Ko e Kātoanga Keké

ʻĪmisi

The Mooncake Festival

“ʻOua te ke lele mamaʻo!” Ko e ui atu ia ʻa Tetí. “ʻOku ʻalu ke poʻuli, pea ʻoku ʻikai ke u loto ke ke tō.”

Naʻe tuʻu ʻa Viniseni peá ne tafoki mai. “Ka ʻoku fuʻu tuai hoʻo lué. ʻOku ou fie aʻu ki he kātoangá naʻa faifai kuo ʻosi kotoa e keké!”

“He ʻikai ke ʻosi e keké ia,” ko e lea ange ia ʻa Tetí ʻi heʻena tulituli atu mo Mamí. “Kae ʻoua leva pē kuó ke aʻu atu ki ai!”

Naʻe lava ke fanongo ʻa Viniseni ki he tā ʻa e nafá ʻi heʻenau fakaofi atu ki he pāká. Ne tautau ha foʻi maama lanu kehekehe mei he ʻuluʻakaú, ʻo fakamaama ʻa e pō fakapoʻulí. Ne kai ʻa e ngaahi fāmilí ʻi he tupenu ʻufiʻufí, ko e teuteu ke nau sio fakataha he māhina kātoá.

Naʻe ʻilo ʻe Mami ha konga ne ʻatā he musié peá ne folahi ai ʻenau tupenú. Naʻá ne ʻoange ha koini kia Viniseni ke fakatau mai ʻaki ha meʻakai.

“Mālō!” Naʻe ʻikai faʻa tatali ʻa Viniseni ke ʻalu ʻo ʻeva. Naʻá ne lau ʻene koiní ʻi he lolotonga ʻene lué. Paʻanga ʻe valu! Naʻe feʻunga ia ke fakatau mai ʻaki ha keke. Ka ko e hā e kalasi naʻá ne fie maʻú? Hami? Fuaʻimoa? Telianí? Naʻe faifai peá ne fili ha keke naʻe fonu ʻi he kilimi piini ʻuliʻuli. Naʻá ne ʻalu mei he palepale ki he palepale lolotonga ʻene kaí, ʻo moʻusioa he meʻakai kehekehe kotoa pē. Fokotuʻuna vaʻakau moá. Fanga fuʻu kulo supo fifisí mo e nūtoló. Mahalo naʻa lava ke ne fakatau mai ʻaki ʻene toenga sēnití ha ʻaisi momosi mo e ʻaisi kilimi!

Ne ʻikai fuoloa kuó ne heva atu ki ha feituʻu ne ʻikai loko lahi ai ʻa e māmá. Naʻá ne maʻu ha fakakaukau ʻi he fakapoʻulí.

ʻOku ou fifili pe ko e hā e mamaʻo te u lava ʻo lue ai mo kuikui hoku matá? Naʻá ne kuikui hono matá peá ne manga ki muʻa. Peá ne toe manga. Pea naʻe fihia hono vaʻé ʻi ha meʻa. Naʻá ne tō!

Hauē! Naʻe tau hono kumukumú ʻi ha meʻa māsila. Ko ha laʻi tāpuni ukamea lahi ʻo e fakatafenga vaí! Naʻá ne ala hake ki hono kumukumú. Naʻe toto ia.

“Teti? Mami?” ko ʻene uí hake ia. Naʻá ne foki fakatovave ki he māmá, pea naʻe tokoniʻi ia ʻe ha taha ke fakasio ʻene ongomātuʻá.

“Ne kamata ke ma hohaʻa!” Ko e lea ange ia ʻa Mamí. Naʻá ne sio atu leva ki hono fofongá. “ʻOku fie maʻu ke tau ʻalu ki falemahaki.”

Ne ʻikai fuoloa mei ai ne tangutu ʻa Viniseni mo Mami mo Teti ʻi he loki talitali ʻi falemahakí. Naʻá ne fuʻu ilifia ʻaupito. Te ne sai pē nai?

Naʻá ne ʻapasia hono nimá mo fakakaukau kia Sīsū. Ne papitaiso ia mo hono fāmilí ʻi ha ngaahi māhina siʻi kimuʻa. Ne talaange ʻe he ongo faifekaú ʻe lava ke tokoniʻi ia ʻe Sīsū ke ne ongoʻi fiemālie.

ʻE tokoniʻi au ʻe Sīsū Kalaisi. Naʻá ne toutou fakakaukau ʻe tokoniʻi au ʻe Sīsū Kalaisi. Pea naʻe taimi siʻi naʻá ne kiʻi ongoʻi nonga ange. Ne hangē naʻe ʻi hono tafaʻakí ʻa e Laumālie Māʻoniʻoní.

Ne kuku ʻe Teti hono nimá.

Ne talaange ʻe Mami, “ʻE lelei pē ʻa e meʻa kotoa.”

Naʻe kamo pē ʻa Viniseni. Naʻá ne ʻiloʻi naʻá ne moʻoni.

ʻI he taimi ne haʻu ai ʻa e toketaá, naʻá ne tuituiʻi hono kumukumú. Naʻe mamahi, ka naʻe ʻikai ke fuʻu ongo fēfē. Naʻá ne talaange mahalo pē ʻe piki. Ka naʻe sai pē ia. Ko e taimi kotoa pē naʻá ne sio ai ki aí, te ne manatuʻi ʻa e keké, ko e kātoangá, mo ha taimi naʻá ne ongoʻi ne fakafiemālieʻi ai ia ʻe Sīsū mo e Laumālie Māʻoniʻoní. ●