Veiqaravi vei Ira Era Vesu Tu
Na yaga ni yalo ni dua na tamata e sega ni vakalailaitaki ena basulawa.
iYaloyalo mai na Getty Images
Ena gauna oqo, e sivia ni 10 na milioni na tamata era tauri tu vakavesu ena vei lokamu se valeniveivesu e vuravura raraba.1 O Jisu Karisito, ni lomana na tamata kecega ka kila vakavinaka na veika dredre kece sara, sa kerei keda meda veiqaravi vei ira kece na luve iTamada Vakalomalagi — oka kina o ira era vesu tu. “Ena qai vosa vua ko ira na yalododonu, ka kaya, Na Turaga, keimami a raici kemuni mada ninaica… ena valeniveivesu, ka lako vei kemuni?
“Ena qai vosa na Tui, ka kaya vei ira, Au sa kaya vakaidina vei kemuni, Ni kemuni a cakava vua e dua sa lailai vei ira na wekaqu oqo, ni a cakava vei au.”10.
E rawa vakacava ni da cakava na ka a kerea na iVakabula ka qaravi ira vakavinaka kina o ira era vesu tu? Na itukutuku oqo e vakarautaka nayavu ni ivakavuvuli eso me tekivu kina. Veivosakitaka ena masumasu kei ira na iliuliu ni Lotu vakaitaukei na veika e veiganiti ki ka matau na nomu iwasewase.
O Ira na Luve ni Kalou
Ni duidui beka na ivakarau ni lewa dodonu, ia na bolebole ni tu vakavesu e wasei raraba ena veimatanitu kei na itovo vakavanua. O Doug Richens e manidiataka na veiqaravi dolele yani me baleti ira na lewe ni Lotu era vesu tu ka dau cakacaka vata kei na so tale na ilawalawa vaka vakabauta ka na vakaitikotiko me vukei ira na veisu tu, se cava ga na ituvaki ni bula se nanuma vakalotu.
“E dua na vakatauvatani kilai levu me baleti ira na vesu tu o ya ni ra dau tawa nuitaki, voravora, ka rerevaki kece sara,” a kaya o Baraca Richens. “Ia, au sa raica ni vuqa sara e sega ni vaka o ya. E vuqa era dau vakila na veivutuni me baleta na nodra ivalavala. Era sa tovolea tiko me ra ulabaleta yani na digidigi ca ni veigauna sa oti ka bulataka na bula vinaka.”
Ena so na vanua, e levu sara me vaka me veimama ni lewe ni vanua e sa vesu oti e dua na nodra lewe ni matavuvale voleka .2 O ira na tacidra, itubutubu, kei na luvedra tauri vakavesu oqo—ni tawase mai na nodra kilai ena veiwekani vakavuravura—era sa luve vakatokani ni Kalou.
Veilewai Vakayago ka Tawamudu
E dina ga ni gadrevi vei keda ena bula oqo me da dau vakatulewa kina, sa irau na Tamada Vakalomalagi kei Jisu Karisito duadua ga e rawa me rau vakataulewa vakavinaka sara vua e dua ka yavutaki ena nodra ituvaki, ivalavala, kei na gagadre (raica na 1 Samuela 16:7). Na vakataulewa uasivi o ya ena okata vakaidina na veituvaki era a sucu mai kina na tamata ka vakavuna vakalevu cake kina na nodra vesu, me vaka na mavoa ni matavuvale, dravudravua vaka-tabatamata, na itovo ni vakayagataki waigaga, kei na so tale. E vuqa tale na ka e rawa ni vakayarayarataka na nona rawa ni cakava na tamata yadua me cakava na digidigi vinaka, oka kina na nodra tiko bulabula kei na tiko vinaka.3 Me vaka ni bibi vei ira na lewenivanua me vakaukauwataka na lawa ka taqomaki kina na itikotiko raraba, e rawa ni da cakava ena yalololoma kei na dua na rai tawamudu, ni da kila tu ni levu na ka eda sega ni kila vakavinaka.
“Vakasamataka na cava o na vakila kevaka o a lewai me baleta na vo ni nomu bula ena vuku ni ka ca duadua o a sa bau cakava vakadua,” a kaya o Tanja Schaffer, e dua na lewe ni Lotu ka a cakacaka ena dua na valenivolavola vakalawa ni bera ni tauyavutaka e dua na ilawalawa ni dautataro baleti ira na kaivesu. “E vakatau vua na Kalou me vosoti ira ga e via vosota o Koya, ia sa vakaroti keda o Koya me da vosota na tamata kecega” (raica na Maciu 18:21 – 22).
Na ivakavuvuli ni veilewai uasivi ni Kalou sa rawa talega me dua na ivurevure ni veivakacegui vei ira era vakacacani ena basulawa. Ena so na gauna era sega ni sotava na itotogi e vuravura o ira era vakararawataki ira na tani. Era na rawa beka ni sotava tu ga na rarawa o ira na vakaleqai me dua na gauna balavu ni sa mai cava oti na nodra vesu tu na daubasulawa. E vuqa na tamata era a bikai ena vesu e ra a vakacacani ka ra dauvakacaca talega ena so na gauna duidui, ka vakananuma vei keda ni bula oqo e sa dua na mataveilawa vereverea ni veimaliwai kei na vakatulewa ka dau tarai ira eso tale. Eda rawa ni kune vakacegu ni da nuitaka ni rau sa kila vakavinaka kece tu na Tamada Vakalomalagi kei Jisu Karisito. Ena uasivi sara na Nodrau vakatulewa. Na veivakabulai Erau solia—me baleti rau ruarua na tawacala kei na veivutuni—ena taucoko sara (raica na Ai vakatakila 21:4).
Na Nodra iVakaraitaki Loloma na Liuliu
E a vakamacalataka o Elder Gerrit W. Gong ena Kuoramu ni iApositolo Le Tinikarua e dua na soqoni era a vakaisulu vulavula tu kina na tamata kecega. A yaco tiko kina na lagalagasere kei na masumasu, ka vuabale sara na loloma ni Kalou.4 Me veibasai kei na veika e vuqa vei keda e rairai raitayaloyalotaka tiko, oqo e a sega ni dua na soqoni ni valetabu. Oqo e a dua na veisiko ni veiqaravi ena dua na valeniveivesu ka kena iunifomu tudei tutiko kina na ovarola vulavula.
“O ira na iliuliu ni Lotu era kauwaitaki ira kece era sa bikai tu ena caka cala kei na tu vakavesu,” vakadinadinataka o Baraca Richens, ni vakamacalataka tiko na nona dau solia yani na nona ilavelave ni mekasini ni Lotu vakai koya e dua na iliuliu ki vua e dua e dau sikova o koya e valeniveivesu ena veivula yadua. “Era dau sikovi ira wasoma na vesu tu, tokona na nodra matavuvale, ka qaravi ira na vakaleqai tu ena loloma.”
Na veiqaravi ni veivakadodonutaki e sa nona itavi na peresitedi ni iteki, ni cakacaka vata tiko kei ira na iliuliu ni tabanalevu me ra sotava kina na nodra gagadre o ira ena nodra iwasewase. Na cava beka era sa cakava tiko na nomu iliuliu ni iteki meo ra veiqaravi kina ka wasea na itukutuku veilaveti vei ira na lewenilotu era vesu tu? Ena so na vanua, sa rawa mera kacivi na lewe ni Lotu eso mera sikovi ka vakavulici ira na tamata era vesu tu. A kaya o Baraca Richens ni vakavuqa o ira na lewenilotu era kacivi me ra solia na veitokoni, era dau rere taumada, ia era qai dau raica ni veikacivi oqo e rui vakaibalebale sara ka ra sega saraga kina ni vinakata me ra vakacegui.
“Sa ikoya na lotu savasava,” a kaya o koya (raica na Jemesa 1:27).
Ni sega ni dodonu me da vakila ni da sa vakasaurarataki me da sikovi ira na tamata eda sega ni kila ka ra vesu tu, e tu eso tale na sala eda rawa ni veiqaravi kina vakavinaka. Oqo e vica:
-
Dau okati ira na tamata era vesu tu ena nomu masu, vakabibi ke o kila e dua ga ena yacana. E kaukauwa na masu!
-
Veitaratara kei na valeniveivesu se lokamu voleka mo raica kevaka era gadreva eso na iyaya soliwale mai. Na cakacaka ni liga me vaka na talitali, wilivola, droini, kei na vakadidike ni tuva kawa erna vakadonui ena vuqa na valeniveivesu.
-
Kevaka o kila eso era vesu tu, dau vola vei ira na ivola veilaveti eso. Dau cakava na digidigi e veitaqomaki, ka vuku ni ko veitaratara tiko. Vakamuria na Yalotabu ka maroroya na iyalayala veiganiti eso.
-
Qaravi ira nodra lewe ni matavuvale o ira era vesu tu—vakabibi o ira na gone—ena loloma, veidokai, kei na veiciqomi. Nanuma tiko ni o ira na lewe ni matavuvale vakararaba e dau kedra walega na isamu ni dawa ni ra sa tawacala talega. Na Yalo Tabu e rawa ni vukei keda me da kila na ivakarau vinaka duadua ni veiqaravi vei ira kece na lewe ni matavuvale.
Na Yalo Tabu e Tawa Yalani.
Na tu vakavesu e rawa ni dua na gauna dredre sara ena bula ni dua na tamata. Ia na Yalo Tabu e sega ni tarovi rawa ena lalaga, bai, se sinucodo. Na masu, vuli ivolanikalou, kei na yalomalumalumu e rawa ni sureta na nona Nona iserau veivakacegui ena kena totolo duadua me vaka ena loma ni dua na lokamu ni valeniveivesu se e taudaku. Ena vuku ni ka oqo, sa rawa kina ni yaco na valeniveivesu me dua na vanua ni cakamana.
O Portia Louder, e dua na lewe ni Lotu ka a dauvolavola ena sala ni vakauitukutuku raraba ni a vesu tu, a vakamacalataka na nona gauna ena valeniveivesu me dua na ilakolako dredre ni vakabauta kei na bulakilai-rawati koya vakai koya. “Au sa lako curuma eso na dredre bibi ena noqu bula, ia au rawa ni vakila niu sa vakabulai ena dua na loloma e tawa-vakamacalataki rawa,” a vola o koya. “Na bolebole cava ga o sotava tiko ena gauna oqo, se vanua cava ga o toka kina ena nomu ilakolako vakai iko, yalovinaka kakua ni soro!”
O Garff Cannon, ka a veiqaravi vaka-peresitedi ni tabana ena dua na valeniveivesu, a vakamacalataka na nona a vakauqeti mai vua na Yalotabu me vosa vinaka vua e dua na tagane kaivesu yalokaukauwa ka a dau bulataka tu e dua na bula dredre. “Na veika o se qai kaya ga vei au era sa vosa ni loloma cecere duadua e se qai bau cavuti vei au ena noqu bula,” a kaya na tagane oqo. “Au sega ni nanuma rawa vakadua me bau cavuti vei au ena yalovinaka kei na veikauwaitaki. Vinaka vakalevu.” Rau sa qai mai tinia na nodrau veisiko e na imatai ni masu me qai rogoca na tagane oqo ena vicavata na yabaki.
“Io, na Yalo Tabu esa dau tiko dina ena veivale ni veivakadodonutaki,” a vakadinadinataka o Baraca Cannon. “Era tiko e kea na luve ni Kalou, ka vinakata o Koya me ra lesu vua.”
Sa dau cakava na Kalou na yalayala kaukauwa kivei ira kece era digitaka me ra muri Koya, se da vulica taumada na veika baleti Koya ena Matawilivola ni Sigatabu se ena dua na valeniveivesu. Me vaka e tukuni ena isikeli 36:26 , “Au na solia talega vei kemudou na yalo vou, kau na vakacuruma ki na lomamudou na yalo vou.”
Na Curutale ki na Bula Vakaitikotiko e Veibolei Sara
Na yaga nia yalo nina e dua na tamata e sega ni vakalailaitaki ena basulawa (raica na Vunau kei na Veiyalayalati 18:10). ni dua e gadreva me veisau me vinaka cake, Eda vakatara beka vei ira na me ra tubu ka vosoti?
“Sa ka vakaitamera na loloma soliwale kei na yalololoma ni Kalou,” a kaya o Baraca Richens. “Eso na gauna era dau vakila na tamata vesu yadua ni ra sa vosoti makawa mai vua na Turaga ni se bera ni ra qai vosoti mai na matanitu, itikotiko, se so sara mada ga na lewe ni Lotu.”
Na lesu ki na itikotiko ni oti na tiko vakavesu e sa ka dredre. O ira era sa vesu tu era dau sotava na dredre ni ra vaqara cakacaka se na veivakavaletaki. E rawa ni da vukei ira me ra kunea na veimaroroi ena veivanua savasava ka sasagataka na ivakawele bulabula eso. E rairai ka bibi duadua eda rawa ni cakava oya meda dua na itokani vinaka, dau veivaqaqacotaki. Ena gauna a vosa kina o Josefa Simici me baleta na veiveisau ena valeniveivesu ni a tu tiko me Peresitedi, a vakavulica o koya ni “ivakarau kaukauwa kei na sogobutu ena sega sara ni cakava e levu na ka me veisau kina na rawai rawarawa ni tamata me vaka na veitalanoa kei na veitokani.”5
E Vakayaco Veisau na Yalololoma
A vakauqeti ira na Yalododonu o Juta me ra “lomani” (Juta 1:22). Na nona vosa e voqataka na nona vakamamasu na iVakabula me nanumi o ira era tiko ena valeniveivesu. Eda na sauma vakacava beka na veisureti oqo? Meda saga mada me vakani ira era sotava tu na tiko vakavesu, kei na nodra matavuvale, ena yalovinaka ni Kalou. Na noda yalololoma ena rawa ni vakayaco vakalevuveisau.