Ang Dili Dayon Makita nga mga Panalangin sa Ikapulo

Sa higayon nga makadungog ko og mga pagpamatuod mahitungod sa pagbayad sa ikapulo, kanunay nilang lakipan og milagruso, talagsaon nga mga kasinatian.

Mapasalamaton ko niining mga pagpamatuod, apan wala pa gayud koy ingon niining matang sa kasinatian sa una.

Apan usab, wala pa gayud usab ko gitapik sa Espiritu,—kini sa kanunay perming mas dili klaro.

Kanunay ko nga nagbayad og ikapulo. Wala gayud ko naghunahuna nga dili mobayad niini, sa sinugdanan tungod kay ang akong mga ginikanan naglaum niini, dayon samtang nagkolehiyo nabati nako ang kadasig sa pagbuhat niini. Ug samtang naminyo ko ug nagsugod sa pagbaton og mga anak, nagpadayon ko tungod kay ako adunay hugot nga pagtuo diha ni Jesukristo ug lig-on nga pagpamatuod sa mga panalangin nga moabut gikan sa pagbayad og hingpit nga ikapulo.

Kon mobayad ko sa akong ikapulo, ang mga butang mahimo ra nga maayo. Kanunay kami nga adunay igong pagkaon. Moresulta pa nga ang mga butang mahimong mas barato kay sa akong mahunahunaan, o ako makakita og mga sale o mga kupon. Itugot nato, nga kinahanglan nako kining trabahoan—nagkinahanglan kini og paningkamot ug hugot nga pagtuo. Nagtigum kami ug nagdaginut ug nagbadyet. Apan kon ang tanan nasulti ug nabuhat na, sa pagtapos sa adlaw, nasayud ko kanunay nga ang mga butang ma-OK ra tungod kay nakabayad ko sa akong ikapulo ug mihimo sa akong labing maayo ug gisalig ang tanan sa mga kamot sa Dios.

Samtang naghunahuna ko sa akong mga kasinatian ug kon nganong ako adunay lig-on nga pagpamatuod sa ikapulo, naghunahuna ko sa usa ka butang nga makapainteresado. Hinoon para nako, ang mga panalangin sa ikapulo dili sama sa manna gikan sa langit. Wala ko basta lang nakadawat og bisan unsang mga tseke sa kwarta diha sa sulat o bisan unsang mga pagkaon gikan sa usa ka tawo kinsa nadasig sa paghatag kanako og usa ka butang. Mas sama kini sa panahon nga si Jesus mipakaon sa 5,000 (tan-awa sa Mateo 14:14–21). Usa ka batan-ong lalaki mitanyag sa tanang pagkaon nga anaa kaniya. Ang Manluluwas mihatag og pasalamat ngadto sa Dios ug dayon mipakaon sa tanan, uban sa lima lamang ka tinapay ug duha ka isda. Ug milagrong nabusog ang tanan, ug adunay pay sobra nga nahipos.

Adunay mga pipila ka semana sa dihang wala ko makahibalo unsay akong kaunon tungod kay kinahanglan nakong pakan-on ang akong pamilya. Apan sa bisan unsang paagi kanunay nga adunay paigo. Ang pagkaon dili motunga lang. Apan bation nako ang katagbawan sa ginagmay nga bahin ug ingon man ang akong bana. Wala koy makuha nga sobra nga kwarta, apan makahimo ra ko sa pag-inat sa unsay naa namo.

Makapahibulong kon giunsa sa Langitnong Amahan sa pagpakigtambayayong kanamo ug sa unsay among panginahanglan. Ang matag usa lahi. Lain-lain ang mga panginahanglan sa tanan. Ug mao nga ang atong mga panalangin managlahi. Pagkanindot nga Siya nakahibalo sa atong mga panginahanglan, pisikal man o espiritwal. Napanalanginan ako pinaagi sa pagbayad sa akong ikapulo. Gusto ko nga masayud kamo niana.