Ko Ia ʻa e Halá

Naʻe fakahaofi kitautolu kotoa ʻe Sīsū Kalaisi mei he maté mo e angahalá. Na‘á Ne loto-fiemālie ke mamahi ʻi Ketisemani mo Kālevale koeʻuhí ko ʻetau ngaahi angahalá. Hili ʻEne pekia ʻi he kolosí, naʻá Ne toetuʻu. Na‘e ikunaʻi ʻe Heʻene Fakaleleí ʻa e mate fakalaumālié mo fakaesinó fakatouʻosi. ʻOku huhuʻi ʻe Sīsū fakafou ʻi Heʻene Fakaleleí, ʻa kinautolu kotoa pē ʻoku tui mo “maʻu ʻa e loto-mafesifesí mo e laumālie fakatomalá” (2 Nīfai 2:7).

Vakai foki, ʻĪsaia 26:19; 2 Nīfai 9:5–7, 10–12; Mōsese 5:14–15.

Koeʻuhí ko e Fakalelei ʻa Sīsū Kalaisí, ʻokú Ne maʻu ha mahino haohaoa kiate kitautolu pea ʻe hoko ko hotau fakamaau. “He kuo pau ʻe fakahā ʻa kitautolu kotoa pē ʻi he ʻaho ʻo e nofoʻanga fakamaau ʻo Kalaisí” (2 Kolinitō 5:10). ‘E fakamāuʻi kitautolu ʻi he meʻa kuo tau faí mo e tuʻunga kuo tau aʻusiá.

Vakai foki, Sione 5:22; Fakahā 22:11–12; 2 Nīfai 9:15–16.

Ko e taukapó ko ha taha ʻokú ne fakafofongaʻi ha taha kehe lolotonga ha hopo. Ko Sīsū Kalaisi ʻa hotau Taukapó. Kuó Ne poupouʻi kitautolu talu mei he kamataʻangá pea te Ne tautapa maʻatautolu ʻi he ʻao ʻo e Tamaí. ʻE fakakakato ʻe Sīsū “ʻa e ngaahi fie maʻu ʻa e fakamaau totonú” (Mōsaia 15:9) maʻanautolu kotoa pē ʻoku fakatomala pea tui kiate Iá. Koe‘uhí ko Sīsū ʻa e fakalaloa ʻiate kitautolu mo e ʻOtuá, ʻoku tau maʻu ai e faingamālie ke maʻu e moʻui taʻengatá.

Vakai foki, 1 Tīmote 2:5; Hepelū 9:15; 1 Sione 2:1; Tokāteline mo e Ngaahi Fuakava 45:3–5; Mōsese 7:39.