Dali, Sunod Kanako: Basahon ni Mormon
Unsa ang atong makat-unan gikan sa Basahon ni Moroni?
(Nobyembre 30–Disyembre 6)
Si Moroni nagpuyo sa gubot nga panahon. Nakasaksi siya sa katapusang kalaglagan sa mga Nephite, ang iyang amahan namatay sa gubat (tan-awa sa Mormon 8:3), ug ang mga Nephite kinsa midumili sa paglimud ni Jesukristo gipamatay (tan-awa sa Moroni 1:2). Si Moroni usab dili “makalimud kang Kristo” (Moroni 1:3). Milayas siya alang sa kasiguroan ug nagpakabuhi sa pagtago sulod sa daghang katuigan.
“Ako mosulat og dugang pa nga mga butang” (Moroni 1:4)
Atol niining panahona, nagtuo si Moroni nga nahuman na ang iyang pagsulat sa mga palid, apan kabubut-on kadto sa Ginoo nga siya “mosulat og dugang nga pipila ka mga butang, nga tingali sila mahimo nga bililhon ngadto sa akong mga kaigsoonan … sa uban nga umaabut nga adlaw”(Moroni 1:4).
Unsa may iyang gisulat?
Gidugang ni Moroni ang kapitulo 8 ug 9 sa basahon ni Mormon, naglakip sa iyang giminubo sa basahon ni Ether, ug gidugang sa iyang kaugalingon nga basahon (ang basahon ni Moroni) ngadto sa mga palid ni Mormon.
Ang sinulat ni Moroni naglangkob og daghang mga butang nga bililhon alang kanato. Misulat siya mahitungod sa buhat sa Simbahan (tan-awa sa Moroni 1–6), naglakip sa mga pagtulun-an gikan sa iyang amahan, si Mormon (tan-awa sa Moroni 7–9), ug mirekord sa iyang katapusang pagpamatuod (tan-awa sa Moroni 10).
Nganong misulat siya niini?
Nasayud sa balaang mga katuyoan sa Basahon ni Mormon, si Moroni mabinantayon gayud sa pagpili unsay iyang gisulat. Human og basa sa basahon ni Moroni, ikonsiderar ang pagpangutana nganong gipili ni Moroni sa pagrekord sa unsay iyang gibuhat. Unsa ang iyang gibati nga importante kaayo? Sa unsang paagi ang katapusang pagpamatuod ni Moroni nakaimpluwensya sa inyong mga pagbati mahitungod sa Basahon ni Mormon?