Imwiin te Bitaki ae Boou
I kaoi ngkami bwa kam na rairi nanomi, iango, ao ni karaka tamneimi nakon Tamara are i Karawa ao Natina, Iesu Kristo.
Tariu ao mwaneu aika tangiraki, bongin te maungatabu ni kabuta aika uoua aikai a tia n rang n mimitong! I booraoi n nano ma Unimwaane Jeffrey R. Holland. Ngke e taekina, te rongorongo, tataro, ao te katangitang aika a tia n rang kairaki iroun te Uea. I kakaitau nakoimi ni kabane naake a tia ni karaoi tabeia n aro nako.
Rinanon nako te katauraoi, I a tia ni katamnei ngkami n au iango n ongora nakon te maungatabu. I a tia ni butiia te Uea bwa e na buokai n ata aron ami namakin, tabeaianga, ke ni kataia n taobaaraaki. I a tia ni iangoia bwa tera ae N na taekinna ni kainakin te maungatabu aei are e na angani ngkami te taratara inanon te kantaninga ae bati ibukin taai aika a na roko ae I ataia bwa e tangiria te Uea bwa kam na namakinna.
Ti maeka inanon te roro ae mimitong, are a kaman nooria burabeti inanon bubua n ririki. Aio te tai are akea te kakabwaia n tamnei ae raoiroi ae e na tauaki man aika raoiroi.1 N aki tarai mangaongao aika a riki n te aonaaba,2 te Uea e tangiriira bwa tina “ingainga n tara tai aika a na roko ma te kantaninga ae kakimwareirei.”3 Tina aki katikui ara ururing ni bwaai aika ti karaoi ngkoananoa bwa tiaki kona ni karekea te tokanikai iai. Ikotakiia Iteraera e waaki nako. Te Uea Iesu Kristo e kaira waakin ana Ekaretia, ao e na kakoroi bukin ana kantaninga mai karawa.
Te kakaewenako ibukimi ao ibukiu bwa tina kakoaua bwa ngaira n tatabemaniira tina kakoroi bukin ara kantaninga ae kakawaki teuanne ke neienne. Ni boong aikai ti aki toki n ongongo taekan “imwiin te bitaki ae boou.” Ngkana ko bon tangiria ni kan manokaia “imwiin te Bitaki ae Boou,” I kaoko bwa kona bita nanom, am iango ao tamnein ni karikirakea tamnein Tamara are i Karawa ao Natina, Iesu Kristo. Kariaia anne bwa e na riki bwa am mwi n te bitaki ae boou.
Mwanokai “am mwi n te bitaki aika boou” man te rairannano ni katoabong. Ukoukoria bwa kona rikirake inanon te iango ae itiaki, taetae, ao te mwakuri. Ibuobuoki nakoia tabeman. Kawakina te taratara ae akea tokina. Kakororaoa nakoam. Ao tera nako ami kangaanga, tariu ao mwaneu aika tangiraki, maiu ni katoa bong bwa ko aonga ngkoe n tauraoi riki ni kaitibo ma te Atua.4
Anne bukina ngkai iai ara tembora. Ana otenanti te Uea ao berita aika tabu a katauraoira n te maiu ae akea tokina, te kakabwaia ae te kabanea ni korakora man ana kakabwaia ni kabane te Atua.5 Ngkai kam ataia, te butinaoraki n te COVID e kainnanoa kainakin ara tembora n te tai ae aki teimaan. Imwiina ti waakina karaoan te waaki ae tararuaki raoi, n manga kaukan te beiti. Ma Beiti 2 ngkai ae tauraoi nakon taian tembora, nga ma nga taanga aika a tia ni kabaeaki, ao nga ma nga aika a tia ni karekei aia entaumente tabeua namwakaina n nako. Ti ingainga nakon te bong are ni kabane kain te Ekaretia a kona ni manga beku ibukiia aia bakatibu ao n nebonebo inanon te tembora ae mimitong.
Ngkai, I kukurei ni katanoatai babaire ibukin katean onoua tembora aika a boou ake a na kateaki n tabo aikai: Tarawa, Kiribati, Port Vila, Vanuatu; Lindon, Utah; Greater Quatemala City, Guatemala São Paulo East, Brazil; ao Santa Cruz, Bolivia.
Ngkai ti katei ao ni kateimatoai tembora aikai, ti tataro bwa ngkami n tatabemani ngkami kam na katei ao ni kateimatoai ngkami bwa kam aonga n tau n riki n ana tembora ae mimitong.
N te tai aei, tariu ao mwaneu aika kam tangiraki, I kakabwaiai ngkami bwa kam na kaonaki n ana rau te Uea Iesu Kristo. Ao te rau are mairoun te Atua, are te rau are aki konaki n ataki teutana.6 I kakabwaiako ma te nano ae korakora ao te konabwai n ongotaeka nakon ana tua te Atua. I berita bwa ngkai ko karaoia, kona bati ni kakabwaiaki, n raonaki ma te ninikoria ae korakora, ni karikirakei kaotioti ibukim, karewen te rau ni mweengam, ao te kimwareirei, riki ibuakon bwaai aika aki kantaningaaki.
Ti bia waaki nako n ikotaki ni kakoroa bukin tibwangara mai eta—are ibukin katauraoara ao te aonaaba ibukin Kauaokin te Uea. I kakoaua, man kaotan au tangira nakoimi n tatabemani ngkami, n aran Iesu Kristo ae tabu, amen.