Dusimaki Keda Taucoko ki vei Jisu Karisito
E dua na ilakolako na bula. Na Liaona e rawa ni veivuke.
Droini ni Liaona mai vei Beth Whittaker
Ena gauna ni iVola i Momani, a vakarautaka na Turaga na Liaona me vukei Liai kei na nona matavuvale me ra tosokiliu ena nodra ilakolako. Sa ikoya e dua na “kabasi, ka na dusia vei ira e dua na sala dodonu ki na vanua yalataki” (Alama 37:44).
Me vakataki Liai ga, eda sa mua tiko ena dua na ilakolako. Ena tu na noda gauna vinaka kei na noda gauna sega sara ni vinaka. Siga vinaka kei na cava. Vakacegu kei na mosi. Ia ena vei gauna kece oqori, ena tiko na inaki vakalou baleta ni tu na keda yaga vakalou. Na Tamada Vakalomalagi e sega walega ni vinakata meda lesu tale vei Koya; e vinakata o Koya meda vakataki Koya vakalevu cake ena vukui Luvena, o Jisu Karisito. Ia ena so na gauna eda na gadreva na veivuke.
Ena ruku ni nodra veidusimaki na parofita bula, e tuvanaki kina na mekasini na Liaona ena noda gauna oqo me vukei keda me da kila na sala kei na noda vakamuria. Na vulici kei na bulataki ni kosipeli i Jisu Karisito e veisautaki keda. Ia ni da sa takosova na noda dui vanua dravuisiga kei na wasawasa, eda na raica ni da muri Koya tiko ena sigavinaka kei na gauna ni cava sa na vakatara Vua me buli keda ki na veika sa kila tu ga o Koya ni da na rawa ni yacova.
Wilika mo vulica e levu tale na ka me baleta na Liaona vou.
Na itaba ni marama ka volavola tiko e tauri mai na Getty Images; na vei itaba: ikarua ni iyatu mai cake (imawi) kei na ikatolu ni iyatu mai cake (imatau) ka tauri mai na Getty Images
Na Mekasini baleta na Yalo Yadua kei na Vuvale
Se o cavutu mai Solovenia se mai Sipeni, Madagascar se mai Massachusetts, na mekasini oqo e sa baleti iko. Se o vosa vaka-Korea se Kiribati; se caka ena vatu se bitu na nomu itikotiko; se o a papitaiso ena 80 na yabaki sa oti se na siga nanoa. O vakawati, tu duadua, qase, gone—era vosa ka ilovi iko na veidraunipepa oqo. Na nomu ivakadinadina, na veika o sotava, na nomu matavuvale ni vakabauta. Oya na veivakalougatataki cecere ni tiko e dua na mekasini e vuravura raraba me baleti ira na uabula. E vakaduavatataki keda ka vakananumi keda ni da lewena taucoko e dua na matavuvale e vuravura raraba kei na dua na lotu ni vuravura raraba.
O koya mo sema mai kina ki vei keimami meda toro voleka kece yani vei Jisu Karisito. Dua na ilavelave ena dua na gauna, dua na draunipepa ena dua na gauna. Ni ra dusimaki keda tiko na parofita kei na iapositolo, ka vukei keda tiko e dua na iVakabula dauloloma. O keda taucoko. Kedavata.
Na Cava me da na Namaka mai na Liaona Vou
Na iTukutuku mai vei ira na Parofita kei na iApositolo
Na mekasini na Liaona ena vakaraitaka na itukutuku mai vei ira na iliuliu ni Lotu ena kena gauna donu. Na itukutuku oqo, o koya e tabaki vakaivola kei na initaneti, ena dusimaki keda taucoko ki vua na iVakabula.
Veitokoni Vakalevu Cake vei ira Kece na Lewenilotu
E liu, eso na lewenilotu era a taura na mekasini vakavica ga ena dua na yabaki, ka na vakatau ena nodra vosa. Nikua na tolu na mekasini ni Lotu e vuravura raraba ena tabaki ena veivula se ena veivula eso ena veivosa era vosataka e rauta ni 97 na pasede ni lewenilotu.
Ena Levu Cake na Lewe ni iTukutuku Vakalivaliva
Me vukei iko mo rawata na lewenivola veivakauqeti o vinakata, keimami na vakarautaka ena vuqa tale na sala o vinakata. Vakasaqara na veika me sotavi vakalivaliva torocake ena liahona.ChurchofJesusChrist.org, ena tabana ni Gospel Living kei na Gospel Library, mai na imeli, kei na so tale na digidigi e se bera ni vakaraitaki mai.
Vulici ni Kosipeli Yavutaki ena Matavuvale
Ena veivula yadua keitou na veiwasei ena veika eda sotava, itaviqaravi, kei na ivakavuvuli me vukei ira na Yalododonu Edaidai mera vulica na kosipeli e vale ka vakavulica vei ira na luvedra kei ira na nodra daulomani.
Na iTalanoa Dina mai vei Ira na Lewenilotu Dina
Na itaba ni marama ka volavola tiko e tauri mai na Getty Images; na vei itaba: ikarua ni iyatu mai cake (imawi) kei na ikatolu ni iyatu mai cake (imatau) ka tauri mai na Getty Images
Ni o wilika na vei ka e sotavi mai vei ira na lewenilotu e vuravura taucoko ka vakatubu-vakabauta, ena vakaqaqacotaka na nomu vakabauta. E na qai vakananumi kina vei iko ni ko tiki ni dua na ka e levu cake mai na noda tabanalevu se tabana. Wasea na veika o sotava ena liaona.ChurchofJesusChrist.org se imeli mai vei keitou ena liahona@ChurchofJesusChrist.org.
Na iTalanoa kei na iTukutuku e Volekata sara na Vuvale
Na Liaona e tabaka e sivia na 60 na ivakadewa vakaiwasewase ka oka kina na tabana vakacurumi eso me baleta na veivanua duidui eso kei na vosa eso. Na veitabana vakaitaukei oqo ena vukea na nomu sema vata kei ira na Yalododonu, o ira na iliuliu, kei na veika e yaco voleka i vale.