Ol Yang Adalt
Hem I Ples we Mi Stap Go long Hem, I No Ples we Mi Bin Stap long Hem
Hem we i raet i stap long Yuta, YSA.
Mi bin tekem wan rod we i stap aot long rod ia we i smol mo i no isi plante taem, be tru long evri rod ia, mi bin lanem se paoa blong Sevya, mo Atonmen blong Hem, i ril.
Laef blong mi, i no go long wei we mi bin ting long hem.
Taem mi gat 18 yia, mi bin ting se bae mi givim seves long wan fultaem misin, go mared stret afta, mo statem wan famli taem mi gat 25 yia. Naoia, mi gat 32 yia. Mi no go long wan misin, mo mi bin inaktiv long Jos blong wan bigfala pat blong adalt laef blong mi. Mi mared—mi divos—mi mared bakegen.
From se mi bin tekem wan rod we i bin aot long rod ia we i stret mo i no isi plante taem, mi no bin filim oltaem se mi mi pat blong Jos. Be, mi bin kam blong luksave se i gat wan ples blong mi i stap. Ol eksperiens blong mi oli bin tijim mi se paoa blong Sevya mo Atonmen blong Hem i ril, mo we, wanem i impoten, i no ples we mi bin stap long hem, be i wanem rod ia we mi stap go long hem naoia.
Mi ting se, long stat, mi bin gat kwestin long wanem mi bin stap biliv long hem, from se mi no bin gat tras se testemoni blong mi i strong inaf blong mi go long wan misin. Mi tingbaot se, raon long taem ia we bae mi graduet long hae skul, mi bin stap tingting long wan samting olsem: ?Be olsem wanem sapos testemoni blong mi i no blong mi fulwan? ?Olsem wanem sapos mi mi stap dipen tumas long ol testemoni blong ol nara pipol?
Hemia i mekem tingting blong mi i no stret. Mi bin wantem go long wan misin, be mi stap askem miwan sapos ol eksperiens long saed blong spirit we mi bin gat kasem long taem ia oli bin inaf blong mekem wanem we mi ting se wan gudfala misinari i mas gat—wan we i gat inaf paoa long saed blong spirit, mo i bin save inaf abaot gospel blong hem i tijim i go long ol narafala pipol.
Taem mi lukluk i gobak, sapos nomo mi bin askem God blong helpem mi andastanem kaonsel we hem i bin stap givim long Doktrin mo Ol Kavenan 124:97: “hem i mas putum tingting blong hem i stap daon long fored blong mi, … mo bae hem i kasem Spirit blong mi, we i Spirit blong Givhan, we bae i soemaot long hem trutok long saed blong evri samting, mo bae i givim long hem, long stret aoa, wanem nao bae hem i talem.”
Be mi no bin askem God, mo mi go lus taem mi bin stap komperem ples we mi stanap long hem long saed blong spirit wetem ol narawan,’ mo mi bin fraet se ol samting we mi no mekem i stret bae oli holemtaet ol pipol blong akseptem gospel ia;
Miwan nomo, taem mi wan yang adalt, mi bin gohed blong traem faenemaot wanem we mi bin biliv long hem. Mi no bin luk ol nogud samting mi bin stap mekem long miwan, from se mi stap luk nomo se ol wanwan desisen we mi stap tekem, oli no stap soemaot se huia mi. Mi stat blong kamaot long olgeta we mi lavem olgeta from se mi bin save se bae oli harem nogud long ol joes we mi stap mekem. Be, mi go raonem mi wetem ol pipol we oli no kea tumas long wanem we mi bin stap mekem. Wan dei, mi traem dring wan strong dring, from mi bin wantem traem nomo. Nao fasin blong drong i kam pat blong laef blong mi, mo long en, fasin blong dring blong pasem taem i kam olsem wan samting blong haed biaen long hem long taem blong ol hadtaem. Ol nogud jenis insaed long laef blong mi long tetaem ia, oli no fas long wan joes nomo; oli kam sloslo. I tekem mi tu (2) yia blong luksave se ol smol joes we mi bin stap mekem ova long taem ia, oli bin lidim mi long wan ples we mi no bin wantem stap long hem.
Nao. Mi no stap talem se blong save lanem se gospel i tru o no, bae wan i mas go traem oposisen. Ol aksen blong mi oli no mekem mi nomo mi harem i soa, be tu, i mekem ol pipol we mi lavem oli harem nogud—mo plante long ol samting ia, i no nid nomo. Mi mi glad se mi bin save putum tingting blong mi i stap daon inaf blong luksave se (1) mi bin stap harem nogud tumas, mo (2) mi bin hapi moa taem mi bin stap folem ol komanmen blong God. Hemia i bin wan samting we mi bin save miwan, wan samting we mi save stanap mo serem wetem ol narawan.
Mi go luk bisop blong mi blong stretem ol samting, mo mitufala i stap mit oltaem blong mi save rere blong go long wan misin. Kolosap ol pepa wok blong mi oli finis, taem Spirit i talem long mi se bae mi meksua se mi bin andastanem gud samfala long ol joes ia we mi bin mekem. Storian ia i no bin isi, be moa bitim hemia, mi bin wantem go long wan misin; mi bin wantem blong mi mas stret long fored blong God. Mi bin wantem blong tekem long mi wanem we mi bin mekem i rong, mo putum daon evri samting long fored blong Hem blong mi save kam klin.
I no longtaem afta, mi stanap long fored blong wan disiplin kaonsel. Mi bin fraet bigwan blong save talem o admitim wanem mi bin mekem long fored blong ol pipol we oli bin ol lida mo ol tija blong tingting blong mi blong plante yia; be taem mi lukluk i go raon long rum, mi bin filim se mi stap long pis. Mi bin save luk se oli bin stap ia blong save andastanem mi, mo helpem mi. Taem mi aot, mi bin filim Spirit i talem gud long hat blong mi se, nomata wanem desisen bae i kamaot, mi mi stap mekem pat blong mi mo bae mi oraet. Bae God mo ol lida we oli lavem mi bae oli wok wetem mi blong kasem ples we mi nidim blong stap long hem. Mi wokbaot i go, we mi filim lav blong Sevya, mo wetem save ia se, mi tu, Hem i bin pemaot mi.
Wan Ples blong Ol Samting we Oli No Stret Evriwan
Nomata long pis ia we mi bin filim, i bin had blong fesem ol kwestin blong ol pipol we oli bin stap askem se from wanem mi no stap long wan misin. Taem mi bin gohed blong stap wok tru long fasin blong sakem sin blong mi wetem help blong bisop blong mi, mi bin luk se blong go long wan misin, bae i no pat blong fiuja blong mi. Mi faenemaot olsem wanem blong muv i go fored wetem laef blong mi. Mi gat 21 yia, mo mi no stap long grup blong ol fiuja misinari, riten misinari, o mared grup blong ol yang adalt, mo mi filim se mi no pat nating blong wan ples.
Blong deitem ol gel, i strong smol. Samtaem, ol gel bae oli mekem i defren long mi afta we mi talem long olgeta se mi no bin go long wan misin, mo mi bin inaktiv blong wan smol taem. From sam risen, bae mi gat wan fasfala deit nomo, afta i finis ia nao.
Mi hapi se, long en, mi bin save mared insaed long tempol, be samtaem, mi bin stap filim se mi mi no pat blong eni ples. Mi bin gat wan testemoni, be mi no save faenemaot olsem wanem blong serem, mo ol klasrum blong Jos oli stap olsem ol ples blong tes we ol fren blong mi bae oli luk se mi mi no save mekem ol tes ia nating. Mi bin stap tingting se, from plante long olgeta oli gat wan laef ia we mi bin wantem, oli no bin foldaon plante olsem mi.
Wan dei, bisop i singaotem mi, mo i givim wan koling blong tij long kworom blong ol elda. Mi bin sapraes from se mi mi bin go long klas blong kworom blong ol elda, tu taem nomo long las yia. Mi filim se mi bin wari smol, be mi akseptem koling ia. Long fas Sandei we mi tij, mi statem ia wetem wan fas toktok we mi harem se i defren smol:
“Halo ol brata. Mi mi Richard Monson. Mi neva go long wan misin, mo mi bin inaktiv kolosap ful adalt laef blong mi. Mi no stap kam tumas long kworom blong ol elda from se mi no filim se mi mi pat blong grup ia. Bae mi no save ansarem evriwan long ol kwestin blong yufala, be mi hop se bae yufala i tekpat long klas blong yumi evriwan i save lan tugeta. Sapos i oraet long yufala wetem weaples mi mi stap kamaot long hem, nao bae yumi stat.”
Mi bin luksave long dei ia, se mi mi save admitim samting long ol narawan—mo long miwan—se, i nomata we mi no bin save lukluk miwan olsem wan “aro we i stret” (wan we i go long misin, i aktiv ful laef, mo i no mekem ol bigfala mistek), Spirit i poenem mi long sem daereksen olsem olgeta, mo hemia nao i impoten. Long sapraes blong mi, mi faenem se, moa long wan long olgeta man ia we mi ting se oli gat ol laef we oli stret evriwan, olgeta tu, oli bin mekem sam mistek. Mi ting se i sapotem aedia ia long mifala evriwan se, blong stap stret evriwan i no wan samting we wan i nid blong gat blong mekem klas o Jos i impoten.
Ol Taem we Oli Had mo Wan Desisen
Sore tumas, mi no bin stap aktiv long Jos longtaem tumas. Mared laef blong mi i bin had, mo mi tanem mi i go long ol olfala rong fasin blong ronwe long harem nogud blong mi. Mi go stap pasem taem olbaot be mi nomo go long Jos.
Tri yia i pas, mo mi kasem daon long hol. Mi mas mekem wan joes. ?Bae mi save laef folem gospel i nomata wanem i stap hapen insaed long laef blong mi? ?O bae mi jes folem tudak ia nomo? Mi bin save se blong komitim mi blong folem rod ia we i stret mo i no isi, i minim tu se bae mi tekemaot fulwan ol nogud samting we oli stap lidim tingting blong mi long laef blong mi. Mo tu, ol tingting blong mi blong wantem gobak long Jos, i soemaot gud se waef blong mi mo mi, i bin stap long ol defren rod. Wetem ples we mared blong mitufala i bin stap long tetaem ia, mitufala i stap go blong divos finis.
Mi bin fraet. Mi no luk nating se, sapos mi hadwok, bae mi kasem ol gud samting we mi bin wantem long laef ia. Be desisen blong mi i kambak long wanem mi bin lanem plante yia bifo—se mi bin hapi moa taem mi bin stap laef folem gospel. Mi disaed blong komitim mi fulwan, mo putum mi long han blong God, i nomata wanem bae i kam. Stat long tetaem ia i go, hem i bin mi mo Hem nomo.
Wan moa taem, mi stat blong gobak long Jos mo gohed blong stretem laef blong mi. Wan long dei we i moa hapi long laef blong mi, i taem mi kasem tempol rekomen bakegen. Mi bin faenem pis insaed long tempol, mo semtaem mared blong mi i gohed blong go brokbrok, kasem taem we mared laef i stop.
Stap Faenem Ples we Mi Filim se Mi Impoten
Bae yufala i harem se desisen ia, i mekem man i fraet smol. Be tru long eksperiens ia, mi bin lanem blong talem tangkyu from han blong God long rod blong mi. I nomata we mi bin folfoldaon, mi no lusum resis ia yet. Mi no bin stap kompit wetem wan narawan. Taem mi bin dipen long Sevya blong save se mi bin impoten, mi stopem evri hadwok blong mi blong traem jenisim hao nao ol narawan oli bin stap lukluk mi.
Mi faenem se mi sidaon long Jos, mo i bin oraet nomo blong mi sidaon miwan, o long medel blong ol memba we oli stap long ol defren taem blong laef blong olgeta. Mi traem bes blong mi no go haed, mo mi stanap nomo i stap blong mi save toktok wetem ol pipol insaed long wod blong mi. Mi bin glad blong save go long ol miting blong mi.
From se mi bin gat pis ia, i bin helpem mi tu blong stap deit bakegen. Mi no stap deit tumas wetem sem woman tu taem, be naoia, mi bin save se mi no nid blong salem ol standet blong mi, from nomo mi bin mestem rod bifo. Mi bin stap laef folem gospel folem hamas paoa we mi bin gat, mo mi bin gud inaf blong deitem olgeta we oli bin stap laef folem gospel, long bes wei we oli bin save mekem tu.
Long en, mi bin faenem wan gudfala gel blong God, we mi bin maredem insaed long tempol. Rod blong hem i bin defren long hemia blong mi, be taem i kam long lav blong Sevya, mo blong andastanem Atonmen blong Hem, mitufala i stap long sem pej oltaem.
Ova long ol yia, mi bin lanem se bae mi no lego laef blong mi bifo, o bae mi no lego tingting blong ol nara man oli talemaot hamas mi mi impoten. Mi lego ol tingting ia se, sakses, i olsem wan set blong ol eksperiens blong laef. I no evriwan i glad long ples we mi stap long hem naoia, from rod ia we mi bin folem blong kasem ples ia, mo hemia i oraet tu. I no gol blong mi blong winim tingting blong olgeta. Hem i gol blong mi blong save sakem sin, mo kam kolosap long Sevya. Hem i from Hem we, olsem Yangfala Alma afta we hem i bin sakem sin, we bae “mi nomo tingbaot ol sin blong mi we oli bin givim hadtaem long mi” (Alma 36:19). Mi save stap long pis from se mi save weaples mi stap go long hem—long Sevya—mo hemia nomo mi kaontem.