Yavu ni Kosipeli

Na Kalou sa Vosa Tiko vei Keda Nikua

Na Tamada Vakalomalagi e vinakata me vukei keda. Eda sa vakarorogo tiko beka Vua?

iVakatakilakila

photo of reenactment of First Vision

Ena 200 na yabaki sa oti, erau a rairai kina na Tamada Vakalomalagi kei Jisu Karisito ki na dua na cauravou ka yacana o Josefa Simici. Na iMatai ni Raivotu oqo e vakavulica vei keda na dina bibi eso. Sa mai liutaka tale o Jisu e dua na Lotu e vuravura. Era sa tiko na parofita nikua me vaka ena veigauna makawa. Ka sa kilai keda yadua na Kalou ena yacada ka dau vakarorogo tiko ki na noda masu. Eda sa vakalougatataki ni da tovolea me da rogoca na Domona ena veisiga yadua.

Na Cava na iVakatakila?

Ni vosa na Kalou vei ira na Luvena, e vakatokai oya na “ivakatakila.” Era tu na mataqali ivakatakila duidui.

Na ivakatakila yadua sa ikoya ni vosa tiko na Kalou vei keda yadudua mai vua na Yalo Tabu. E rawa ni vakacegui ka dusimaki keda o koya.

E rawa talega ni da ciqoma na ivakatakila me baleta na sala me da vukei ira kina o ira eda sa kacivi me da liutaka. Me kena ivakaraitaki, na itubutubu e rawa ni ciqoma na ivakatakila me baleta na nodra matavuvale, ka rawa vua e dua na bisopi me ciqoma na ivakatakila me baleta na nona tabanalevu.

Na parofita duadua ga e rawa ni ciqoma na ivakatakila me baleta na Lotu raraba, ia o keda yadua e rawa ni da masulaka me da kila kevaka e dina na veika era vakavulica na iliuliu.

iVakatakilakila

person praying

Itaba ni goneyalewa ena idabedabe e valenilotu mai vei Miguel A. Honores Troncosc; itaba ni marama masu tiko mai vei Catherine Frost; itaba ni tagane ena veikau mai vei David Winters; Maroroya Nona Yalayala o Jiova, mai vei Sam Lawlor

Meu Sureta Vakacava na iVakatakila?

E rawa ni da vosa vua e dua na Tamada Vakalomalagi dauloloma, ka kaukauwa sara, ka sa kila na ka kecega, ena dua ga na gauna ena masu. E vinakata o Koya meda vakavinavinakataka Vua na veivakalougatataki, ka vosa Vua me baleta na noda bula, ka kerea na veika eda gadreva. Me da qai vakarorogo matua ki na vakasama kei na veika vakilai e lako mai vua na Yalo Tabu, o koya sa vaka e dua na italai mai vua na Tamada Vakalomalagi.

E Rogo Vakacava Tu Beka na iVakatakila?

E sega ni dua walega na sala me vakamacalataki kina na ivakatakila. E dau vosa vei keda yadua na Kalou ena sala eda na kila vinaka kina (raica na Vunau kei na Veiyalayalati 1:24). Eso na gauna era dau sotava na tamata na tatadra kei na raivotu. Ia e vakavuqa ga, e dau vosa vei keda na Kalou ena veika vakilai taumalua mai na Yalo Tabu, me vaka na katakata malumu, vakacegu, se na reki.

Ena vuli ni Vunau kei na Veiyalayalati ni vula oqo, eda wilika kina me baleti Oliva Kauderi, ka a vakavulici ni na lako mai na ivakatakila ki na nona vakasama kei na vu ni yalona (raica na Vunau kei na Veiyalayalati 8:2).

Na Cava Eso na iVakaraitaki ni iVakatakila E Tu ena iVolanikalou?

E vuqa na italanoa vakaivolanikalou e vakamacalataka na Kalou ni vosa tiko vei ira na Nona tamata:

A tukuna vei Noa na Kalou na ivakarau me taqomaki kina na nona matavuvale (raica na iVakatekivu 6:17–18).
Rau a vakaceguya na Tamada Vakalomalagi kei Jisu e dua na tisaipeli na yacana o Sitiveni (raica na Cakacaka 7:55).
Na ivakatakila a vukei Nifai me muria na ivakaro (raica na 1 Nifai 4:6).
Me vaka ni so tale na ivolanikalou era lako mai na ivolatukutuku makawa eso, na Vunau kei na Veiyalayalati era sa ivakatakila ni gauna oqo. Ena yabaki oqo sa noda madigi bibi meda vulica e dua na ivola ka sinai tu kina na veivosa vakadodonu ni Turaga.