“Au Via Lako ki Parataisi”
Niu a masu ka kerea vua na Kalou na salatu vou oqo, au vakila niu sa vakadeitaka vakalevu na dina au sa kunea.
iTaba mai na Getty Images, matataka na dauvakaraitaki
Au a dua tu na lewenilotu tudei ni dua tale na lotu, ia au a qai tekivu vulica na kena ivakavuvuli me baleta na vanua ni totogitaki yalo. Na vakasama oqo e vakavulica na yalo, ni oti na mate vakayago, e sa vakacurumi ki na dua na vanua e tautauvata kei na valeniveivesu, na vanua me na vakasavasavataki kina ni bera ni gole tu ki parataisi.
Niu vakasamataki ira na yalo vakararawataki tu ena vanua ni totogitaki yalo, au vakananuma na noqu veisiga vakayalo nimataka kei na noqu veimaliwai kei Jisu Karisito. Au sa tekivu masulaka, “Na cava meu cakava meu drotaka kina na vanua ni totogitaki yalo? Au via lako ki parataisi.”
Na matai ni ka e yaco mai ki na noqu vakasama oya meu bulataka na iVunau e Tini. Au vakila keu na vakayacora, na loloma soliwale ni Turaga ena vakatarai au meu levea na vanua ni totogitaki yalo. Au sa vakadeitaka meu muria na ivunau ka tekivutaka e dua na ivakarau momona ni lolo, masumasu, vuli ivolanikalou, kei na vakasama titobu.
Donuya na gauna oqo, au a vakauqeti meu taroga e dua na taro duatani kivua e dua na vuniwai ena valeniwai au cakacaka tiko kina vaka daunilavo levu.
“Dr. Thibaut,” au a kaya, “e tiko beka na Turaga o Jisu Karisito ena nomu lotu?”
A tukuna o koya ni lewena na Lotu i Jisu Karisito ni Yalododonu Edaidai. Mai na gauna oya, sa dusimaka tu na Yalotabu na neirau veivosaki. Au a tarogi koya me baleta na duidui eso ena nona lotu kei na noqu. A tukuna vei au o koya me baleta na iVola i Momani. Ni tomani tiko na neirau veivosaki, sa vakasinaiti na yaloqu ena reki. Au vakila niu sa ciqoma tiko na isau ni noqu masu.
Ena rua na siga ka tarava rau a solia vei au na daukaulotu e dua na iVola i Momani, kau sa wilika ka vulica vata kei rau. Au raica ni sa totoka dina me vulici na veika vou mai na ivolanikalou. Au sa tekivu vakamuria na Vosa ni Vuku.
Niu vakila tu ni sa luluqa na noqu taleitaka na noqu lotu, kau a vakaitavi vakalevu sara kina, au vakananuma tu na cava e sa yaco tiko. Au a masulaka ka taroga vua na Kalou baleta na salatu vou oqo. Niu vakayacora, au sa vakila na veivakadeitaki levu ni dina au sa kunea tu. Au sa navuca meu lewena na Lotu, e dina ga au kila tu niu na sotava na veivakacacani.
E yaco na veivakacacani, ia sa vakaukauwataki au na Turaga. Au kila Na Lotu i Jisu Karisito ni Yalododonu Edaidai e sa isau ni noqu masu yalodina: “Au via lako ki parataisi.” Au kila niu rawa ni lako kikea niu sa mate oti, kevaka au sa yalodina tikoga ki na ivunau ni Kalou.