiafia pea lea mo i matou, e ui lava ina sa le pei o la matou Kerisimasi masani.”
Rachel W.
“Sa mafai ona ou fesoasoani e la’u ese mai uta ma faatulaga ni uta o loli o meataalo na foai mai. Ona matou tatalaina lea o faitotoa ma faaulufale mai i totonu tagata uma. O se fiafiaga tele le vaavaai atu i tamaiti uma. O o latou mata ua fepulafi ae. Sa matuai fiafia lava i latou! Sa ou fiafia e vaai atu ia te i latou ua fiafia ma toafilemu i le mavae ai o le ola ai i se mea e matuai matautia lava.”
Audrey V.
“Sa manaia le vaai atu i tagata uma ua tuu faatasia ma faalagolago le tasi i le isi i fesootaiga. … Sa ou aoaoina e le taua tele mea faalelalolagi. O le auauna atu, aiga, ma le taimi faaaluina e faatasi ai ua sili atu le taua. E taua le Ola. O mea e mafai ona suia i le leaga, o lea e tatau ai ona tatou taumafai e olioli ai i le taimi o le lelei a o tatou i ai. O i tatou e faatupuina na taimi lelei!”