Maroroi ni Sereivakatagi me Uto ni Sokalou
Na sereivakatagi e sa dau yaco—ka na dau yaco tikoga—me uto ni sokalou, ena lotu kei na loma ni itikotiko.
Ni qai vica ga na macawa mai na tauyavutaki ni lotu, a vakasalataki Ema Simici na Turaga me “digitaka talega eso na sere tabu, … na kena e dodonu vei au, me vakayagataki ena noqu lotu” (Vunau kei na Veiyalayalati 25:11). O ira na Yalododonu era gadreva na sala me ra vulica kina na dina ni kosipeli e vakatakilai vou ka duavata ena vakavinavinaka vua na Kalou. Ia na sere ni Lotu me tiko ena uto ni nodra sokalou kei na vuli.
Ena vica na yabaki sa oti, ni sa lewena na Lotu na noqu matavuvale, rau a vakauqeti keitou na neitou itubutubu me keitou vulica na sereivakatagi ni neitou vakabauta vou. Se tiko ga vei au na vakanananu matata ni gauna o ya:
-
Cavuqaqataki ni “Masu na Gagadre ni Yalo” (Serenilotu, naba 83) kei na neitou matavuvale.
-
Rogoci ni “I Tamaqu” (Serenilotu, naba 176) ka vulici tu ni sa tiko na Tamaqu kei na Tinaqu Vakalomalagi au na rawa ni raica tale ena dua na siga.
-
Vakilai na loloma ni Kalou ni lagati tiko na “My Heavenly Father Loves Me” (iVolanisere ni Gonelalai, 228–29)—e dina ga niu a tiko ena dua na vanua dravuisiga kau se sega mada ni raica e dua na vunikau lilac!
Toso sara mai liu ki na dua na soqoni ni sakaramede ena mua ni Feperueri 2020. E vica na lewe ni neitou tabanalevu era a saga tiko me ra walia na kenisa, kau vakila na vakacegu titobu ena gauna era lagata kina na matasere ni tabanalevu “Na Yavu Tudei” (Serenilotu, naba 43). Ni oti e vica na macawa, a basika veitarataravi mai eso na ka ka vakatubu nuiqawaqawa: korenitini, vakadaroi ni lotu, kei na vica vata na uneune kei na kena revurevu. Ka tekivu me vakatagitaki tale tu ena noqu vakasama na serenilotu oya:
Dou kua ni rere, se dou taqaya,
Sa na vukei keda na noda Kalou.
Tou sa na tuberi ka tokoni tu,
E ligai matau, ni noda Kalou.
Eso na gauna e vaka me sa tubu tiko ga na bolebole ni vuravura kei na tamata voleka ni veisiga kecega. Vakalevu sara, eda sa gadreva na veivakani vakayalo ni serenilotu, sere ni Lalai, kei na sereivakatagi tabu tale eso.
Sega na Veisau ena iNaki se Kena Bibi
Ia, ni da sa veisau ki na rua na auwa ni soqoni ni Lotu, eso era vakananuma se sa vakalailaitaki na itavi ni sereivakatagi ena noda sokalou. Na kena isau e sega.
-
Na serenilotu tabu e sa tiki tikoga ni soqoni yadua ni sakaramede, oka kina na noda vakarautaka na yaloda me baleta na cakacaka vakalotu ni sakaramede. Na lagasere ni matasere kei na ivavakoso se na sereivakatagi tabu tale eso e se rawa tikoga ni tuvai me vakabulabulataka na soqoni, me vaka e liu. Ena gauna ni COVID-19, e se tiki bibi tikoga ni soqoni ni sakaramede vakalekalekataki na sereivakatagi tabu, ni vakatagitaki wale tu madaga.
-
Era sa vakayagataka oqo na luveda e veimama ni nodra gauna ena Lalai ni kena vulici na kosipeli mai na sereivakatagi.
-
Ena ikarua ni auwa, e sa sega na sere ni doladola se suka me baleta na kalasi ni uabula kei na itabagone. Ia se rawa tikoga ni vakayagataki na sereivakatagi ena kalasi eso me veivakavulici ka veivakauqeti.
-
E sa qai rawarawa cake tiko ga mai na vakarorogo ki na sereivakatagi tabu ena veigacagaca vakalivaliva, ni vakayagataki na Sacred Music app ni Lotu.
Lailai na iVakarau, Levu cake na iNaki
Ia, sa tiko voli eso na nanuma cala. Ena dua na Sigatabu ni Siganimate, a kere veivosoti e dua na qasenivuli ki na nona kalasi ni iVunau ni Kosipeli: “Au kila ni sega ni dodonu meda lagasere ena Matawilivola ni Sigatabu, ia au vinakata saraga meda lagata vata na ‘Au Sa Kila ni Bula Tu.” E rairai sega ni o koya duadua ga na qasenivuli oya e nanuma cala.
Vakaidina, na sereivakatagi e se tiki bibi tikoga ni noda sokalou me vaka e sa dau yaco tiko. Vakadinadinataka na veivakavoui matalia sa yaco tiko oqo ki na noda serenilotu kei na kumuni ni sere ni gonelalai. Me tiki ni sasaga oya, era sa vakauta mai na lewe ni Lotu e vuravura raraba e 16,000 na serenilotu vou, sere, kei na tex veivakadrukai.
Ia ni lailai tu na gauna vakarautaki ni lagasere ena so na noda soqoni ni Sigatabu, ena gadrevi me na vakasamataki ka vakainaki vakalevu sara na kena tuvalaki ka vakayagataki na sereivakatagi.
E rua na ivakavuvuli bibi e rawa ni vukei keda ni maroroya na sereivakatagi me uto ni noda sokalou:
1. Yaga Sara ena Veivakavulici
Eda na rairai nanuma ni sa ivure taumada ni kena vakauti na itukutuku ni kosipeli na vosa kei na veitalanoa eso ena itikotiko kei na valenilotu. Ka rawa ni da vakayagataka e vuqa na noda gauna ena veika oqori. Ia na sereivakatagi e sega ni mai ukuuku walega. Sai koya na uto sara ga ni veivakavulici ena kaukauwa kei na Yalotabu.
Me vaka a vakasalataki ira kina na Yalododonu eliu o Paula na Apositolo, “Me tiko vakalevu ena lomamudou na vosa i Karisito ena vuku kecega; dou veivakatavulici ka veivunauci vakai kemudou ena same kei na sere kei na meke vakayalo, dou sere tiko vua na Kalou ni sa tiko ena yalomudou na loloma” (Kolosa 3:16).
Na sereivakatagi e rawa ni kauta vakasauri mai na Yalotabu ki na dua na lesoni se soqoni. Na digitaki ni dua na sere me lagati ena gauna ni kalasi ni Matawilivola ni Sigatabu se dua na veivosaki ni Lako Mai, Mo Muria Au sa gadreva na vakasama navuci masulaki vataga me vaka na ivolanikalou eda digitaka me wiliki se na tiki ni lesoni eda digitaka me wasei. Na sereivakatagi e digitaki ena yalomasumasu sa rawa ni tara na yalo, ka vakavure veivakauqeti vakayalo e rawa ni tudei tu ena bula taucoko.
2. “Sa Dua na Masu kivei Au”
Ena so na gauna, eda na rairai sotava taucoko na yalo kovoro, na gauna e sa buwawa kina vei keda na salatu eliu. Eso na gauna ena rairai vaka ni da sa kolotaka tiko ga na gagadre bibi vataga vaka ki lomalagi, ka sega ni dua tu mai na kena isau se iwali. Ena veigauna vakaoya, e rawa ni veitemaki tu me vakadeitaki ni sa sega ni kauwai na Kalou se eda sa tawakilikili kaya na Nona veikauwaitaki. Eso na gauna ena rawa ni nanumi tu meda sa cegu ena masumasu.
Ena gauna eda vakila kina na luluqa ni isema vakayalo kei lomalagi, oqo e dua na dina veivakacegui: Na sereivakatagi tabu sa rawa dina me dua na ivakarau ni masumasu. A vakamacalataka oqo Vakaikoya na Turaga ena Nona lesi Ema me cakava na matai ni noda ivolanisere: “Raica sa dau rekitaka na yaloqu na sere sa lagati ena yalodina; io, na nodra sere na yalododonu sa nodra masu vei au”(Vunau kei na Veiyalayalati 25:12; vakamatatataki).
Ia ni da sa dulaka ena yalodina ki Vua na sere ni yaloda, sa yalataka na Turaga me na sauma tikoga ena veivakalougatataki: “Ka na saumi vei ira ena veivakalougatataki ki uludra. O koya mo reki kina ka marau“(Vunau kei na Veiyalayalati 25:12–13).
Ena dua na gauna dredre ena noqu bula, au a sega ni kila rawa na isau ni masu vakilai e lomaqu ena ni dua na gauna balavu. E dua na noqu itokani lomani a lako curuma tu eso na dredre vakai koya. Ia ni keirau vakatagitaka ka lagata vata na serenilotu kei na sere ni kosipeli eso, keirau dau vakila na yalo veivakadrukai ni veivakacegui kei na ivakadinadina. Au sa qai kila oqo ni sa vakayacora tiko na Turaga na Nona yalayala. E sa sauma veitaravi tiko o Koya na sere ni yaloqu. Ka sai koya dina oya e vukei au ni laveta cake na yaloqu ka toso tikoga.
Photograph by Robert Casey
Ena Dua Ga Na Sigatabu
Ena dua ga na Sigatabu, sa rawa ni da vakadeitaka ni so ena noda ivavakoso, eso ena noda kalasi, ka so ena noda matavuvale e sa tiko ena wai titobu ni veivakararawataki vakatamata. Eso tale e tiko ena buca veivakacegui eso ka vuabale tu na veivakalougatataki. Ia eso tale e se na qai vulica tiko na yavu dina eso ni kosipeli.
Ni da maroroya na sereivakatagi ena kena itutu donu me uto ni noda sokalou, eda sa rawa ni vukea na tamata taucoko ni raica na madigi eso me vakila kina na Yalotabu, vulica na dina ni kosipeli, ka vakacaucautaka na Turaga ena Nona vinaka. Ka rawa ni da vukea na tamata taucoko me saumi na sere ni lomadra ena sala e rawa duadua ga ni vakayacora na Tamada Tawamudu dauloloma.