Bitiobi L. Todd Budge
Kauoman ni Kauntira n te Bitiobiriki n Tararua
Imwin ana beku inanon 18 namwakaina bwa te Mataniwi ni Kabuta ae te Itingaun, Bitiobi L. Todd Budge e a tia ni kamatoaaki bwa te Kauoman ni Kauntira n te Bitiobiriki n Tararua. E onea mwiin Bitiobi Dean M. Davies, are e a tia ni weteaki bwa te Mataniwi ni Kabuta ae te Itingaun.
E reke ana beba Bitiobi Budge man te Brigham Young University n 1984 ae te tikuri n te economics. E mwakuri n te Bain & Company Japan; Citibank, N.A.; ao GE Capital i Japan ao Atlanta, Georgia, USA. E riki bwa te beretienti ao te tiibi aobitia ni kakoroi mooti n te Tokyo Star Bank Limited n 2003, n tibwangana ae te tia babaire n te baba n tararua man 2008 nakon 2011. E a tia naba ni beku bwa kaain te baba n tararua n te Hawaiian Airlines.
N te taina i nanon maiuna, ngke e tabe Bitiobi Budge ni iangoa bitakin ana mwakuri, e karekei tabeua taeka n reirei aika tamaroa. “Ti kainnanoia aomata aika a itiaki nanoia n te waaki ni karikirake,” e tuangaki iroun temanna te tia reirei, e reitia n taku bwa tabo ake e na mwakuri iai e na anganna tibwanga ni kona n reireiniia ao ni buokiia aomata.
E koaua bwa, ana mwakuri Bitiobi Budge, e bon, anganna tibwanga aika mwaiti ni kakairi nakon ae raoiroi n te waaki ni bitineti n te aonaaba, n aron kaukakin mataroan Tiaban ibukin te mwakuri ni mitinare, are e bon mitinare naba iai mai mwaina n te Japan Fukuoka Mission. Imwina e riki bwa te beretitenti n te Japan Tokyo Mission.
“Te rongorong ae tamaroa n te euangkerio,” e reirei, “bon tiaki te maiu ae e na akea iai te rawawata ao te kangaanga ma bon te maiu ae iai bongana ao nanona—te maiu are karawawatakira ao marakira a kona ni ‘kabwautaki n te kimwareirei iroun Kristo’ [Aramwa 31:38].”1
E bungiaki Lawrence Todd Budge n Ritembwa 29, 1959, i Pittsburg, California, USA. E kaitibo ma Lori Capener n aia moan ririki n reirei i Brigham Young University. A mare inanon 1981 n te Logan Utah Tembora. Boni iai onoman natiia.
Imwain weteana bwa te Mataniwi ni Kabuta n te Itingaun, Bitiobi Budge e a tia ni beku bwa te Itingaun n te Aono, te bereitenti n te titeiki, te tia koroboki n te titeiki, te beretitenti n te Botaki n Ataeinimwane n te titeiki, te bitiobi, ao te beretitenti n te kooram n unimwaane.