Kakai Lalahi Kei Talavoú
Ako ke Vakai ki he Tōʻonga Fakasekisualé ko ha Meʻaʻofa Toputapu
ʻI heʻetau hoko ko ha kāingalotu ʻo e Siasí, ʻoku akonekina kitautolu ko e feohi fafale fakasekisuale ʻi he nofo-malí ko ha konga fakaofo ia ʻo e palani ʻo e ongoongoleleí. ʻE lava ke hoko ia ko ha konga toputapu, fakaʻofoʻofa mo fakafiefia ʻo ʻetau moʻuí ʻoku iku ki he uouangataha lahi ange mo hotau hoa malí pea mo e ʻOtuá. Kae fēfē ʻa e ngaahi ongo fakasekisuale kimuʻa he nofo-malí? ʻOku ʻikai kamata hotau ngaahi natula fakasekisualé ʻi he nofo-malí—kuo ʻomi ʻe he ʻOtuá ha ngaahi ongo fakasekisuale ʻoku hoko ko ha konga moʻui lelei mo mahuʻinga ʻo e tangatá. Ka ko e taimi ʻe niʻihi ʻoku fakatupu ʻe he taʻemahino ʻoku tau maʻu fekauʻaki mo e ngaahi ongo mo e natula fakasekisuale ko iá ke tau ongoʻi mamahi, fakamāʻia, pe faiangahala ai.
Ne ʻikai akonekina hatau niʻihi fekauʻaki mo e ngaahi tafaʻaki lelei ʻo e tōʻonga fakasekisualé—ko e ngaahi nunuʻa kovi pē ʻo hono maumauʻi e fono ʻo e angamaʻá. Pe mahalo naʻe ʻikai pē ke akoʻi kiate kitautolu ha meʻa ʻe taha fekauʻaki mo e haohaoa fakasekisualé. Pea koeʻuhí ko e konga lahi ʻo e meʻa ʻoku tau ako fekauʻaki mo e tōʻonga fakasekisualé ʻoku maʻu ia mei he mītiá, ʻe malava ke hanga ʻe he ngaahi pōpoaki hala ko iá, fakataha mo e ʻikai ha mahino ki he finangalo ʻo e ʻOtuá fekauʻaki mo e tōʻonga fakasekisualé, ʻo fakalahi ʻa e vā fetuʻutaki palopalemaʻiá, fakaʻaongaʻi e ponokalafí, mo fakamamahiʻi e tauʻatāina ke fili ʻa e niʻihi kehé, ʻi he fakamālohi fakasekisualé. Ko ia ai, te tau lava fēfē ʻo ako ke vakai ki he tōʻonga fakasekisualé ko ha meʻaʻofa toputapu, ko ha konga mahuʻinga ʻo hotau natula kuo foaki mai ʻe he ʻOtuá? Pea te tau lava fēfē ʻo mapuleʻi ʻetau tōʻonga fakasekisualé ke fenāpasi mo e taumuʻa taupotu taha ʻi he palani taʻengata ʻa e ʻOtuá?
ʻI he fakakaukau ki he ngaahi fehuʻi ko ʻení, kuo mau fokotuʻutuʻu ai ʻa e konga ki he māhina ní ke tokoni atu ke fakalahi ʻa e mahino ʻokú ke maʻu ki he fakakaukau ʻa e ʻOtuá fekauʻaki mo e tōʻonga fakasekisuale ʻoku tāú. ʻOku mau fakatau ange ʻe hoko ʻa e fakakaukau lelei ko ʻení ke ke loto-fakapapau ange ai ke moʻui ʻaki e fono ʻo e angamaʻá, maʻu ha taumuʻa mo ha ʻamanaki lelei ʻi hoʻo ngaahi tūkunga fakatāutahá, mateuteu ke aʻusia ha nofo-mali ʻoku mālohi mo fakafiefiá mo fakaafeʻi e melino ʻa e Fakamoʻuí ki hoʻo moʻuí. ʻOku fakafou ʻi hoʻo feinga ke tauhi e ngaahi fekau ʻa e ʻOtuá fekauʻaki mo e tōʻonga fakasekisualé ʻa e “ʻāsili [ke] mālohi ʻa hoʻo falalá ʻi he ʻao ʻo e ʻOtuá” (Tokāteline mo e Ngaahi Fuakava 121:45).
ʻOku mau talamonū atu,
Kau ngāue ʻa e Liahoná ki he konga maʻá e kakai lalahi kei talavoú