Moadto ug Mobuhat uban sa Pagsalig sa Dios

Ang batan-on nga si Nephi sa Basahon ni Mormon nagdasig kanato og usa ka tinguha sa pagpalambo og pagsalig diha sa Ginoo sa pagsunod sa Iyang mga sugo. Si Nephi miatubang og kakuyaw ug posibling kamatayon sa dihang siya misulti niini nga mga pulong sa pagsalig nga kita makahimo ug kinahanglan nga mobati og kalig-on sa atong kasingkasing: “Ako moadto ug mobuhat sa mga butang nga ang Ginoo nagsugo, kay ako nasayud nga ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila” (1 Nephi 3:7).

Kana nga pagsalig nagagikan sa pagkaila sa Dios. Labaw sa ubang mga tawo sa yuta, kita, pinaagi sa mahimayaong mga hitabo sa Pagpahiuli sa ebanghelyo, mibati og pasalamat alang sa unsay gipadayag sa Dios mahitungod sa Iyang Kaugalingon nga kita unta mosalig Kaniya.

Alang kanako misugod kini kaniadtong 1820 sa usa ka batang lalaki diha sa kakahoyan sa usa ka umahan sa estado sa New York. Ang batang lalaki, si Joseph Smith Jr., milakaw ngadto sa usa ka hilit nga dapit ug miluhod aron mag-ampo uban sa hingpit nga pagsalig nga ang Dios motubag. Matag higayon nga mobasa ako sa iyang asoy, ang akong pagsalig sa Dios ug sa Iyang mga sulugoon molig-on:

“Ako nakakita og usa ka dako nga gilis sa kahayag ibabaw gayud sa akong ulo, labaw sa kahayag sa adlaw, nga nag-anam og paubos hangtud kini midapat kanako.

“… Sa diha nga ang kahayag midapat kanako ako nakakita og duha ka Personahe, kansang kahayag ug himaya dili mahulagway, nagtindog ibabaw kanako diha sa kawanangan. Usa kanila misulti ngari kanako, nagtawag kanako sa akong ngalan ug miingon, nagtudlo ngadto sa lain—Kini mao ang Akong Hinigugmang Anak. Paminaw Kaniya!” (Joseph Smith—Kasaysayan 1:16–17).

Ang Amahan mipadayag kanato nga buhi Siya, nga si Jesukristo mao ang Iyang Bugtong Anak, ug nga Siya nahigugma kanato igo sa pagpadala niana nga Anak aron sa pagluwas kanato. Ug tungod kay ako adunay pagpamatuod nga Iyang gitawag kanang batang lalaki isip propeta, misalig ako sa Iyang mga apostoles ug mga propeta karon ug niadtong ilang gitawag aron sa pagserbisyo sa Dios.

Kamo nagpakita sa inyong pagsalig sa Dios kon kamo maminaw uban sa tinguha sa pagkat-on ug sa paghinulsol ug dayon moadto ug mobuhat sa bisan unsay Iyang gisugo. Kon kamo mosalig sa Dios igo sa pagpaminaw sa Iyang mga mensahe sa pagdasig, pagkorihir, ug direksyon gikan sa Iyang mga sulugoon, kamo makakaplag niini. Ug kon kamo dayon moadto ug mobuhat sa unsay gusto Niyang ipabuhat kaninyo, ang inyong gahum sa pagsalig Kaniya motubo, ug moabut ang panahon nga kamo mapuno sa pagpasalamat nga masayud nga Siya misalig kaninyo.