Man Tii Bwaai Aika a Maiu Man te Iti: Kairake n Ikawai
Kuneakin te Kimwareirei ni Karaoan ana Mwakuri te Uea
Ngkai te kairake n ikawai, te maiu e rang tatabetabe. A rang mwaiti bwaai aika ti kona ni karaoi: n karakai riki ara reirei, kakaea raora ibukin te maiu ae akea tokina, baireia bwa tera nakoara, ni waakina te katei utu. Ao n raonaki ma bwaai aika raraoi akanne, ti a tia ni kaungaaki bwa tina “kuneaki ni karaoi ana mwakuri te Uea.”1
“Ai bon taina ibukira ni kabane bwa tina matata raoi n tibwangara ni kabirimwaakan te mwakuri ni kamaiu. Ngkai ti karaoi mwakuri ni mitinare irouia membwa, … mwakuri n te tembora ao rongorongon te utu, ao n reiakina te euangkerio n aron ae ai bon mwakoron maiura, tina rinanon te kimwareirei ae bati ao ni kakabwaiaaki ni bwai n tituaraoi n te tamnei ake ti kainnanoi ni kakorakoran te Ekaretia.”2
Aikai tabeman kairake n ikawai ake iai tabeia ake a kunea te kimwareirei ni karekean aia tai ibukin ana mwakuri te Uea.
Kateiriki n te Utu: Ea Tibwa Waaki Ngkai
“Kaokan te Ekaretia e a tia ni karaoa ae mwaiti ibukiu ibukina bwa Ia ataia bwa utu a kona n ikotaki n akea tokina,” e taku Itumeleng Tlebere mai Maseru, Lesotho. “I kona n noriia tibu ao au bakatibu ake a tia ni mate. Anne bukina ae I rang n tangira te kateiriki n te utu. Ibukina bwa Ngai te moan roro inanon te Ekaretia, e rang mwaiti te mwakuri ae N na karaoia ibukiia.”
Itumeleng e ataia man te taneiai are e rinanona bwa kakaean rekooti ao rongorongo a kona ni kangaanga ma e kaungaia kairake n ikawai ake tabeman bwa a na waakina rongorongon te utu: “Tii waaki karaoia. … Rongorongon te utu e a tia n anganai te kakaitau ni bwaai ni kabane ake I karekei.” E kona n titebo ma ngkoe.
Mwakuri n Ibuobuoki: Riki bwa Bain te Atua
Lucy Fergeson mai Utah, USA, e tibwaia bwa e kanga te mwakuri n ibuobuoki ni buokia rinanon ana wiiki ni kangaanga inanon maiuna—ma n te kawai ae aki kantaningaaki. Ai bon wiikin te kabanea n ukeuke n te reirei, te wiiki ni katabetabe, ao raona e a katoka ana reitaki ma neiei. Ao imwiina e taku, “I’ mwaninga, ma ngai ma toau n ibuobuoki ti baireia bwa tina karaoi amwarake kabuki ibukiia aine ake ti katabeaki bwa tina buokiia.”
Ngke a uaia ni karaoa aia umum, toan Lucy n ibuobuoki e ongora, nanoangaia, ao e anganna ana taeka n reirei. “Karaoan ao nikirakin amwarake ni kabuki bon tiaki te bwai are e na rang ni kakaawaki ke ni karika te bitaki,” Lucy e ururing rikaaki. “Ma imwiina ngke e nikirai toau ni mweengau, I ataia bwa bon ngaia raoi te bwai are I kainnanoia n namakina ae raoiroi riki ao bwa te Atua e kanakoia aomata tabeman bwa a na riki bwa baina. Tera raoi ae nakoraoi ibukiu bon te ibuobuoki are e roko mairoun toau n ibuobuoki n onean mwiia tititati ake a katabeaki ibukiu. I rang kukurei bwa e buokai n namakinna bwa I aki maroa ao bwa I bon tangiraki.”
Te mwakuri ni mitinare: Maiu n Riki bwa te Banna ni Katooto
Tiaki nanona bwa kona riki bwa te mitinare ae bwanin ana tai bwa ko aonga ni kona ni kabuta te euangkerio. Vennela Vakapalli, mai Andhra Pradesh, India, e kabwarabwara, “Ngkana I toka iaon taian bwati, ngkana I toka iaon taian turein, I kauka ana Boki Moomon ao I warekia. Ao a mwaiti aomata aika a titirakinai ibukina.”
Ashlee Dillon mai Utah, USA, e tibwaia: “Tao ibukina bwa I aki nako ni mitinare e a aki nanonaki bwa tiaki ngai te mitinare. Ngkai I aki kitaniia au utu ni beku ibukin te Uea, I beku ibukin te Uea n au utu. I buokiia tabeman, ao I maiu n riki bwa te banna ni katooto bwa ana reirei Iesu Kristo.”
Aro ni Karo: Reireia Ataei te Euangkerio
Ingrid de Bastian Ortiz, mai Veracruz, Mexico, bon te tina ae 26 ana ririki irouia natina aika teniman. E kabwarabwara, “Ngkai karo ngaira irouia ataei aika a uarereke, iai bong aika ti aaki ata te bwai ae ti na karaoia, ma taabe aika mwaiti ao n aron naba te tararua are a kainnanoia ataei”. E ngae n anne, ti namakina te katabeaki ae korakora n reirei te euangkerio nakoia natira bwa a aonga n ataia bwa ngaiia natin te Atua.
“Tabeu ngkai te tina bwa tina buokiia bwa a na ataia bwa Tamara are i Karawa iai ana baire ni kakukurei ibukiia.”
Riki ngkana ko tuai n riki bwa te karo, ko kona naba ni karaoa am itera ni buoka reireinakiia ataei. “E bon rang ni kakaawaki bwa a na ataia ataei reirei ao tuua aikai,” e taku Ingrid, “bwa ti bon kona ni karaoi ngkai kairake aika tuai n iein ke ikawai aika a tia n iein n tabeua nakoa n te Moanrinan ao te Neturii.”
Ngaira kairake n ikawai ti bane n tabetabe ni kabane. Ma tao tera are ko kaitara ma ngaia, ko kona ni karekea te kawai ae beebete ni karaoan ana mwakuri te Uea n aro nako inanon maium—ae bubura ke ae uarereke.