Pagpakasama ni Nephi
Sa dihang si Nephi miingon ngadto sa iyang amahan, “Ako moadto ug mobuhat sa mga butang nga ang Ginoo nagsugo” (1 Nephi 3:7), mihatag siya kanato og makadasig nga ehemplo sa hugot nga pagtuo ug makugihon nga pagsunod. Ang pasalig ni Nephi nga moadto ug mobuhat nagagikan sa duha ka importante nga mga hiyas nga tanan kanato makapalambo: ang iyang personal nga pagpamatuod sa Ginoo ug sa Iyang mga propeta, ug ang iyang espiritwal nga kalig-on.
Pagpalambo og Pagpamatuod
Si Nephi nagmasulundon tungod kay siya nagtinguha ug nakadawat sa iyang kaugalingong pagpamatuod sa mga sugo sa Ginoo ngadto sa iyang amahan (tan-awa sa 1 Nephi 2:16–20). Nasayud siya nga ang tahas sa pagkuha sa mga palid nga tumbaga mahimo nga lisud. Apan dili sama sa iyang mga igsoon nga lalaki, nasayud siya nga ang Ginoo magauban kaniya ug mag-andam og paagi alang kanila sa pagtuman niini.
Kining hugot nga pagtuo sa Dios ug sa Iyang mga propeta mipanalangin ug mipalig-on ni Nephi sa iyang tibuok kinabuhi ug mitabang kaniya sa pagtuman og milagroso nga mga butang. Sama ni Nephi, makahimo kita og dagko nga mga butang sa atong mga kinabuhi samtang kita naningkamot sa pagsunod sa tambag nga atong madawat gikan sa buhing mga propeta, sa mga paghunghong sa Espiritu Santo, ug sa mga kasulatan. Sama pananglit, ang propeta sa Ginoo karon, si Presidente Russell M. Nelson, naghangyo kanato sa pagtabang sa pagpundok sa Israel ug sa pagpangandam alang sa pagbalik sa Manluluwas.1
Samtang kita magtuon sa pulong sa Dios ug mosunod niini, ang atong hugot nga pagtuo motubo ug mobati kita sulod sa atong mga kasingkasing og usa ka determinasyon nga mopadayon sa pagkamasulundon, bisan kon nasayud kita nga ang mga butang mga lisud.
Nagpalambo og Espiritwal nga Kalig-on
Ang ehemplo ni Nephi nagtudlo usab kanato mahitungod sa Kristohanon nga hiyas sa paglahutay—naglihok pinaagi sa mga hagit kay sa mangita og sayon nga paagi. Adunay mga panahon sa atong tibuok nga kinabuhi nga kita sugoon sa pagbuhat og malisud ug mapugsanon nga mga butang. Niadto nga mga sitwasyon, kon kita mosalig sa atong hugot nga pagtuo diha kang Kristo ug mopili sa “mas matarung kay sa mas sayon nga sayop,”2 kita mapanalanginan.
Kon kamo mag-atubang og lisud nga desisyon o buluhaton, ingon nga nagbaton og “moadto ug mobuhat” nga kinaiya makatabang kaninyo sa paglahutay. Ang matinud-anong pagtubag sa mga giya nga inyong madawat magpakita sa Ginoo nga Siya makahimo sa pagsalig diha kaninyo ug makadugang sa inyong hugot nga pagtuo diha ni Jesukristo.
Samtang kamo matinud-anong mopalambo sa inyong pagpamatuod, sa espiritwal nga kalig-on, ug usa ka “moadto ug mobuhat” nga kinaiya, ang Ginoo mopanalangin kaninyo, molig-on kaninyo, ug mopaluyo kaninyo niini nga tuig ug sa tibuok ninyong kinabuhi.