Kabahin sa Mahangturong Pamilya
Niining bulana atong gisaulog ang ika-25 nga anibersaryo sa “Ang Pamilya: Usa Ka Pamahayag ngadto sa Kalibutan.” Pinaagi sa akong kaugalingong mga kasinatian ug sa akong pagserbisyo sa Kapangulohan sa Kinatibuk-ang Relief Society, nakita nako nga daghang mga tawo sa kalibutan wala magpuyo og hingpit nga mga kahimtang sa pamilya. Sa pagkatinuod, ako dili sigurado kon aduna bay bisan usa nga nakabuhat! Ang sumbanan nga gihulagway sa “Ang Pamilya: Usa Ka Pamahayag ngadto sa Kalibutan” wala gituyo aron kita masagmuyo; hinoon, tuyo niini ang pagpahinumdom kanato sa mahigugmaon nga mahangturong pamilya sa diin kita nahisakop na. Nagtudlo kini nga kitang tanan kabahin sa pamilya sa Dios ug nagpahinumdom kanato nga, dili igsapayan ang atong yutan-on nga kahimtang sa pamilya, matag usa kanato napalibutan sa mga kaigsoonan.
-
Tungod kay kitang tanan dili hingpit nga mga mortal, ang atong sitwasyon sa pamilya dili gayud mahimong hingpit niining kinabuhia. Apan ang atong Manluluwas makahatag kanato og kaayohan. Sa pahina 26, akong gipaambit kon sa unsang paagi ang buhat sa templo nakahatag og pagkaayo gikan sa Dios ngadto sa akong pamilya sa duha ka habig sa tabil.
-
Ang pagkat-on og dugang mahitungod sa mga baruganan sa pamahayag makatabang kaninyo sa pagpalig-on sa inyong hugot nga pagtuo ug niadtong naglibut kaninyo, bisan unsay kahimtang sa inyong pamilya. Ang artikulo sugod sa pahina 12 mahimong moaghat kaninyo og mga ideya aron magamit kining mga pagtulon-an sa inyong kinabuhi.
Ang atong langitnong mga ginikanan nahigugma kanato, ilang mga anak, ug ang atong Langitnong Amahan adunay plano alang sa matag usa kanato. Nagpasabut kana nga Siya adunay plano alang kaninyo. Palihug ipadayon ang pagpaduol ngadto Kaniya uban sa hugot nga pagtuo. Tabangi ang mga sakop sa inyong mahangturong pamilya nga makabalik ngadto Kaniya. Siya mopaambit sa iyang paglaum ug pagkaayo sa inyong biyahe. Ug ugma damlag, matag usa kanato adunay kahigayunan nga makabalik ngadto sa usa ka hingpit ug mahangturon nga langitnong panimalay.
Unta ang Dios mopanalangin ug molig-on kaninyo,
Sister Reyna I. Aburto
Ikaduhang Magtatambag sa Kinatibuk-ang Kapangulohan sa Relief Society