A kanga Kairake n Ikawai Ni Karaoa te Bitaki inanon Kaokan Bwai ae Reitinako

Ngke e taetae ibukin ara roro, E reirei Beretitenti Nelson, “Kam maeka inanon te ‘katebwimateuana n aoa.’ E a tia te Uea ni katanoata bwa aio te kabanea n tai ae E na weteia ana tia mwakuri nakon Ana nne ni kurebe n ikotiia ake a rineaki man maninganingan te aonaaba ake aua. (Taraa R&B 33:3–6.) Ao ko kanakomaiakaki bwa ko na ira buakon te ikotaki.”¹

Iangoa te ware ae 65,000 mitinare ake a tibwaua te euangkerio n te bong teuana, ni katoa bong, ni kabuta te aonaaba. Iangoia ni kabane kairake n ikawai aika a karaoi berita aika tabu n te tembora, kabonganaan ana kakabwaia te nakoanibonga ao kakabwaia n te tembora aika a kaokaki ao te berita ni kakaonimaki, ni kakorakoraia utu, ao n katean abanuean te Atua i aon te aba. Iangoia kairake n ikawai n aia beku bwa taan Kairiiri n te Ekaretia ni kabuta te aonaaba. Iangoia nake a teimatoa n iriira Iesu Kristo ni kaitarai kaangaanga ake a kaitara ma ngaai. Kairake n ikawai bon mwakoron Kaokan Bwai ae kakaawaki man te moantai. Ao Kaokan Bwai ae reitinako e a tia n riki bwa mwakoron maiuia kairake n ikawai aika a mwaiti ake kaain te Ekaretia.

Iroura ngaira aika a mwaiti, ara waaki ni Kaokan Bwai e mwanganako man baike a reireinira. Iroun Vennela Vakapalli, te kairake n ikawai are rairaki mai Andhra Pradesh, Inria, “Kaokan Bwai bon karekean kaotioti. Iotebwa Timiti e ukora te kaotioti n te buakonikai. E reitaki ma te Uea, e tataninga te kaeka, e bon tataonakinnano. Anne ae I tangiria.” E kabwarabwaraa Vennela, “Imwain ae I ongo taekan Kaokan Bwai, e aki bati au atatai iaon ukorakin te kaotioti. Teuana te bwai ae korakora are e kamimiai bon mwaitin te tai are e kabanea ni karekei kaotioti mairoun te Atua. Anne are I reiakinna man Kaokan Bwai.”

Emma ao Jacob Roberts, te taanga n ataei mai Utah, USA, a booraoi n iango bwa Kaokan Bwai bon taekan te “kaotioti ae reitinako”—ibukira ao ibukin te aonaba—”bwa iai ara burabeti, te tia taetae i aonaba mairoun te Atua, ae taraia bwa tera nako are e uotia te aonaba, iai temanna are e mwakuri man tataro ao n reitaki ma te Atua n taraia bwa ti tauraoi ao ia ara kona n kaitara kakaewenako nako ake e uoti te aonaba ngkai e bitaki.”

“E bati te atatai are e roko man Kaokan Bwai are e kanakoraoi man kabebetea maiu,” e taku Jacob. E roko man te aki nanokokoraki “bwa iai te Atua are tangiria ao are e tararuaira,” e taku Emma. “Nanona bon kukureira. Ngkai ngaira kairake n ikawai, ti kona n onimakinna man iriiria ibukina bwa ti ataia bwa Ana kouru bon kakukureiara. Ti ataia bwa e aki mamate tamneira, ao anne e anganai te kantaninga ma te onimaki, bwa tera nako are I karaoia ngkai ao tera nako kairua ake I karaoi ngkai, I kona n raira nanou ao aio au tai n rikirake ao n reirei.”

Te aeka n karaunano anne e buoka naba Ramona Morris, te kairake n ikawai mai Barbados, ngke e moan reiakina taekan Kaokan Bwai. Ibuakon bwai riki tabeua, e karekea ana koaua bwa “Tamara are i Karawa e tauraoi ibukira. Kaokan Bwai e uota te rau nakoia nake a aki oota ni maiuia ao ake a aki oota n ana baire te Atua.”

Ma e ngae ngke te oota n Kaokan Bwai e uota te mataata nakon maiuna, e taekinna naba bwa “te raroa man ana Etekuata te Ekaretia, e matoatoa te reitaki ma te euangkerio, ma ibukina bwa iai au koaua ae korakora n te euangkerio ae kaokaki, I ataia bwa n raroau ae ngkai, I teimatoa n namakinna bwa ngai mwakoron Kaokan Bwai, ao I aki maroa.”

Ao e bon aki. Kairake n ikawai ni katobibia te aonaaba a ira buakon Kaokan Bwai rinanon te mwakuri n te tembora, te tabo n riki, ao te mwakuri ni mitinare. Man te oota n te kaotioti ae onoti are ti karekea man reiakinan Ana Moan Kaotioti Iotebwa Timiti.ao Kaokan Bwai, ti bane ni kona n reitinako n ukoukora nanon te Atua ao tera ae ti kona n karaoia n Kaokan Bwai ae reitinako.

Tamnei

world map

Mabe mairoun Getty Images

Tao bon kairake n ikawai ngaira, ma ti kona n riki bwa taan kairiiri n te Ekaretia ngkai. E ngae ngke bon ti ngaia kaain te Ekaretia n ana utu, Janka Toronyi mai Győr, Hungary, e kakorakoraaki n aia waaki raona n kairake n ikawai n iteran Kaokan Bwai ake tabeua: “Tabeman raoraou a tia n nako ni mitinare, ao e bon kakukurei noran rikirakeia ao imwina a oki ao e korakora rikirakeia rinanon baike a rinanoi. Bon te tai ae tamaroa ibukira ni kabane. Ao e kakukurei n tainako noraia raoraou aika kairake n ikawai ni beku n nakoaia ao n tabetai iai taai ake a anga aia tai, n anga nanoia n riki bwa kauntira n te FSY (For the Strength of Youth) maungatabu. I namakinna bwa Kaokan Bwai tiaki ti reireinaia aomata te euangkerio—ma bon kakorakoraiia membwa ake iai iroura.”

Kairake n ikawai i Hungary a oota bwa bon ngaiia taan kairiiri n te Ekaretia n taai aika a na roko. “Ti bon kainnanoaki ao ti kainnanoa te katauraoi nakon te beku anne, are n tabetai e rawawata“ e taku Janka. “Te Uea e kabirimwaka ana mwakuri ao ngaira bon kaaina. N tabetai ti titiraki, ‘N na kanga ni karaoa nanon aei?’ Ma e tamaroa norana bwa e bati aia onimaki ara taan kairiiri iroura. E kaunganano nakoia nake a tangira te Ekaretia ao ake iai aia koaua aika matoatoa, ibukina bwa ti ataia ae teuana te bong ti na bon katabeaki. Ti riai ni karaoa tabera ibukin oin rikirakera n tamnei.”

Sean ao Stefany Joseph mai Aotiteria Maeao a ira buakon Kaokan Bwai man te anga reirei nakoia kairake n aia uoote. “Ngai irou, iran buakon Kaokan Bwai e bon buokia te roro ae na roko n oota bwa tera te euangkerio ao e na kanga ni buokia ao tabeman inanon maiua,” e taku Stefany. Ti kona n ibuobuoki ni katean aan te Ekaretaia ae matoatoa n oin abara n taai rimwi.”

“Ti tangiria ni buokiia kairake ni karekea aia koaua Ana Boki Moomon ao Iotebwa Timiti ao n ataia i bon irouia bwa bon ngaiia natin te Atua,” e kabwarabwara Sean. “Tiaki tangiria bwa ti te bwai are a aneneia n te Moanrinan—ti tangiria bwa a na ataia bwa e bon koaua.”

Iroun Vennela, maiuakinan te euangkerio i Inria e aki bebete n tainako, ma e atai korakoraia kairake n ikawai ake membwa ni kaungaia tabeman ao ni karikirakea Kaokan Bwai. “Ikai, ni kabane kairake n ikawai a kakaonimaki. A kakaei taai n tibwauai aia koaua,” e taku. “Ngaira kanga bwaeonia i Inria. Ti mwaing man tabo aika a kakaokoro ao tabeman mai iroura a kitaniia aia utu. Te maiu e kona n kakaewenako ikai, ma ti teimatoa n rineia ni maiuakina te euangkerio. Koroboki aika tabu a anganai te kantaninga ae bati, te korakora, ao te ungannano.”

Bwa ti mena ia, ngkai kairake n ikawai ngaira, ti kona n teimatoa ni kakorakora ara waaki iaon Kaokan Bwai ae reitinako rinanon ara onimaki ao ara motinnano nakon te euangkerio.

Ngaira bon kabwaian te Ekaretia n taai aika a na roko. Ti waaki n ara kabanea ni buaka. Tamara are i Karawa e onimakinira bwa ti buokia n Ana mwakuri—Ana mwakuri ae akea tokina ni bita te maiu. E ataia bwa e tau korakorara n teimatoa ni waaki nako ao ni buaka n kaitarai bwai ni kabane ake e na kanakoi te tia kakaitara. Ao Tatan e a moanna ni bwarannano. E ataia bwa e buaka n te buaka are e na konaaki iai ibukina bwa e na bon tokanikai ana mwakuri te Uea.

“Ti ataia bwa te Uea e kabirimwaka ana mwakuri ao akea ae kona ni katokia,” e taku Janka. “Ti ataia bwa e na bon riki n akea tuukana. Ma ti a tia n motikia bwa ti na riki bwa mwakorona ao ni buokia ni waaki nako ke n mamataku man te tabo n mataku. Iai inaomatara n rinerine n riki bwa mwakorona, ao iai ara koaua ni kona n rinea ae eti ao n rineia n iriira Iesu Kristo. Ti riai n riki bwa mwakorona.”

Ngaia are e bon nakoira bwa tera te tabo ae ti mena iai.

E bon nakoira karekean te ninikoria n tei ibukin baike ti kakoauai.

E bon nakoira karekean kaotioti aika a onoti ni maiura.

E bon nakoira kakorakoran ara onimaki iroun te Tia Kamaiu man kakaewenako aika kaangaanga ake ti katarai.

E bon nakoira iriirana ao karaoan bwai nako ake ti kona n karaoi n uotia aomata nako Ina.

E bon nakoira ara teimatoa ni karokoa te toki nakon ara kona.

Ti bon mena n te kabanea ni bong. Ao ni kaira te Ekaretia n te tai are e aranna Beretitenti Nelson bwa “tai ae te kabanea n kairoro n roro n rongorongon te aonaaba”² taraana bon te tabe ae rawawata. Ma iangoa aei—Tamara are i Karawa e tau onimakinara irouna ao e kawakinira nakon te tai aei n te aonaba n te tai ae onoti aei, te tai are ti kaitara iai ma kariiri ao kamwaamwane aika a a mwaiti ao iango ni kakaitara aika a mwaiti.

Man kanakomaiara ikai n te tai ae te kabanea n kakaawaki, Tamara are i Karawa e aki karuoira bwa ti na konaaki. E atai ara konabwai, korakorara, ninikoriara, ao n te kabane, E ataia bwa ti kona ni karaoa te bitaki n Kaokan te Ekaretia, n aki taraa ara ririki ke ti a tia n iein. E ngae ngke e taraa n rangi ni kangaanga kataakira, ke kaangaangan kairan ao tibwauan te euangkerio ni kabuta te aonaaba, ma ngkai raora Ngaia, antai ae kona ni buaka ni kaitaraira? E na buokira n karaoi baika a aki kona ni karaoaki.