Te Ke Lava ke Maʻu ʻa e Tauʻatāiná

ʻĪmisi

friends smiling

ʻOkú ke moʻua nai, pe ko ha taha ʻokú ke ʻofa ai, ʻi he tōʻonga ʻo e fehalaākí, fakatomalá, toe tukupā foʻoú, pea toe fehalaaki peé? Naʻe tokolahi ha kakai lalahi kei talavou ne u ngāue mo ia lolotonga ʻeku hoko ko ha pīsope ʻi ha uooti ʻo e kau tāutaha kei talavoú, ne nau fihia ʻi he tōʻonga tatau. Ka naʻe maʻu foki ʻe ha tokolahi ha tauʻatāina ʻo fakafou ʻi he Fakalelei ʻa Sīsū Kalaisí. ʻOku fokotuʻu mai ʻe he ngaahi pōpoaki fekauʻaki mo e maʻunimaá ʻi he konga ko ia ki he māhina ní, ha fakakaukau ʻe ala tokoni ki hono maʻu ʻa e tauʻatāiná—maʻatautolu mo e niʻihi kehé.

Ko e meʻa mahuʻinga taha ʻoku totonu ke tau manatuʻí ko ha fānau ʻofeina kotoa kitautolu ʻa e Tamai Hēvaní. Naʻe akoʻi ʻe ʻEletā Tieta F. ʻUkitofa ʻo pehē, “ʻOku ʻikai ke toki ʻofeina pe toki ʻofaʻi koe [ʻe he ʻOtuá] hili haʻo ikunaʻi ho ngaahi vaivaí mo e ʻulungaanga koví. ʻOkú Ne ʻofa kiate koe he ʻahó ni mo mahino kakato ho ngaahi faingataʻaʻiá. … ʻOkú Ne ʻafioʻi hoʻo mamahí he taimi ʻokú ke tōnounou pe taʻemalava aí. Ka ʻokú Ne kei ʻofa pē ʻiate koe” (“Ko Hono Moʻui Fiefia ʻAki e Ongoongoleleí,” Liahona, Nōvema 2014, 123; tānaki atu e fakamamafá).

ʻI he tafaʻaki ʻe tahá, ʻe feinga ʻa Sētane ke ne fakalotoʻi koe ʻoku ʻikai lava ke ke maʻu ʻa e ʻofa ʻa e Tamai Hēvaní mo e mālohi ʻo e Fakamoʻuí ke liliu mo fakamaʻa koe. ʻE feinga ʻa Sētane ke ne puke koe ʻi ha pupuʻa ʻo e fakamāʻiá mo e fehiʻa pē ʻiate kitá, kae ʻoua naʻá ke tui ki heʻene ngaahi loí.

Ka ke tafoki ki he Tamai Hēvaní. ʻOua naʻá ke manavasiʻi ke fetuʻutaki ʻi he loto-moʻoni ki hoʻo pīsopé pe palesiteni fakakoló pea mo e niʻihi kehe ʻoku ʻofa ʻiate koé. ʻI hoʻo lau e ngaahi talanoa ʻo e ʻamanaki leleí mei he kakai lalahi kei talavou kehe kuo nau uesia ʻi he maʻunimaá, ngāue ʻo fakatatau ki he ngaahi ongo ʻokú ke maʻú. Faʻa kātaki ʻiate koe, manatuʻi ho natula faka-ʻOtuá, ʻai taha taha pē, pea tui ki he mālohi faifakamoʻui ʻo Sīsū Kalaisí. Te Ne tokoniʻi kitautolu, fakataha mo e ngaahi maʻuʻanga tokoni kehekehe, ke tau ikuna ʻi hono maʻu ʻa e tauʻatāina ʻoku tau fakaʻamuá. ʻOua ʻaupito naʻá ke foʻi.

Ko ho kaungāmeʻá,

Richard Ostler