Ko Hono Taʻofi Hoʻo Ngaahi Holi Fakakakanó: Founga ke Fakafenāpasi ai e Ngaahi Fakakaukau mo e Ongo Fakasekisualé ki he Finangalo ʻa e ʻEikí

ʻOku aʻusia ʻa e ngaahi ongo fakasekisualé ʻe he tokolahi taha ʻo kitautolu ko ha konga ʻo ʻetau aʻusia fakamatelié. Neongo ʻoku hoko e ngaahi ongo ko ʻeni ne ʻomi ʻe he ʻOtuá ko ha konga mahuʻinga ʻo ʻEne palani ki heʻetau fiefiá, ka kuo ongoʻi ʻe hatau tokolahi ʻa e holi ke fakahoko kinautolu ʻi ha founga ʻoku ʻikai fenāpasi mo ʻEne ngaahi fekaú.

ʻI heʻetau taʻu hongofulu tupú ʻo aʻu ki heʻetau hoko ko e kakai lalahi kei talavoú, kuo foua ʻe hotau tokolahi e ngaahi faingataʻa ʻoku hoko mei hono ako e founga ke fakafenāpasi ai e ngaahi ongo fakasekisuale ʻoku haʻu mo ha sino fakamatelié ki he finangalo ʻa e ʻEikí ki he founga ke tau fakaʻaongaʻi ai e meʻaʻofá ni.

ʻOku fakamoleki ʻe hotau tokolahi ha konga lahi hotau ivi fakalaumālié ke feinga ke tukunoaʻi e ngaahi ongo fakasekisuale ʻoku tāú. Ka ʻoku ʻikai ko e finangalo ia ʻa e Tamai Hēvaní ke tau tukunoaʻi ia! Ka ʻokú Ne finangalo ke tokoniʻi kitautolu ke tau ako ke ʻiloʻi mo taʻofi ʻetau ngaahi fakakaukau mo e tōʻonga fakasekisualé. ʻE tokoni lahi kiate kitautolu hono fakatupulaki e tuʻunga malava ko ʻení kimuʻa mo e hili ʻa e malí.

Naʻe akoʻi ʻe ʻAlamā, “Taʻofi … hoʻo ngaahi holi fakakakanó, koeʻuhi ke ke fonu ʻi he ʻofá” ( ʻAlamā 38:12). Ne ʻikai pehē ʻe ʻAlamā ke liʻaki hoʻo ngaahi holi fakakakanó—koeʻuhí ʻoku ʻikai kovi ʻa e ngaahi holi fakakakanó. Ka naʻá ne naʻinaʻi mai ke tau taʻofi pe mapuleʻi ia kae lava ke tau fonu ʻi he ʻofá.¹

Te tau lava fēfē leva ʻo taʻofi ʻetau ngaahi holi fakakakanó? Ko ha ngaahi meʻa ʻeni ʻe niʻihi ʻe lava ke tokoni atu ʻi hoʻo akoako “lue” ʻi he hala fononga mahuʻingá ni.

ʻUluakí, ʻoku tokoni ke mahino e ngaahi meʻa ʻokú ne tākiekina hoʻo malava ke mapuleʻi e ngaahi holi fakasekisualé. ʻE tokoni e mahino ʻa e ngaahi meʻá ni, ke ke mapuleʻi lelei hoʻo ngaahi ongo fakasekisualé:

• Saienisi ʻo e Moʻuí (Biology): ʻOku fakatupu ʻe he sino takitaha ha tuʻunga kehekehe ʻo e ngaahi kemikale ʻokú ne fakatupu ʻa e holi fakasekisualé. ʻI heʻene peheé, ʻe kehekehe pē ʻa e lahi ʻo e meʻa ʻe fefaʻuhi mo e tokotaha kotoa.

• Ngaahi Tōʻonga Moʻuí: Kapau kuó ke angamaheni ʻaki hono fakatōliʻa e ngaahi fakakaukau mo e holi fakasekisualé, mahalo ʻe kiʻi faingataʻa ange ke liliu ia. Ko ha ngāue taimi lōloa hono fetongi e ngaahi tōʻonga moʻui ko ʻení ʻaki e ngaahi tōʻonga moʻui ʻoku leleí. Kuo pau ke ke tukupā ke toutou feinga pē neongo ka ke ka tō—mo fakamolemoleʻi koe—ʻi hoʻo fakahoko e foungá ni. ʻI ha ngaahi tūkunga ʻe niʻihi, ʻe ala tokoni atu ha taki ʻo e Siasí pe tokotaha ngāue fakapalofesinale ki he moʻui lelei fakaʻatamaí ke ke ikunaʻi e ngaahi tōʻonga moʻui ʻoku koví.

• Ngaahi ongo faingataʻá: ʻOku fakahoko ʻe ha kakai ʻe niʻihi e ngaahi fakakaukau mo e tōʻonga fakasekisualé ke fakanonga ʻaki e ngaahi ongo hangē ko e loto-hohaʻá, tuenoá, pe loto-mafasiá. Ako ke ke fakatokangaʻi e ngaahi ongo ko iá. Fakakaukau ke ke fakamālohisino, hiki hoʻo tohinoá, ʻalu ki ha faifaleʻi, pe ko ha faʻahinga founga kehe ʻoku leleí ke fehangahangai ai mo e ngaahi ongo ko ʻení.

• Hōloa e mahuʻingaʻia ʻiate kitá: ʻOku faʻa holoki ʻete tukupaá ʻe he ongoʻi taʻemahuʻingaʻia ʻiate kitá. Fakakaukau ke ke kau ʻi ha ngāue tokoni mo ha ngaahi ʻekitivitī kehe ʻe tokoni atu ke ke ongoʻi leleiʻia ʻiate koe.

• Ngaahi vā fetuʻutaki fakangalingalí: He ʻikai teitei fetongi kakato ʻe he vā fetuʻutaki fakangalingalí ʻa hoʻo fie maʻu ha fetuʻutaki moʻoní. Ngāue leva ki hoʻo pōtoʻi fetuʻutakí mo fakatupulaki ha ngaahi feohi fakakaungāmeʻa lelei. Fekumi ki ha ngaahi faingamālie fakasōsiale mo ha ngaahi meʻa fakamānako ʻoku leleí. Ko e fetuʻutaki mo e niʻihi kehé ko ha meʻa mahuʻinga ia ki he lavameʻá.

Hili e ʻaukai ʻa Sīsū ʻi ha ʻaho ʻe 40, naʻe ʻahiʻahiʻi Ia ʻe Sētane ke liliu e fanga foʻi maká ki ha mā. Naʻá Ne tali ange ʻo pehē, “Kuo tohi, ʻE ʻikai moʻui ʻa e tangatá ʻi he maá pē, ka ʻi he folofola kotoa pē ʻoku haʻu mei he ʻOtuá” (Mātiu 4:4).

Ne ʻikai fakafepakiʻi ʻe he Fakamoʻuí e ʻahiʻahi ʻa Sētané ʻaki Haʻane pehē ange naʻe ʻikai hālofia pe ʻoku ʻikai ke Ne hōifua ki he meʻakaí. Ka naʻá Ne fehangahangai mo e ʻahiʻahi ko ʻení ʻaki hano fakahaaʻi ha ʻuhinga maʻongoʻonga mo fakaʻeiʻeiki ange ki he ʻikai ke Ne fie kaí: ko ha holi ke moʻui ʻaki e folofola kotoa pē ʻa e ʻOtuá. Naʻá Ne ʻafioʻi ne maʻongoʻonga ange Hono misioná he ngaahi holi fakatuʻasinó.

Kapau te ke feinga ke fakalotoʻi ho ʻatamaí ʻoku ʻikai ke ke maʻu ha ngaahi ongo fakasekisuale, ʻe fakamanatu atu ʻe hoʻo sinó ʻokú ke maʻu ia, ʻa ia ʻe iku ai ki haʻo ongoʻi lōmekina, loto-mafasia mo ongosia.

Ka ʻo kapau te ke fehangahangai mo hoʻo ngaahi holi fakasekisualé ʻo hangē ko e tali ʻa e Fakamoʻuí ki he holi ki he meʻakaí, ʻe ola lelei ange hoʻo lava ʻo taʻofi hoʻo ngaahi ongó. Naʻe maʻu ʻe he Fakamoʻuí ha ʻuhinga mālohi ange ke fakaʻehiʻehi ai kae ʻikai fakavaivai ki he ʻahiʻahí, pea ʻoku pehē pē foki mo koe! Kuo talaʻofa mai ha ngaahi tāpuaki lahi maʻatautolu ʻi he moʻuí ni pea ʻi he nofo taʻengatá ʻi heʻetau tauhi e ngaahi fekaú pea “ʻoku fakaafeʻi mai ʻi hono moʻui ʻaki e fono ʻo e angamaʻá e ngaahi tāpuaki maʻongoʻonga taha ʻe lava ke maʻu ʻe he houʻeiki tangata mo fafine ʻi he moʻui fakamatelié: ko e falala moʻoni fakalaumālie ʻi he ʻao ʻo e familí, kaungāmeʻá, kaungā ngāue he Siasí, kae tautefito ki he Fakamoʻuí.”²

ʻE tāpuekina hoʻo moʻuí ʻe he ngaahi fekau ʻa e ʻEikí ʻo kapau te ke tauhi kinautolu. ʻOku ʻikai toe kehe ʻa e fekau ko ia ke mapuleʻi hoʻo ngaahi holi fakakakanó: ʻe ʻomi ʻe hoʻo ngaahi feinga ke talangofuá ha fiefia ʻoku tuʻuloá. ʻE lava ke hoko ʻa hono mapuleʻi hoʻo ngaahi ongo fakasekisualé ko ha akoʻanga ʻi he fononga kotoa ʻo e moʻuí, ka ʻe ʻi ai maʻu pē e Tamai Hēvaní ke tokoniʻi koe ke ke ikuna! ʻO ka ke ka fai ha fehalaaki, fakatomala pea toe feinga pē. ʻOua te ke foʻi. Ko ha konga ia ʻo e ngāue fakalelei ʻi he moʻui fakamatelié.

Ko e Tamai Hēvaní ko ha Tamai ʻofa ia ʻoku tokanga mo mateuteu ke tokoniʻi kitautolu, tautautefito ki he tafaʻaki toputapu ko ʻeni ʻo e moʻui fakamatelié. ʻOua naʻa teitei ngalo naʻá Ne fakatupu ʻiate koe e ngaahi ongo fakasekisuale ʻoku tāú, pea te Ne lava ʻo tokoniʻi koe ke ke ʻilo e founga ʻe lava ke hoko ai ia ko ha tākiekina ki he leleí ʻi hoʻo moʻuí neongo ho tūkunga lolotongá, ʻaki Haʻane tokoni atu ke ke fetuʻutaki mo e niʻihi kehé ʻi ha ngaahi founga lelei, ʻoatu ha ongo ʻo e loto-fakapapaú mo e vilitakí, tataki koe ke ke ʻiloʻi koe, ʻofa ʻiate koe, mo loto-hangamālie, pea ʻomi koe ke ke ofi ange ki he Fakamoʻuí he ʻaho takitaha.

Manatuʻi, ʻoku finangalo e ʻOtuá ke ke fiefia. Ko Sētane ʻoku loto ke ke mamahí pea ko ia ʻokú ne fakaʻaongaʻi e fakalotosiʻí mo e kākaá ke fakamavaheʻi koe mei he ʻOtuá. ʻE hanga ʻe he fakavaivai ki he ngaahi ʻahiʻahi fakasekisuale ʻi tuʻa he nofomalí ʻo takihalaʻi koe mei he ngaahi tāpuaki ʻo e fiefia taʻengatá ki he mamahí. Ka ʻe lava ʻe hoʻo feinga ke mahino, tokangaʻi, mo mapuleʻi hoʻo tōʻonga fakasekisualé, neongo kapau ko ha tulifua ia ʻi he moʻuí kotoa, ʻo tataki koe ki he fiefiá, loto-fakatōkilaló, mo e manavaʻofa ki he taha kotoa pē, kau ai koe.