Batbayar ug ang Basahon nga may mga Litrato
Usa kadto ka mahangin nga adlaw sa Mongolia. Ang siyam ka tuig nga si Batbayar naglakaw pauli gikan sa hununganan sa bus human sa klase. Iyang gigunitan og maayo ang iyang kupo sa ka kusog sa hangin. Maayo gani, dili kini layo sa balay sa iyang mga apohan, diin siya mipuyo.
“Hi!” Miingon si Batbayar sa iyang pagsulod.
“Maayong pag-abut sa balay,” miingon si Lola. “Mihimo ako og pipila ka khuushuur para sa merienda.”
“Salamat!” Si Batbayar mikuha og usa sa mga init, halang nga karneng mga empanada.
“Hulat! Ayaw og kaon bisan unsa hangtud moabut dinhi ang mga misyonaryo,” miingon si Lolo. “Hapit na sila moabut.”
Gusto niini si Batbayar nga ang mga misyonaryo gikan sa simbahan ni Lolo ug Lola moanha aron sa pagbisita. Siya kanunay daghan og nakat-unan gikan kanila. Apan adunay usa lang ka problema.
“Sila mohangyo ba kanako sa pagbasa sa Basahon ni Mormon pag-usab?” Nangutana si Batbayar. “Ang pagbasa lisud alang kanako.”
“Mao kana nganong sila magdala og laing basahon karon,” miingon si Lola.
“Unsa nga basahon?” Miingon si Batbayar.
“Makita nimo,” miingon si Lolo.
Sa wala madugay miabut ang mga misyonaryo. Nangaon sila og dungan sa lami nga karneng empanada ni Lola. Dayon si Batbayar miingon, “Miingon si Lola nga gidad-an ko ninyo og basahon.”
“Nagtuo ko nga ganahan ka niini nga basahon,” miingon si Sister Heitz. “Kini adunay daghang mga hulagway.”
Gitan-aw ni Batbayar ang hapin. Mga Istorya sa Basahon ni Mormon, kini miingon. Usa ka hulagway diha sa hapin mipakita og mga tawo nga nagtukod og barko.
“Nakahinumdom ko niana nga istorya,” miingon Batbayar. “Ang tawo dili makahibalo kon unsaon sa paghimo og barko. Mao nga nag-ampo siya. Ug ang Dios mitabang kaniya.”
“Tinuod kana,” miingon si Sister Enkhtuya. “Sulayan ba nimo pagbasa kini nga basahon? Dayon mahimo kang mag-ampo aron masayud kon unsay gitudlo niini tinuod ba.”
“Akong buhaton,” misaad Batbayar.
Nianang gabhiona mibasa siya gikan sa basahon nga may mga hulagway. Siya mibasa sa istorya bahin sa barko. Dayon nag-ampo siya. Nakatulog siya nga naghunahuna mahitungod sa tawo kinsa mitukod sa barko ug sa unsang paagi ang Dios mitabang kaniya.
Sukad niadto, matag gabii si Batbayar nagbasa og istorya. Dayon nag-ampo siya. Ug matag gabii, makatulog siya nga naghunahuna mahitungod sa unsay iyang gibasa.
Kon ang mga sister nga misyonaryo moanha pag-usab, tudloan nila si Batbayar og dugang mahitungod ni Jesukristo. Si Batbayar nakakat-on mahitungod sa mga propeta. Iyang nakat-unan ang mahitungod sa mga sugo sa Dios. Nagpadayon siya sa pag-adto sa simbahan uban ni Lola ug Lolo. Ug siya nagpadayon sa pagbasa ug sa pag-ampo.
Usa ka adlaw si Batbayar adunay usa ka importanteng butang nga isulti ngadto sa iyang mga apohan. “Sa dihang akong gibasa ang mga istorya sa basahon nga may mga hulaghway, ang akong kasingkasing mibati og ka maayo,” miingon siya. “Kon ako mag-ampo, gibati nako nga sila mga tinuod. Nagtuo ako nga kinahanglan akong magpabunyag.”
Karon, si Batbayar usa ka miyembro sa Simbahan. Nahimo siya nga mas maayo ug mas maayo sa pagbasa. Ug sa gihapon siya nagbasa sa Basahon ni Mormon kada gabii! ●