Usa ka Panalangin sa Tradisyon sa Pasko
Ang tagsulat nagpuyo sa Utah, USA.
Wala ray espesyal mahitungod sa paggahin og panahon sa Pasko diha sa bag-ong panimalay, apan usa ka panalangin sa pagkapari ang nakapausab sa tanan.
Paghulagway pinaagi ni Tracy Walker
14 anyos pa ko sa dihang nasinati nako ang unang Pasko nga walay snow. Ang akong pamilya bag-o lang mibalhin gikan sa kabukiran sa Utah ngadto sa Texas, USA. Alang nako, ang Texas patag ra ug init kaayo. Lisud nga mobati og diwa sa Pasko kon wala koy mga higala sa akong bag-ong eskwelahan ug ilabi na kon walay snow diha sa yuta. Gibati nako nga morag wala ko dawata sa bisan asa nga grupo, mao nga bation nako kasagaran ang kamingaw ug kaguol.
Bisan pa sa akong kaguol, usa na lang ka semana Pasko na, ug nag-agad ko sa among mga tradisyon sa pamilya sa Pasko aron sa pagbayaw sa akong kalag. Ang makalingaw nga mga kalihokan nga gibuhat sa akong pamilya sa nangagi nga mga tuig kanunayng makapabati nako og tumang kalipay. Ang mga tradisyon mao ang dakong bahin kon unsaon namo pagsaulog ang Pasko, busa naghunahuna ko nga wala koy kabalaka-an. Gitawag kini og mga tradisyon kay adunay rason, maong nasayud ko nga angay kining ipadayon.
Pagpabilin sa Diwa sa Pasko nga Buhi
Ang mga adlaw nga padulong sa Pasko hinay kaayong milabay. Wala pay bisan unsang butang nga among gihimo isip pamilya aron sa pagsaulog, mao nga mibati ko nga medyo napildi. Sa dihang miabut na gyud ang Bisperas sa Pasko, nagpaabut ko sa tibuok adlaw sa usa ka butang nga mahitabo—bisan unsang butang nga magpakita nako nga ang among gipangga nga mga tradisyon sa pamilya magpadayon gihapon diha sa among bag-ong panimalay. Sigurado ko nga makahimo gyud ko sa pagpasiugda niining bililhon nga mga tradisyon sa akong kaugalingon, apan dili ko ganahan. Sa usa ka paagi, nangita ko og timailhan aron makita nako nga ang diwa sa Pasko buhi pa gihapon.
Ang adlaw nahimong kagabhion ug nag-anam nako og kasapot. Nanglugmaw ang mga luha sa akong mga mata samtang nagtapok ang among pamilya alang sa pag-ampo. Ang akong tibuok panimalay bugnaw ug haw-ang, bisan og kaming tanan nagpuyo sa sulod niini. Sa kalit lang, ang akong papa miguba sa kahilom sa usa lang ka pangutana.
“Aduna bay gustong makadawat og panalangin sa pagkapari?”
Ang akong kasingkasing mikulba. Nabalaka kaayo ko kabahin kon makapahimutang ba kaha kami og mga suga sa Pasko o makaluto og cookies sa holiday nga akong nakalimtan sa usa ka espesyal kaayong tradisyon nga among gibuhat kada Bisperas sa Pasko—kaming tanan nakadawat og panalangin sa pagkapari. Ang pagdawat og panalangin gikan sa akong papa kanunayng nakahatag kanako og kalinaw, apan dili ang tanan sa akong pamilya ang nakatagamtam sa pagdawat. Usahay ang akong mga igsoon ug ang akong mama moingon nga wala sila mobati nga nagkinahanglan sila. Dili ko gusto nga molaum na usab kon ang tanan mobalibad.
Apan kining higayuna lahi. Mibarug akong mama ug milingkod sa lingkuranan nga gidala sa akong papa alang kanamo.
“Ganahan ko,” hinay siya nga miingon.
Nasurprisa kaayo kaming tanan, apan ang akong papa wala sab magpanuko. Gipandong niya ang iyang mga kamot sa ulo sa akong mama ug misugod sa pagpamulong. Akong mabati kon unsa ka mabatyagon ang akong papa sa mga pagbati ug personal nga mga panlimbasug ni mama. Namulong siya sa mga pulong sa kahupayan ug kalinaw ngadto kaniya atol niining panahon sa kausaban.
Sa kalit lang mibati ko og mainit nga pagbati sa akong dughan—hapit nahisama nga adunay miduslit og posporo sa kinahiladman nako. Nasayud ko nga akong nabati ang Espiritu Santo, bisan og ang kainit sa akong dughan dili sama sa kanunay nakong pagbati sa Espiritu sa una. Sama ra kini nga ang Langitnong Amahan direkta nga namulong kanako, ug dili gani kadto ang akong panalangin sa pagkapari!
Samtang hilom kaayong miingon akong amahan og “amen” ug akong gibuka ang akong mga mata nga napuno sa luha, nakaamgo ko nga ang akong tibuok pamilya naghilak. Nakadungog kaming tanan sa Espiritu nga namulong ngari kanamo diha sa malumo ug mahigugmaong paagi nga ang tanang butang mahimong OK ra. Ang akong mama ug papa naggakos, ug akong gibati nga ang kagul-anan nga anaa kanako sa dugayng panahon sa katapusan miiway aron mopuli ang kalipay.
Kaming tanan nakadawat sa mga panalangin, lakip nako. Sa akong panalangin ang Ginoo misiguro kanako nga Siya kanunayng nagmahunahunaon kanako ug gusto nga ako magmalipayon. Nakahatag kini nako og mga pagbati sa kalinaw ug kainit nga wala pa nako nabati sukad nga mibalhin kami sa Texas.
Ang Gahum sa Pagkapari Tinuod
Wala man tuod namo natuman ang matag tradisyon niana nga tuig, apan kanunay kaming mihinumdom kon giunsa namo pagbati ang gahum sa Dios nga midagayday pinaagi sa panalangin sa pagkapari sa akong papa. Kanunay nakong mahinumduman kon giunsa niini pag-usab ang akong mga pagbati sa kasubo ngadto sa kalinaw ug kalipay. Nakat-on usab ko og usa ka bililhon nga leksyon mahitungod sa gahum sa pagpakari. Kon ang tanang butang sa inyong palibut ingon og anaa sa sayop nga direksyon, ang panalangin sa pagkapari makapahinumdom kaninyo sa mabinantayon ug mahigugmaon nga presensya sa Ginoo diha sa inyong kinabuhi.