Karekean Au Onimaki Teutana imwiin Teutana

I ikawai rake n tain te bitaki i abau. Aomata aika mainaina aika a karako mwaitiia a kairaki iroun Ian Smith e katanoata te inaomata mairoun Buritan n 1965. Anne are e a katoka iai ana iokinibwai te United Nations ao ni waakina te buaka ni karokoa 1980, are e a karekea iai inaomatana Zimbabwe. Ngke e bane au reirei, I mwaing nakon te kaawa ni mwakuri ao n aki taromauri inanon tabeua te ririki.

N te bong teuana ao I takakaro ma natin au bwaoti aika mwaane. Bon ruaiwa ao waniua aia ririki. A taku, “Ko ataia ae tamara bon te beretitenti n te mwaanga n ara Ekaretia.” A kabwarabwara bwa tera te beretitenti n te mwaanga ao, n aki iango, I taku, “Tamam e na aki nako karawa.” I ataia bwa I a tia ni karaoa te kairua ae bubura, ao I iangoia bwa tera ae N na taekinna nakoia bwa a na mwaninga au taeka. N tokin te bong, ngke a nora tamaia, a biri nakoina ao n tuangnga te bwai are I a tia n taekinna. N au iango N nang kabua au mwakuri.

E a tia au bwaoti ni kaota nakoiu te tiaekete imwaina ngke e mena n te taanga ni buaka are e kaotia bwa e a tia n tiri aomata. Anne bukina ngkai I taekina te bwai ae I taekina. N te kawai ae rangi n rau, e titirakinai bwa bukin tera I taekina anne. I taku, “Bwaoti, ko uringnga, are ko tuangai bwa ko tiringiia aomata n te buaka. E taekinaki inanon te Baibara, ‘Tai tiri aomata.’”

E titirakinai bwa tera te aro ae I kainna. I tuangnga bwa I kakaea ngkoa te Taromauri ni Katorika ma I tuai manga iria inanon ririki aika a mwaiti. E tibwauai atatai n te O Tetemanti iaon buaka ao itabarara, ao imwiina e anganai Ana Boki Moomon. I rangi ni kukurei bwa e aki bua au mwakuri.

E anganai Ana Boki Moomon n 1981, ma I aki roko n te warekia ke ni kaukia inanon uoua te ririki. N te Tabati teuana I rangi ni botu ngke a nakon te taun raoraou, ngaia are I a anaa te boki ao n nakon te tabo n tataninga ibukin te turein ae uakaan ao ni wareware. Ngke I wareware n te tai anne, I kona n namakina te kaunganano ni karaoa ae raoiroi, ma tera te bwai ae kaungaai imwiin au wareware bon 3 Nibwaai 11. I wareka taekaia Nibwaite ake a kamaiuaki ake a tia n rinanon te buaka ao te kangaanga ae korakora ao imwiina te Tia Kamaiu Iesu Kristo e kaoti nakoia.

E a tia abau n rinanon ara buaka inanon 15 te ririki. Tabeman aomata aika I ikawai rake ma ngaia n au kaawa a tia n nakon te buaka ao aki oki. Tabeman a mwauku ni uaa mateia.

Ngaia are, ngke I wareka taekaia Nibwaite, I namakinna ae kanga e kawarai te Tia Kamaiu Iesu Kristo ngke E taku, “Teirake ao nakomai nakoiu, bwa kam aonga … n namakina mwiin te nera i baiu ao i waeu, bwa kam aonga n ataia bwa bon ngai Atuan Iteraera, Atuan aonaba ae bwain, ao I a tia n tiringaki ibukin buren te aonaba” (3 Nibwaai 11:14).

I namakinna ae ti tebo ma E roko irou, e kaoai bwa N na Nakoina. I namakinna bwa I kona ni karaoia. Te namakin aei e bitii bwaai ni kabane.

E bon reke tabeua te namwakaina ni karekea te ninikoria n nako n te taromauri. I ataia bwa e mena ia te ekaretia, ma akea mitinare n ara mwaanga ae uarereke. Ni Beberuare 1984, I nakonako inanon ana umwantabu Kwekwe. I tangiria n nakoko n otinako. I aki koaua bwa ngai kaina ao I tekateka mai buki, n tauraoi n otinako ni waekoa. Imwiin te kaukuki n te anene ao n te tataro, te beretitenti n te mwaanga, Mike Allen, e kaota ana koaua ibukin te Tia Kamaiu Iesu Kristo ao Ana Boki Moomon. I namakina te reitaki. Te aomata are imwiina e kaota naba ana koaua iaon te Tia Kamaiu ao Ana Boki Moomon, ao e karaoia naba te kateniman. I bon rotaki n te kukurei ae korakora. I aki kona ni karekea te ungannano n nakon te tabo n taetae, ngaia are I tei n te tabo are I mena iai ao n taku, “I tangira Iesu. I wareka Ana Boki Moomon.” Ao I tekateka. Anne moanakin au koaua.

Tamnei

1. Legs with bare feet, 200 liter barrel being pushed along dirt road. Scene of Zimbabwe in background. 2. Legs walking off page. Pants and shoes suitable for church. African scene in bkgrd. _Spot: Elder Dube approx 22 yrs old bearing testimony from church benches.

Koaua aikanne bon ana kawai te Uea ni karoko nakoiu ibukina bwa e buokai n namakinna ae ngai bon kaain naba ikekei. I namakinna bwa aikai bon tariu ao mwaneu. Ni boong ake imwiina I tataro ibukiia ao ibukin te butimwaeaki. I kaitibo ma membwa ikekei aika a rangi n akoi ao a buokai.

E mwaiti te bwai ae riki n te bong anne ngke I nakonako n rin n te umwantabu. I mimi bwa tera ae na riki ngke membwa aikanne a aki kaota aia koaua. Ko aki kona n ataia bwa iai temanna ae iai ana kangaanga. Ngkana ko teirake ao n taekina te bwai ae ko namakinna, e kona n ae bon te bwai ae kainnanoia temanna bwa e na ongo.

Kaota am koaua n taainako. Ngkana ko karaoia, ko kakorakorako ao tabeman ake irarikim. Riiki bwa te banna ni katooto n te bwai ae ko ataia. Ngkana ko iri reirei man Ana Boki Moomon, ko na kaan riki nakon te Tia Kamaiu.

Te tai are I kabanea n te Loreto Roman Catholic Mition e moanaki kawaiu n riki bwa ana reirei te Tia Kamaiu Iesu Kristo. Man te tai anne I a tia n reiakinna bwa te riki bwa ana tia reirei Iesu bon te mwakuri ao ti kainnanoia n teimatoa ni waaki rake n aki tabe ma mamarara ao kabwakara. Ti butimwaea te kakao: “Ma ngaia ae kam na moaniban te raoiroi, n ai aron Tamami are i karawa ngkai moaniban te raoiroi” (Mataio 5:48), ti na waaki nako nakon te maiu are akea tokina “teutana imwiin teutana, te reirei teuana i mwin teuana” (taraa Reirei ao Berita aika Tabu 98:12).

Ti ataia bwa ara taneiai ni maiura e na bon aki bebete n tainako, ao ti na rinanon tabeua kangaanga ao maraki n nano inanon te waaki, ma taraakin te Uea bon ti te kawai ni karekean te rau inanon maiura.

Ana Mwakuri ni Kamaiu te Tia Kamaiu Iesu Kristo bon te bwai ae moan te kakaawaki irou. I ataia bwa te Uea e ukoria ni karikirakea te reitaki ma ngaira. Ti kainnanoia n tararake, n Iria, ao ni karoko ni buokiia tabeman n te kawai ae E karoko iroura ao n tabekira rake.