Dali, Sunod Kanako: Basahon ni Mormon
Sa unsang paagi nga akong mapaluyohan ang propeta?
Agosto 31–Septyembre 6
Si Samuel ang Lamanite mao ang usa ka propeta kinsa nagsangyaw sa mga Nephite. Daghan ang misalikway kaniya, apan ang pipila naminaw ug mituo sa iyang dinasig nga mga pagtulun-an. Atol sa kinatibuk-ang komperensya ug sa ubang panahon, kita adunay kahigayunan sa pagpaminaw ug pagpaluyo ni Presidente Russell M. Nelson, ang propeta sa atong panahon.
Samtang magbasa ka mahitungod ni Samuel ang Lamanite, hunahunaa ang mga paagi nga imong mapaluyohan ang propeta karon sa pulong ug buhat.
Mga Panudlo alang sa Atong Panahon
Atol sa panahon ni Samuel, ang mga Nephite nahimong dautan, busa si Samuel midapit sa mga katawhan sa paghinulsol. Siya usab mipamatuod sa pagkatawo ni Jesukristo ug mipahimangno sa mga peligro sa sala (tan-awa sa Helaman 14:11–12). Unsa pay laing mga baruganan nga gitudlo ni Samuel? Unsay gitudlo ni Presidente Nelson sa atong panahon?
Dili Kini Mahitungod sa Pagkainila
Kadaghanan sa mga tawo nasuko sa mga pagtulun-an ni Samuel, ug sila misulong kaniya pinaagi sa mga bato ug mga panâ. Si Samuel miingon nga andam lamang silang mosunod niadtong kinsa nag-ingon nga walay dautang sangputanan ang sala (tan-awa sa Helaman 13:25–27).
Sa atong panahon, si Presidente Nelson miingon, “Ang mga propeta talagsa ra kaayo nga popular.”1 Sa unsang paagi nato malikayan ang paggamit og mga “bato” ug “mga pana” nga gigamit sa mga tawo nga itira ngadto sa mga propeta karon?
Maminaw Ka Ba?
Bisan og daghang mga tawo misalikway ni Samuel, ang pipila midawat sa iyang mensahe. Mibuhat dayon sila sa iyang gipamulong pinaagi sa paghinulsol ug sa pagpabunyag. Unsay imong mabuhat aron dili lamang makadungog apan mobuhat usab sa mga pagtulun-an sa atong mga propeta ug mga apostoles?
Paghulagway pinaagi ni Dan Burr