ʻI he Potu Toputapú
ʻOku tau fakamanatua he taʻú ni ʻa e taʻu 200 ʻo e ʻUluaki Mata Meʻa-hā-mai ʻa Siosefa Sāmitá. Naʻe kamata ai hono Fakafoki mai ʻa e ongoongolelei ʻo Sīsū Kalaisí ʻi he Vaoʻakau Tapu fakaʻofoʻofá. Naʻe liliu ʻe he meʻa fakaofo ne hoko ko iá, ʻa e hisitōliá, kau ai ʻetau moʻuí kotoa. Kae mahuʻinga taha kiate aú, kuo hoko ia ko e meʻa fakafoʻituitui mo e liliuʻanga moʻui.
ʻI heʻeku ngāue fakataha mo hoku husepānití ʻi he Misiona New York/Pennsylvania Historic Sites, naʻe lahi e taimi naʻá ku lue ai ʻi he kelekele toputapu ko iá. Naʻá ku maʻu ha faingamālie ʻi he faama ʻa e fāmili Sāmitá ʻi Palemaila, Niu ʻIoké, ke fakaʻeveʻevaʻi ai ha kau ʻaʻahi mei he funga ʻo e māmaní mo e ngaahi tapa kehekehe ʻo e moʻuí.
Te tau lava kotoa ʻo ako mei he sīpinga ʻa e fāmili Sāmitá pea mo e fuofua kāingalotu kehe ʻo e Siasí. ʻOku akoʻi mai ʻe he ʻUluaki Mata Meʻa-hā-mai ʻa Siosefa Sāmitá ʻa e founga ke maʻu ai e fakahaá, ʻo hangē ko hono fakamatalaʻi ʻe Palesiteni ʻAealingi ʻi he peesi 12. ʻOku fakamoʻoni ha Kau Taki Māʻolunga kehe ki he moʻoni ʻo e mata meʻa-hā-mai ko iá ʻi he peesi 18.
Ko ʻeku fakaʻamu ʻi heʻetau fakamanatua e taʻu ʻe 200 talu mei he ʻUluaki Mata Meʻa-hā-maí, ke tau fakakaukauloto ki he ngaahi tāpuaki kotoa kuo tau maʻu ʻi heʻetau kau ʻi hono Fakafoki Mai ʻa e ongoongolelei ʻo Sīsū Kalaisí.
Sisitā Karen Russon Neff