Tubu ki na iVakavuvuli ni Vakatakila
Mai vei Peresitedi Russell M. Nelson
Peresitedi ni Lotu i Jisu Karisito ni Yalododonu Edaidai
Au vakayaloqaqataki kemuni mo ni taura na ikalawa e gadrevi mo ni rogoca kina vakavinaka ka vakawasoma cake na Turaga me rawa ni o ni ciqoma na veivakararamataki e vinakata o Koya me solia vei kemuni.
iYaloyalo mai na Getty Images
E nai ka 30 ni Sepiteba, 2017, ni oti mai na soqoni ena yakavi ni koniferedi raraba, au a iro yani e valenibula meu laki raici noqu lewe ni kuoramu lomani o Elder Robert D. Hales. A sa curu tu e valenibula o koya me tekivu mai na gauna a yacova koya kina e dua na mate ni uto ena vica na siga sa oti.
A totoka sara na neirau veisiko, ka vaka me sa vinaka cake tiko o koya. A sa cegu vakavinaka sara tiko vakataki koya, ka sa dua na ivakatakilakila vinaka.
Ia, ena bogi oya, a vosa ki na yaloqu kei na lomaqu na Yalotabu meu lesu tale ki valenibula ena Sigatabu. Ena soqoni ni koniferedi raraba ena mataka ni Sigatabu raraba, a lesu mai kina na veivakauqeti kaukauwa o ya. Au a vakila ni dodonu meu levea na vakasigalevu ka vakatotolo ki na idavodavo nei Elder Hales ena gauna ga e oti kina na soqoni ena mataka, kau a cakava vakakina.
Niu yaco yani, au raica rawa ni sa ta vuki me bibi sara na mate vei Elder Hales. E ka ni rarawa, ni a takali yani o koya ni oti ga e 10 na miniti na noqu yaco yani, ia au vakavinavinaka niu a tu tikivi koya kei na watina lomani, o Meri, kei rau na luvedrau tagane ena nona biuta na bula oqo.
Au vakavinavinakataka ni a vakauqeti au na vakasolokakana ni Yalo Tabu meu cakava e dua na ka au na rairai sega beka ni cakava ke a sega oqori. Kau vakavinavinakalevu na dina ni ivakatakila ka sa tadola tale tu mai o lomalagi.
Ena yabaki oqo eda vakanamata ki na noda na vulica vaka tamata yadua ka vaka kalasi na Vunau kei na Veiyalayalati. Na “ivakatakila vakalou kei na itukutuku ni veivakauqeti ” eso oqo e rawa ni vakalougatataki ira kece era vulica ka cakacakataka na nodra veidusimaki vakalou. Era sureta “na tamata kece ena veivanua taucoko me ra rogoca na domo ni Turaga ko Jisu Karisito,”1 ni sa dina sara “na domo ni Turaga sa baleta na tamata kecega” (Vunau kei na Veiyalayalati 1:2).
Na veika Rerevaki, na Butobuto, na Veivakacalai
Na cagilaba eso vakayago ka vakayalo e tiki ni bula e vuravura, me vaka sa vakananumi keda kina na COVID-19. Me baleta na gauna ni se bera na iKarua ni Nona Lako Mai, a sa tukuna oti kina e liu na iVakabula na veisiga ni rarawa levu. A kaya o koya, “ena yaco tale ga na dausiga, kei na mate dauveitauvi, na tavuki ni vanua, ena yasana e vuqa” (Josefa Simici—Maciu 1:29).
Sa qai wakia vata na rarawa vakaoqori na tubucake ni butobuto kei na veiveretaki ka sa wavoliti keda tu. Me vaka a tukuna o Jisu vei ira na Nona tisaipeli, “ni (na) tubu vakalevu na ivalavala ca” ni bera Nona lesu mai (Josefa Simici—Maciu 1:30).
Sa vakasoqoni ira nona mataivalu o Setani ka sa vorata tikokei na cakacaka ni Turaga kei keda eda vakaitavi tiko kina. Ena vuku ni tubucake tikoga ni dredre eda sotava, na noda gadreva na veidusimaki vakalou e se bera vakadua ni bau cecere sara, kei na noda vei sasaga me rogoca na domo i Jisu Karisito—na noda Dautataro, noda iVakabula, ka Dauveivueti—ese bera vakadua ni bau gadrevi vakabibi sara.
Me vaka au a kaya ni oti ga vakalailai na noqu kacivi meu Peresitedi ni Lotu,ni sa tu vakarau na Turaga me vakatakila na Lomana kivei keda. Oqori e dua vei ira na Nona veivakalougatataki cecere duadua vei keda.2
Ena noda siga nikua, e sa yalataka o Koya, “Ia kevaka ko na kerea, ko na ciqoma na ivakatakila ena ivakatakila, na kila ka ena kilaka” (Vunau kei na Veiyalayalati 42:61).
Au kila ni na sauma mai o Koya na noda vakatakekere.
Na Sala Eda Rogoci Kina
Na kilaa ni sala e dau vosa mai kina na Yalotabu e sa yaga sara nikua. Me rawa ni da ciqoma na ivakatakila yadua, me kunei na isaunitaro, ka ciqomi na veitaqomaki kei na veidusimaki, eda nanuma lesu na ivakarau e e a vakotora o Josefa Simici me baleti keda.
iMatai, me da vakaogai keda ena ivolanikalou. Ni da cakava oqori ena tadolava na lomada kei na yaloda ki na ivakavuvuli kei na dina ni iVakabula. Na vosa i Karisito e “tukuna vei [keda] na veika kece [meda] kitaka” (2 Nifai 32:3), vakabibi ena gauna oqo ni veilecayaki kei na tiko yavavala.
Tarava me da masu Na masu e gadrevi me cakacakataki, ka da vakayalomalumalumutaki keda vua na Kalou, raica e dua na vanua vakanomodi e rawa ni da dau lako kina vakawasoma, ka sovaraka na yaloda ki Vua.
Sa kaya na Turaga “Dou toro voleka mai vei au ka’u na qai toro voleka yani vei kemudou; dou vakasaqarai au vagumatua dou na qai kunei au; dou kerekere ka na soli vei kemudou; dou tukituki ka na dolavi vei kemudou” (Vunau kei na Veiyalayalati 88:63).
Na toro voleka vua na Turaga ena kauta mai na vakacegu kei na veivakayaloqaqataki, na inuinui kei na veivakabulai. O koya gona, eda masu ena Yacana me baleta na noda lomaleqa kei na noda malumalumu, noda gagano kei ira na noda daulomani, na noda veikacivi kei na noda lomatarotaro.
Me da qai vakarorogo:
Kevaka eda na tekiduru tikoga me dua na gauna ni da sa tinia oti na noda masu, ena lako mai ki lomada na vakanananu, na yalo vakilai, kei na veidusimaki eso. Na volai ni veivakauqeti eso oqori ena vukei keda meda nanuma tiko na veika e vinakata na Turaga meda na cakava.
Ni da dau tokaruataka na cakacaka oqo, eda na rawa, ena nona vosa na parofita Josefa Simici, me da “tubu ki na ivakavuvuli ni ivakatakila.”3
Kilikili me Ciqoma na iVakatakila
Na vakasavasavataki ni noda rawaka me da kidava kina na vakasolokakana ni Yalo Tabu kei na vakatuburi cake ni noda rawa ni ciqoma na ivakatakila e dau gadrevi kina na bula kilikili. Na bula kilikili e sega ni gadrevi kina na vinaka sara, ia e gadrevi meda segata na bula savasava cake.
Na Turaga e namaka na sasaga e veisiga, na torocake e veisiga , na veivutuni e veisiga. Na bula kilikili e kauta mai na savasava, ia na savasava e vakadonui keda ki na Yalo Tabu. Ni da sa taura “na Yalo Tabu me [noda] idusidusi” (Vunau kei na Veiyalayalati 45:57), eda sa vakadonui ki na ivakatakila yadua.
Kevaka e dua na ka e tarovi keda tiko mai na dolavi ni katuba ki na veidusimaki vakalomalagi, eda na gadreva beka me da veivutuni. Na veivutuni ena rawa kina vei keda me da dolava na katuba me rawa ni da rogoca vakalevu ka vakamatata cake na domo ni Turaga.
A vakatavulica o Elder David A. Bednar ena Kuoramu ni iApositolo Le Tinikarua ni Sa matata tu na kena ivakatagedegede. “Kevaka e dua na ka eda vakasamataka, raica, rogoca, se cakava e vakayawaki keda mai vua na Yalo Tabu, ia e sa dodonu sara ga me sa muduki na noda vakasamataka, raica, vakarogoca, se vakayacora na ka oya. Kevaka e nakiti me veivakalasai na ka oya, me kena ivakaraitaki, me vakavulagitaki keda mai na Yalo Tabu,ia e sa vakadeitaka ni mataqali veivakalasai vaka oya e sega ni yaga vei keda. Baleta ni Yalotabu e sega ni rawa me vakamuria na veika e lolovira, sega ni taucoko, se tawakilikili, ia sa vakamatatataka ni veika vakaoqori e sega ni yaga vei keda.”4
Ni da vakaduavatataka na bula savasava torocake kei na talairawarawa vata kei na lolo, vakasaqaqara vagumatua, vulica na ivolanikalou kei na nodra vosa na parofita bula, kei na cakacaka ni valetabu kei na tuva kawa, ena tadola o lomalagi. Na Turaga, ena qai, vakayacora na Nona yalayala: “Au sa solia vei iko na Yaloqu, ia ena vakararamataka na nomu vakasama” (Vunau kei na Veiyalayalati 11:13).
Eda na gadreva beka me da dau vosota, ia na Kalou ena vosa vei keda ena Nona sala kei na Nona gauna ga.
Na Yalo ni Kilamataka
E kaya o Jope, “Sa tiko e dua na yalo ena loma ni tamata: a sa solia vei ira na vuku nai cegu iKoya sa Kaukauwa” (Jope 32:8). Ena yabaki vou oqo, au sa vakayaloqaqataki kemuni mo ni taura na ikalawa e gadrevi mo ni rogoca kina vakavinaka ka vakawasoma cake na Turaga mo ni ciqoma kinq na veivakararamataki e vinakata o Koya me solia vei kemuni.
Ni bera ni mai takali o Elder Hales ena siga o ya ena Okotova 2017, a sa vakarautaka tu okoya e dua na vosa lekaleka me baleta na koniferedi raraba ka a mani sega ni rawa me solia. Ena vosa oya, a vola kina o koya, “Sa vakarautaki keda na noda vakabauta meda tiko ena iserau ni Turaga.”5
Ni da ciqoma na ivakatakila, eda sa vakayagataka na noda gauna ena iserau ni Kalou ni sa vakatakila o Koya na Nona vakasama, na lomana, kei na domona vei keda (raica na Vunau kei na Veiyalayalati 68:4). Meda sa qai cakacakataka na noda vakabauta, meda kacivi Koya, bula kilikili ki na Nona veivakauqeti yalataki, ka cakacakataka na veituberi eda sa ciqoma.