Ngāue Fakaetauhi ʻaki e Pai Moá
Naʻe tokoniʻi au ʻe hoku ngaahi kaungāmeʻá ke u ongoʻi e ʻofa ʻa e Tamai Hēvaní ʻi he taimi ne u fie maʻu taha ai ke ongoʻi iá.
Tā fakatātā ʻa Allen Garns
ʻI he taimi naʻe mate fakafokifā ai ʻeku faʻeé ʻi hono taʻu 61, naʻá ku fuʻu ʻohovale ʻaupito. Naʻá ne hoko ko ʻeku maʻuʻanga tokoni ki he ʻofá, angavaivaí, tokoní, iví, mo e fiefiá. Naʻá ku ongoʻi naʻe hangē kuo kaihaʻasi ʻeku faʻeé meiate aú pea kuo kaihaʻasi mei heʻeku fānau ʻe toko tolú ʻa ʻenau kui fefiné. Naʻá ku ʻita foki ki he Tamai Hēvaní. Ko e hā kuó Ne fai ai ʻeni kiate kimautolú?
Ko e taimi lahi, ne u faʻa ʻā hake ʻi he vālenga ʻo e poó ʻo ʻikai lava ke u toe foki ʻo mohe. ʻI ha pongipongi ʻe taha, ne u ʻā hake ko e 3.00 hengihengi ia. ʻI heʻeku fakaʻamu ke toʻo ʻeku tokangá mei heʻeku moʻui ʻo ʻikai ʻi ai ʻeku faʻeé, ne u sio ki heʻeku telefoní ʻo maʻu ai ha foʻi vitiō kuki ʻi heʻeku pēsí. Ko e meʻakai lelei taha ia ke ngaohi ʻi ʻapí: ʻa e pai moá. Ne u fakakaukau he toki meʻa ifo moʻoni ka ʻi ai ha pai moa, ka naʻe ʻikai ke u ongoʻi ʻoku ou fie teuteuʻi ha meʻakai maʻa hoku fāmilí makehe mei hono huaʻi e huʻakaú ki ha poulu silioó. Ko e taimi ní, ne u fakakaukau he ʻikai ke u fie maʻu ha meʻatokoni fakafiemālie.
ʻI ha ʻaho hokohoko ʻe ua, ne ʻomi ai ʻe haʻaku ongo kaungāmeʻa ha ngaahi foʻi pai moa. Naʻá ku tangi. Naʻe ongo moʻoni kiate au ʻa ʻena angaʻofá. Naʻá ku ʻiloʻi he ʻikai hoko noa pē ʻeni. Naʻá ne fakapapauʻi mai naʻe tokanga mai ʻa e ʻOtuá kiate au, naʻá Ne ʻofa ʻiate au pea naʻá Ne tokanga ki heʻeku fuʻu ʻuakai ki ha foʻi pai moá neongo naʻá ku ʻita kiate Ia. Naʻá ku fuʻu fie maʻu ʻa e fakamanatu ko ʻení.
ʻOku ou houngaʻia ʻi he ongo kaungāmeʻa ko ia ne na ʻomi e ngaahi foʻi pai moá. Naʻá na ngāue fakaetauhi kiate au ʻi ha ngaahi founga ne ʻikai ke na mafakakaukaua. Naʻá na tokoni ke u ongoʻi ʻa e ʻofa ʻa ʻeku Tamai Hēvaní ʻi he taimi ne u fie maʻu lahi taha ai iá.
Naʻe akoʻi mai ʻe he aʻusia ko ʻení ʻa hono mahuʻinga ke ʻiloʻi mo muimui pau ki he ngaahi ueʻi mei he Laumālie Māʻoniʻoní. Mahalo ʻe lava ke hoko ia ko e tali ki ha lotu ʻa ha taha ʻoku faingataʻaʻia.
ʻOku ʻikai totonu ke tau tuku ʻetau taʻepauʻiá pe loto-veiveiuá ke ne taʻofi kitautolu mei he ngāue fakaetauhi ki he niʻihi kehé. ʻOku ou fakatauange te tau feinga maʻu pē ke hoko ko ha meʻangāue ʻi he toʻukupu ʻa e ʻEikí mo vahevahe ʻEne ʻofá mo e niʻihi kehé.